సైలెంట్​ ఓటీటీలోకి విష్వక్ మూవీ - 'మెకానిక్ రాకీ' ఎక్కడ స్ట్రీమ్ అవుతోందంటే?

విశ్వక్​ ​సేన్ లేటెస్ట్ మూవీ 'మెకానికల్ రాకీ' ఓటీటీ రిలీజ్ డీటైల్స్ మీ కోసం

Mechanic Rocky OTT Release : మాస్​ కా దాస్ విశ్వక్​​ సేన్‌ లీడ్ రోల్​లో తెరకెక్కిన లేటెస్ట్ మూవీ 'మెకానిక్ రాకీ'. రీసెంట్​గా థియేటర్లలో విడుదలైన ఈ చిత్రం బాక్సాఫీస్ వద్ద ఆశించిన స్థాయిలో టాక్ అందుకోలేకపోయింది. అయితే ఇప్పుడీ చిత్రం సైలెంట్‌గా ఓటీటీలోకి వచ్చేసింది. ప్రముఖ ఓటీటీ సంస్థ అమెజాన్‌ ప్రైమ్‌ వేదికగా అందుబాటులో ఉంది. ఈ విషయాన్ని తాజాగా ఆ సంస్థ అఫీషియల్​గా అనౌన్స్​ చేసింది.

స్టోరీ ఏంటంటే :
న‌గుమోము రాకేశ్ అలియాస్ రాకీ (విశ్వక్​ సేన్‌) బీటెక్ మ‌ధ్య‌లోనే నిలిపేసిన ఓ యువకుడు. తండ్రి రామ‌కృష్ణ (న‌రేశ్​ వీకే) న‌డుపుతున్న ఓ గ్యారేజీలో మెకానిక్‌గా సెటిలైపోతాడు. గ్యారేజ్​లో రిపేర్లు చేయ‌డంతో పాటు డ్రైవింగ్ కూడా నేర్పిస్తుంటాడు. అయితే రాకీ ద‌గ్గ‌ర డ్రైవింగ్ నేర్చుకోవడం కోసం మాయ (శ్ర‌ద్ధా శ్రీనాథ్‌), ప్రియ (మీనాక్షి చౌద‌రి) వ‌స్తారు. రాకీ కాలేజీలో చ‌దువుకునే సమయంలో త‌న మ‌న‌సుకు ద‌గ్గ‌రైన అమ్మాయే ప్రియ‌. త‌న ఫ్రెండ్​ చెల్లెలు కూడా. వీళ్లిద్ద‌రి మ‌ధ్య లవ్​ట్రాక్ స్టార్ట్​ అనుకునేలోపు కొన్ని కారణాల వల్ల కాలేజీ డ్రాప్ అవ్వాల్సి వచ్చింది రాకీ. అయితే డ్రైవింగ్ స్కూల్ కార‌ణంగా చాలా రోజుల త‌ర్వాత మ‌ళ్లీ క‌లిసిన ప్రియ గురించి రాకీకి తెలిసిన కొత్త విష‌యాలేమిటి? మరి ఆ విషయాలు తెలుసుకుని ప్రియ కోసం రాకీ ఏం చేశాడు? వాళ్లిద్ద‌రి జీవితాల్లోకి వచ్చిన మాయ వారి ఎలా ప్ర‌భావితం చేసింది? ఇటువంటి విషయాలు తెలుసుకోవాలంటే మిగతా సినిమా చూడాల్సిందే.

విశ్వక్​ లైనప్
'జాతి రత్నాలు' ఫేమ్‌ డైరెక్టర్ కేవీ అనుదీప్‌తో కలిసి 'ఫంకీ' అనే సినిమా కోసం పని చేయనున్నారు. సితార ఎంటర్‌టైన్‌మెంట్స్‌ పతాకంపై నాగవంశీ ఈ చిత్రాన్ని నిర్మిస్తున్నారు. ఫన్‌, ఫ్యామిలీ ఎంటర్‌టైనర్‌గా ఇది సిద్ధం కానున్నట్లు తెలుస్తోంది. త్వరలోనే రెగ్యులర్‌ షూట్‌ ప్రారంభం కానున్నట్లు తెలుస్తోంది. ఇక ఆషికా రంగనాథ్‌ ఈ సినిమాలో కీ రోల్ ప్లే చేయనున్నట్లు సమాచారం. దీంతో పాటు రామ్‌ నారాయణ్‌ డైరెక్ట్ చేస్తున్న 'లైలా' అనే సినిమా కోసం వర్క్‌ చేస్తున్నారు. ఇందులోని కొంత భాగం కోసం విష్వక్ అమ్మాయి గెటప్‌లో కనిపించనున్నారట. తాజాగా విడుదలైన టైటిల్ పోస్టర్​తో అభిమానులు ఈ చిత్రం గురించి నెట్టింట తెగ చర్చించుకుంటున్నారు.