96th Oscar Awards ceremony Live Streaming OTT : ప్రపంచ చలన చిత్ర రంగంలో అత్యంత ప్రతిష్టాత్మక భావించే పురస్కారం ఆస్కార్. జీవితంలో ఒక్కసారైనా ఈ అవార్డును ముద్దాడాలనుకుని ఫిల్మ్ ఇండస్ట్రీలోని ఎంతో మంది కళాకారులు ఆరాటపడుతుంటారు. బాక్సాఫీసు కలెక్షన్లను కొల్లగొట్టడం ఒక విజయం అయితే ఆస్కార్‌ను అందుకోవడం తమ జీవితంలో ఓ వరంలా భావిస్తుంటారు. ఈ ప్రతిష్టాత్మక పురస్కారాన్ని గెలుచుకుంటే ఆ ఆనందానికి హద్దులే ఉండవు. మరో నాలుగు రోజుల్లో 96వ ఆస్కార్ అవార్డ్ వేడుక గ్రాండ్గా జరగనుంది.
అయితే ప్రపంచంలోనే అత్యంత ప్రత్యేకమైన ఈ అకాడమీ అవార్డ్స్ వేడుకలను భారతీయులకు లైవ్ ద్వారా వీక్షించే అవకాశం కల్పించారు నిర్వాహకులు. ఆదివారం రాత్రి జరగనున్న ఈ అవార్డుల ప్రదానోత్సవ కార్యక్రమాన్ని ప్రముఖ ఓటీటీ ఫ్లాట్‌ఫామ్‌ ప్రత్యక్ష ప్రసారం చేయనున్నట్లు అనౌన్స్ చేశారు. హాస్యనటుడు జిమ్మీ కిమ్మెల్ నాలుగో సారి ఈ కార్యక్రమాన్ని హోస్ట్ చేయబోతుండటం విశేషం.
భారతీయ కాలమానం ప్రకారం మార్చి 11న సోమవారం ఉదయం నాలుగు గంటలకు ఆస్కార్ వేడుకను లైవ్ స్ట్రీమింగ్ కానుంది. ఈ విషయాన్ని డిస్నీ ప్లస్ హాట్‌స్టార్‌ అధికారికంగా తెలిపింది. ఈ సందర్భంగా ఆస్కార్కు నామినేట్ అయిన చిత్రాలను జోడించి ఓ స్పెషల్ వీడియోను పోస్ట్ చేసింది.
కాగా, ఈ ఏడాది ఆస్కార్ అవార్డులకు ఓపెన్‌హైమర్, కిల్లర్స్ ఆఫ్ ది ఫ్లవర్ మూన్, మాస్ట్రో, బార్బీ, పూర్ థింగ్స్ అమెరికన్ ఫిక్షన్ వంటి లాంటి చిత్రాలు పోటీ పడేందుకు బరిలోకి దిగాయి. భారత్ నుంచి పోటీలో టు కిల్ ఏ టైగర్ ఉంది. ఉత్తమ డాక్యుమెంటరీ విభాగంలో ఈ చిత్రం ఆస్కార్కు నామినేట్ అయింది. భారత్‌లోని ఓ మారుమూల గ్రామంలో షూటింగ్ జరుపుకుందీ చిత్రం. నిషా పహుజ దర్శకత్వం వహించారు.
ఇకపోతే గతేడాది భారత్కు రెండు ఆస్కార్ అవార్డులు దక్కిన సంగతి తెలిసిందే. దర్శకధీరుడు రాజమౌళి తెరకెక్కించిన ఆర్ఆర్ఆర్ చిత్రంలోని నాటు నాటు సాంగ్కు ది బెస్ట్ ఒరిజినల్ సాంగ్ విభాగంలో ఆస్కార్ అవార్డ్ దక్కింది. అలాగే ది ఎలిఫెంట్‌ విష్పరర్స్ అనే డాక్యుమెంటరీ సిరీస్‌ కూడా ఈ ప్రతిష్ఠాత్మక అవార్డ్‌ను కైవసం చేసుకుంది.
ఓటీటీలోకి బాలయ్య బ్యూటీ హనీ రోజ్ రియల్ స్టోరీ మూవీ! - స్ట్రీమింగ్ ఎక్కడంటే?
