Pros And Cons Of Taking Multiple Home Loans : భవిష్యత్లో ఆర్థిక లాభాలు సంపాదించడం కోసం మనం ఎన్నో రకాల మార్గాల్లో పెట్టుబడులు పెడుతూ ఉంటాం. అందులో భాగంగా కొందరు రియల్ ఎస్టేట్ వ్యాపారంలో పెట్టుబడులు పెట్టాలని భావిస్తారు. ముఖ్యంగా ఇళ్లను కొనుగోలు చేసి, భవిష్యత్లో మంచి లాభాలకు అమ్మాలని ఆశిస్తారు. మరికొందరు ఇంటిని అద్దెకు ఇచ్చి, నెలవారీ ఆదాయం సంపాదించాలని చూస్తారు. అందుకోసం బ్యాంకుల నుంచి అనేక సార్లు హోమ్ లోన్ తీసుకుని మరీ ఇళ్లను కొనుగోలు చేస్తుంటారు. మరి ఇలా పలుమార్లు హోమ్ లోన్ తీసుకునే ముందు ఎలాంటి జాగ్రత్తలు తీసుకోవాలో ఇప్పుడు చూద్దాం
పక్కా ప్రణాళిక
సొంత ఇల్లు అనేది చాలా మందికి ఒక కల. కానీ వ్యాపారంలో భాగంగా ఇళ్లు కొనడం అనేది పూర్తిగా ప్రత్యేకమైన విషయం. ఒకవేళ మీరు వ్యాపారం నిమిత్తం పలుమార్లు హోమ్ లోన్ తీసుకోవాలని అనుకుంటే, అందుకు అనేక అంశాలను పరిగణించాల్సి ఉంటుంది. ముఖ్యంగా హోమ్ లోన్స్ తీసుకునే ముందు, కచ్చితమైన ప్రణాళికతో ముందుకెళ్లాలి. మీ ఆర్థిక పరిస్థితులను, సంసిద్ధతను సమీక్షించుకోవాలి. మీ భవిష్యత్ అవసరాలకు, ఆర్థిక లక్ష్యాలకు అనుగుణంగా సరైన నిర్ణయం తీసుకోవాలి. అవసరమైతే నిపుణులు సలహాలు తీసుకోవాలి.
సమీక్ష
హోమ్ లోన్ తీసుకునే ముందు మీ ఆర్థిక లక్ష్యాన్ని సమీక్షించుకోవాలి. ఇళ్లను అద్దె ఆదాయం కోసం కొంటున్నారా? లేదా ధర పెరిగిన తర్వాత విక్రయించి సొమ్ము చేసుకోవాలని అనుకుంటున్నారా? లేదా సెలవుల్లో కుటుంబ సభ్యులతో కలిసి సరదాగా గడపేందుకు వాడుకోవాలని భావిస్తున్నారా? లేదా పెరుగుతున్న కుటుంబ అవసరాలకు అనుగుణంగా పెద్ద ఇంటిని తీసుకుంటున్నారా? అనే అంశాలను సమీక్షించుకోవాలి. దానికి అనుగుణంగా పక్కా ప్రణాళిక వేసుకోవాలి.
ఆర్థిక సంసిద్ధత
వ్యాపారం కోసం హోమ్ లోన్ తీసుకుంటే, అనేక ఆర్థిక పర్యవసానాలు ఏర్పడతాయి. అందువల్ల హోమ్ లోన్స్ తీసుకునే ముందు అనేక రకాల ప్రశ్నలు వేసుకోవాలి. అవేంటే ఇప్పుడు చూద్దాం.
- ఇప్పటికే ఉన్న రుణాలను ఎంత వరకు తీర్చారు? ఇంకా ఎంత మొత్తం బకాయి ఉంది? వాటిని తీర్చేందుకు సరిపడా ఆదాయ వనరులు మీ దగ్గర ఉన్నాయా?
- అత్యవసర సమయాల్లో అక్కరకు వచ్చేలా, మీకు స్థిరమైన ఆదాయ మార్గాలు ఉన్నాయా? కొత్త రుణాలను తీర్చేందుకు అవి సరిపోతాయా?
- డౌన్‌పేమెంట్‌కు కావాల్సినంత డబ్బు మీ చేతిలో ఉందా? హోమ్ లోన్ తీసుకునేటప్పుడు, ఏమైనా అదనపు రుసుములు చెల్లించాల్సి వస్తే, అందుకు తగినంత డబ్బులు మీ దగ్గర ఉన్నాయా?
- రెండోసారి హోమ్ లోన్ తీసుకునేందుకు కావాల్సిన అర్హతలు మీకు ఉన్నాయా? లేదా మల్టిపుల్ హోమ్ లోన్స్ తీసుకునే సామర్థ్యం మీకు ఉందా?
ఇలా అన్ని విధాలుగా మిమ్మల్ని మీరు ప్రశ్నించుకోవాలి.
వడ్డీ రేట్లు
మార్కెట్లో ఉన్న హోమ్ లోన్ వడ్డీ రేట్లపై, రుణం తీర్చేందుకు ఉన్న వ్యవధులపై ప్రత్యేకంగా దృష్టి సారించాలి. కీలక వడ్డీ రేట్లు సమంజసంగా ఉంటేనే ముందుకెళ్లాలి. లోన్ తీసుకునే ముందు వివిధ బ్యాంకులు, బ్యాంకింగేతర సంస్థలను సంప్రదించాలి. తక్కువ వడ్డీ రేటుతో, సింపుల్ షరతులతో ఉన్న బ్యాంక్ లోన్స్ తీసుకోవాలి. పైగా రెండోసారి లేదా మల్టిపుల్ టైమ్స్ హోమ్ లోన్స్ తీసుకుంటే, పన్నుల భారం ఏవిధంగా ఉంటుందో చూసుకోవాలి. సాధారణంగా మంచి పేరున్న సంస్థల నుంచి హోమ్ లోన్స్ తీసుకోవడమే మంచిది.
ఏరియా
మనం ఏ ప్రాంతంలో ఇళ్లు కొంటున్నామనేది చాలా కీలకం. మంచి వసతులు, రోడ్డు సౌకర్యాలు, విద్యుత్, నీటి సౌకర్యాలు ఉన్న ప్రాంతంలో ఇళ్లు తీసుకుంటే, వాటికి మంచి డిమాండ్ ఉంటుంది. అప్పుడే దానిని అద్దెకు ఇచ్చినా, లేదా భవిష్యత్లో అమ్మినా మంచి లాభం వస్తుంది. లేదంటే తిరిగి మీపైనే ఆర్థిక భారం పడుతుంది.
సమస్యలు వస్తే?
మనం ఎంత పక్కాగా ప్లాన్ చేసినా, ప్రత్యామ్నాయ ప్రణాళికలు వేసుకోవడం కూడా చాలా అవసరం. దీని వల్ల భవిష్యత్లో ఏవైనా ఇబ్బందులు తలెత్తితే, దానిని ఎదుర్కోవడానికి సిద్ధంకాగలం. ఎందుకంటే ఊహించని పరిణామాల వల్ల భవిష్యత్లో మన ఆదాయ మార్గాలు తగ్గిపోవచ్చు. అలాంటప్పుడు రుణం తిరిగి చెల్లించడం బాగా కష్టమైపోతుంది. లేదా చట్టపరమైన చిక్కులు రావచ్చు. అందుకే ముందుగానే ఇలాంటి సమస్యలను ఎదుర్కోవడానికి సంసిద్ధంగా ఉండాలి.
నోట్ : భారతదేశంలో ఎన్ని హోమ్ లోన్స్ అయినా తీసుకోవచ్చు. వీటి సంఖ్యపై ఎలాంటి పరిమితి లేదు.
2024లో లాంఛ్ అయిన టాప్-10 బైక్స్ & స్కూటర్స్ ఇవే!
బ్యాంక్ నుంచి లోన్ తీసుకుంటున్నారా? ఈ విషయాలు కచ్చితంగా తెలుసుకోండి!
