Gas Cylinder Price Today : వాణిజ్య అవసరాలకు ఉపయోగించే వంట గ్యాస్ ధర స్వల్పంగా తగ్గింది. 19 కిలోల ఎల్పీజీ సిలిండర్ ధరను రూ.14.5 మేర తగ్గిస్తున్నట్లు చమురు మార్కెటింగ్ సంస్థలు బుధవారం ప్రకటించాయి. అంతర్జాతీయ మార్కెట్లో ముడిచమురు ధరలకు అనుగుణంగా ఈ నిర్ణయం తీసుకున్నాయి. ఫలితంగా దేశ రాజధాని దిల్లీలో వాణిజ్య ఎల్పీజీ సిలిండర్ ధర రూ.1804కు చేరింది. ముంబయిలో రూ.1756, కోల్కతాలో రూ.1911, చెన్నైలో రూ.1966గా ఉంది.
గత ఐదు నెలలుగా వాణిజ్య ఎల్పీజీ సిలిండర్ ధర పెరుగుతూ వస్తోంది. చివరగా 2024 డిసెంబర్ 1న 19 కిలోల వంట గ్యాస్ బండ ధర రూ.16.5 మేర పెరిగింది. ఇప్పుడు ఆంగ్ల నూతన సంవత్సరాది నాడు ఎల్పీజీ ధరను స్వల్పంగా తగ్గించాయి చమురు సంస్థలు. అయితే, గృహ అవసరాలకు వినియోగించే వంటగ్యాస్ ధరలో మాత్రం ఎలాంటి మార్పు లేదు. దిల్లీలో 14.2 కిలోల ఎల్పీజీ సిలిండర్ ధర రూ.803గా ఉంది.
మరోవైపు, విమానాల్లో ఇంధనంగా ఉపయోగించే ఏవియేషన్ టర్బైన్ ఫ్యూయల్-ఏటీఎఫ్ ధరను చమురు సంస్థలు కిలోలీటరుకు రూ.1401.37 మేర తగ్గించాయి. ప్రస్తుతం దిల్లీలో ఒక కిలోలీటరు ఏటీఎఫ్ ధర రూ.90,455.47గా ఉంది.
నోట్ : ప్రభుత్వ రంగ చమురు సంస్థలైన ఇండియన్ ఆయిల్ కార్పొరేషన్ (ఐఓసీ), భారత్ పెట్రోలియం కార్పొరేషన్ లిమిటెడ్ (బీపీసీఎల్), హిందూస్థాన్ పెట్రోలియం కార్పొరేషన్ (హెచ్పీసీఎల్)లు - బెంచ్మార్క్ ఇంటర్నేషనల్ ఫ్యూయెల్, ఫారిన్ ఎక్స్ఛేంజ్ రేట్ ఆధారంగా, ప్రతినెలా వంట గ్యాస్ ధరలు, ఏటీఎఫ్ ధరలను సవరిస్తూ ఉంటాయి.
స్థిరంగా పెట్రోల్, డీజిల్ ధరలు
ప్రస్తుతం పెట్రోల్, డీజిల్ ధరలు స్థిరంగా ఉన్నాయి. సార్వత్రిక ఎన్నికలకు ముందు అంటే మార్చి నెల మధ్యలో లీటర్ పెట్రోల్పై రూ.2 వరకు తగ్గించారు. అప్పటి నుంచి ఇప్పటి వరకు అవే ధరలు కొనసాగుతున్నాయి. ప్రస్తుతం దిల్లీలో లీటర్ పెట్రోల్ ధర రూ.94.72, లీటర్ డీజిల్ ధర రూ.87.62గా ఉంది.
గ్యాస్ సిలిండర్ ధరలను ఎక్కడ చెక్ చేయాలి?
ఎల్ పీజీ సిలిండర్ అసలు ధరలను తెలుసుకోవాలనుకుంటే ఇండియన్ ఆయిల్ అధికారిక వెబ్సైట్ https://iocl.com/prices-of-petroleum-productsలో చూడవచ్చు. ఇదే వెబ్సైట్లో ఎల్పీజీ ధరలతోపాటు, జెట్ ఫ్యూయెల్, ఆటో గ్యాస్, కిరోసిన్ మొదలైన ఇంధనాల ధరలను కూడా తెలుసుకోవచ్చు.
