Hyderabad Tops In IT Job Postings : దేశంలో ఐటీ రంగంలో కొత్త నియామకాలు నెమ్మదిస్తున్నా, హైదరాబాద్ మాత్రం జోరు కొనసాగిస్తోంది. ఏప్రిల్లో హైదరాబాద్లో 41.5 శాతం ఐటీ నియామకాలు పెరిగాయి. ఈ మేరకు ఇండీడ్ అనే ఆన్లైన్ జాబ్ సెర్చింగ్ సంస్థ ఓ నివేదిక విడుదల చేసింది. దీని ప్రకారం హైదరాబాద్ తర్వాతి స్థానంలో బెంగళూరు ఉంది. ఇక్క 24 శాతం ఐటీ నియామకాలు పెరిగినట్లు ఇండీడ్ తన నివేదికలో పేర్కొంది. ఐటీ నిపుణుల కోసం అగ్ర గమ్యస్థానాలుగా, ఈ నగరాలకు పెరుగుతున్న ప్రాధాన్యాన్ని ఇండీడ్ నివేదిక ప్రతిబింబిస్తోంది.
ఇండీడ్ వెబ్సైట్ జాబ్ క్లిక్లలో కూడా హైదరాబాద్, బెంగళూరు గణనీయమైన వృద్ధి సాధించాయి. హైదరాబాద్లో పనిచేసేందుకు 161 శాతం ఉద్యోగార్థులు ఆసక్తి కనబర్చారు. ఇక బెంగళూరుపై 80శాతం మంది ఆసక్తి చూపినట్లు నివేదిక పేర్కొంది. అయితే ప్రపంచ ఆర్థిక పరిస్థితి, అనిశ్చితి కారణంగా నియామకాలు చేపట్టేందుకు ఐటీ కంపెనీలు ఆకస్తి చూపించడం లేదని తెలిపింది. ఈ కారణాల వల్ల దేశవ్యాప్తంగా ఐటీ రిక్రూట్మెంట్స్ 3.6శాతం తగ్గుముఖం పట్టాయని ఇండీడ్ వెల్లడించింది.
అంతేకాకుండా ఏపీఐ, జావాస్క్రిప్ట్, ఎస్క్యూఎల్, అజైల్ వంటి సాంకేతికతల్లో నియామకాలు ఎక్కువగా జరుగుతున్నాయని తెలిపింది. ఇప్పటికే ఈ రంగంలో పనిచేస్తున్న వారే కాకుండా, కొత్త కెరీర్ అవకాశాల కోసం చూస్తున్న వ్యక్తులు కూడా ఉద్యోగాల కోసం వెతుకున్నట్లు ఇండీడ్ ఇండియా సేల్స్ హెడ్ శశి కుమార్ తెలిపారు. 'తొలగింపులు ఉన్నప్పటికీ, ఐటీ ఉద్యోగాలకు చాలా మంది ఆకర్షితులవుతున్నారు. నైపుణ్యం, శిక్షణ, అనుభవం కారణంగా కూడా ఐటీపై ఎక్కువ ఇంట్రెస్ట్ చూపిస్తున్నారు.' అని శశి పేర్కొన్నారు.
ఏఐ స్కిల్ ఉంటే 50% అధిక వేతనం!
ప్రస్తుతం ఏఐ సాంకేతికత అన్ని రంగాలను డామినేట్ చేస్తోంది. ముఖ్యంగా ఐటీ రంగంలో దీని వినియోగం క్రమంగా పెరుగుతోంది. ఈ క్రమంలో కంపెనీలు కూడా ఏఐ నైపుణ్యం కలిగిన ఉగ్యోగార్థులకు ఎక్కువ ప్రాధాన్యం ఇస్తున్నాయి. ఇలాంటి వారికి 50శాతం అధిక వేతనం ఇవ్వడానికి కూడా వెనుకాడటం లేదు. ఈ మేరకు ఇలాంటి ట్రెండ్లను ఎప్పటికప్పుడు ఫాలో అయ్యే ప్లాట్ఫామ్ లెవెల్స్.ఎఫ్వైఐ ఓ నివేదిక విడుదల చేసింది.
