Snake In Amazon Package: ప్రముఖ ఈ-కామర్స్ యాప్ అమెజాన్లో ఓ ప్రాడక్ట్ ఆర్డర్ చేసిన జంటకు భయంకరమైన అనుభవం ఎదురైంది. బెంగళూరుకు చెందిన ఓ జంట ఇటీవల అమెజాన్లో Xbox కంట్రోలర్‌ను ఆర్డర్ చేసింది. తాజాగా డెలివరీ అయిన అమెజాన్ ఆర్డర్ను విప్పడానికి ప్రయత్నించగా అందులోంచి పాము బయటకు వచ్చింది. దీంతో ఆ జంట ఒక్కసారిగా భయాందోళనకు గురైంది. అయితే ప్యాకింగ్కు ఉన్న టేప్ పాముకు చుట్టుకోవడం వల్ల అది బయటకు రాలేకపోయింది. ఈ ఘటనకు సంబంధించిన వీడియో ప్రస్తుతం సోషల్ మీడియాలో వైరల్గా మారింది.
అయితే డెలివరీ పట్ల అమెజాన్ నిర్లక్ష్యం వహించడం వల్లే తమ ప్రాణాలకు ముప్పు ఏర్పడే పరిస్థితి ఎదురైందని ఆ జంట ఆగ్రహం వ్యక్తం చేసింది. భద్రతా చర్యలను సరిగ్గా పాటించకపోవడం వల్లే ఇలా జరిగిందని తెలిపింది. అయితే దీనిపై అమెజాన్కు ఫిర్యాదు చేయగా డబ్బు రిఫండ్ చేశామని చెప్పారని కానీ, ఎలాంటి క్షమాపణలు తెలుపలేదని సదరు కస్టమర్ మండిపడ్డారు.
ఇక ఈ వీడియో వైరల్ కావడం వల్ల నెటిజన్లు సైతం దిగ్బ్రాంతి వ్యక్తం చేశారు. పలువురు నెటిజన్లు రకరకాలుగా స్పందిస్తున్నారు. 'క్యాష్ ఆన్ డెలివరీ (COD) పెడితే కోబ్రా ఆన్ డెలివరీ ఇచ్చారు', 'అమెజాన్లో ఆర్డర్ పెడితే, అమెజాన్ ఫారెస్ట్ నుంచి తీసుకొచ్చినట్లున్నారు', 'బాక్స్ విత్ పైతాన్ ప్రోగ్రామ్' అంటూ కొందరు ఫన్నీ కామెంట్స్ చేశారు. అయితే వీడియో వైరల్ అవ్వడం వల్ల అమెజాన్ స్పందించింది. ఈ ఘటనలో తమ తప్పిదానికి క్షమాపణలు కోరింది. ఆర్డర్ వివరాలు తెలిపితే ప్రాడక్ట్‌ను మళ్లీ డెలివరీ చేయడానికి సిద్ధంగా ఉన్నట్లు పేర్కొంది.
చిప్స్ ప్యాకెట్లో కప్ప!
మరోవైపు, పిల్లలు ఇష్టంగా తిందామని కొనుగోలు చేసిన చిప్స్ ప్యాకెట్లో కుళ్లిన కప్పను చూసి గుజరాత్‌కు చెందిన ఓ వ్యక్తి నిర్ఘాంతపోయాడు. జామ్‌నగర్‌కు చెందిన జాస్మిన్‌ పటేల్‌ తన నాలుగేళ్ల మేనకోడలు మంగళవారం సాయంత్రం ఓ దుకాణంలో ఆలు చిప్స్ ప్యాకెట్‌ను కొనుగోలు చేసింది. ఇంటికి వచ్చిన తర్వాత తన 9 నెలల కుమార్తె ఆ ప్యాకెట్‌లోని కొన్ని చిప్స్‌ను తిన్నట్లు ఆ వ్యక్తి చెప్పారు. అనంతరం అందులో కప్ప కళేబరాన్ని గుర్తించిన తన మేనకోడలు ఆ ప్యాకెట్‌ను నేలపై పడవేసినట్లు తెలిపారు. తనతో జరిగిన విషయం చెప్పగా మొదట నమ్మలేదని, కానీ కప్పను చూసి తాను భయానికి గురైనట్లు పటేల్‌ వెల్లడించారు. ఈ విషయంపై కేసు నమోదు చేసినట్లు చెప్పారు. ఈ ఘటనపై విచారణ చేపట్టిన అధికారులు కుళ్లిన స్థితిలో ఉన్న కప్ప కళేబరాన్ని పరీక్షల నిమిత్తం ల్యాబ్‌కు పంపినట్లు తెలిపారు.
