కప్ప శరీరంపై పుట్టగొడుగు ప్రత్యక్షం- సైన్స్​ వండర్​ అంటున్న శాస్త్రవేత్తలు!

Mushroom On Live Frog : ఓ కప్ప శరీరంపై పుట్టుగొడుగు మొలిచిన సన్నివేశం కర్ణాటకలోని బెంగళూరు గ్రామీణ జిల్లాలో కనిపించింది. దీనిని చూసిన జంతు శాస్త్రవేత్తలు ముందుగా ఆ ఫొటోలను ఏఐ సాయంతో తయారు చేశారని కొట్టిపారేశారు. అయితే ఓ అంతర్జాతీయ జర్నల్​లో కూడా ఈ పుట్టగొడుగు కప్ప గురించి కథనం ప్రచురితం అవ్వడం వల్ల అది నిజమేనని ధ్రువీకరించారు.

Mushroom On Live Frog : సాధారణంగా పుట్టగొడుగులు నేలపైన, గోడలమీద, చెట్టు మొదళ్లపైనో మొలకెత్తడం మనం చూసే ఉంటాం. కానీ, కర్ణాటక బెంగళూరు గ్రామీణ జిల్లాలోని దొడ్డబళ్లాపూర్​లో మాత్రం వింతగా ఓ కప్ప శరీరంపై మొలిచింది. ఇది చూసిన వారంతా దీనిని ఓ సైన్స్​ వండర్​గా పేర్కొంటున్నారు. అయితే ఈ ఆశ్చర్యాన్ని తొలిసారి ప్రపంచం మందుకు తీసుకువచ్చిన ఘనత వై.టీ. లోహిత్ అనే ఎంటమాలజిస్ట్​ (కీటకాల శాస్త్రవేత్త) అతడి బృందానికి దక్కుతుంది. లోహిత్​ ప్రస్తుతం వరల్డ్​ వైల్డ్​లైఫ్​ ఫండ్​ సీనియర్​ ప్రాజెక్ట్​ ఆఫీసర్‌గా పని చేస్తున్నారు.

కప్ప శరీరంపై మొలకెత్తిన తెల్లటి పుట్టగొడుగు

బంగారపు కప్పపై తెల్లటి పుట్టగొడుగు
వై.టీ లోహిత్​ పక్షులు, కీటకాలు, పాములపై అధ్యయనం చేస్తుంటారు. ఇందులో భాగంగా లోహిత్​ తన బృందంలోని సభ్యులైన చిన్మయ్​ సి మాలియే, నవీన్​ అయ్యర్, బీజీ నిషా, ఎస్​ ఆశతో కలిసి కప్పలు, పాములపై పరిశోధన చేసేందుకు ఇటీవలే కర్ణాటక చిక్కమగళూరులోని కుద్రేముఖ్​ పర్వత శ్రేణిలో ఉన్న మాలా గ్రామానికి వెళ్లారు. అధ్యయనంలో భాగంగా లోహిత్​ అండ్​ టీం అక్కడ ఓ కప్పల గుంపును గమనించింది. దాదాపు 50 కప్పలున్న ఆ గుంపులో ఓ కప్ప, శాస్త్రవేత్తల బృందానికి ప్రత్యేకంగా కనిపించింది. వెంటనే దానిని స్పెషల్​ కెమెరాల్లో బంధించారు లోహిత్​. అలా క్లిక్​ చేసిన ఫొటోల్లో ఓ బంగారపు రంగు కప్ప శరీరంపై ఓ చిన్నపాటి తెల్లటి పుట్టగొడుగు మొలకెత్తడాన్ని గుర్తించారు.

కప్ప శరీరంపై వైట్ మష్రూమ్​

అక్కడ మాత్రమే కనిపించే కప్పలు
శాస్త్రీయ ప్రపంచంలో జీవులపై పుట్టగొడుగులు మొలవటం ఇదే మొదటిది. కప్పపై మొలకెత్తిన పుట్టగొడుగును మైసినా లేదా బోనెట్​ మష్రూమ్​ అని అంటారు. జంతువు, మొక్కల జాతులకు చెందని పుట్టగొడుగులు ఫంగై(శిలీంధ్రాల) క్లాస్​కు చెందినది. అలాగే గోల్డెన్​ బ్యాక్డ్ ఫ్రాగ్​లు​(బంగారపు కప్పలు) కూడా పశ్చిమ కనుమల(వెస్టెర్న్​ ఘాట్స్​)లో మాత్రమే కనిపిస్తాయి. కప్పపై మొలిచిన బోనెట్​ మష్రూమ్​ కూడా కేవలం కుళ్ళిన లేదా చెదలు పట్టిన చెక్కపైన మాత్రమే మొలుస్తుంది. అయితే సజీవంగా ఉన్న ఓ జీవిపై పుట్టగొడుగు పెరగడం సైన్స్​ ప్రపంచంలోనే మొట్టమొదటి రికార్డుగా అభివర్ణిస్తున్నారు జంతు శాస్త్రవేత్తలు.

కప్పపై మొలిచిన పుట్టగొడుగు

"కొన్ని శిలీంధ్రాలు(ఫంగైలు) ఉభయచరాలలో వ్యాధులకు కారణమే కాకుండా మరణానికి దారితీస్తాయి. సాధారణంగా కీటకాలు, సాలెపురుగులలో ఇలాంటి సమస్యలు వస్తుంటాయి. అయితే, జీవించి ఉన్న కప్పపై మొలిచిన ఈ మష్రూమ్​కు సంబంధించిన ఫంగస్​పై లోతైన శాస్త్రీయ పరిశోధనలు జరగాల్సి ఉంది. ఇప్పుడే దీనికి గల కచ్చితమైన కారణాలను చెప్పలేము. అధ్యయనాల తర్వాత మరింత స్పష్టత రావచ్చు."
- వై.టీ లోహిత్​, ఎంటమాలజిస్ట్​

ఏఐ మాయ అనుకున్నారంతా
కప్పపై మొలకెత్తిన పుట్టగొడుగు ఫొటోలను మొదట గమనించిన శాస్త్రవేత్తలు, పర్యావరణవేత్తలు దానిని కృత్రిమ మేథ(ఏఐ) సాయంతో లేదా ఫొటోషాప్​లో తయారు చేసిన చిత్రాలుగా భావించారు. అయితే దీనికి సంబంధించి ఓ కథనం అంతర్జాతీయ జర్నల్​ రెప్టైల్స్ అండ్​ ఆంఫిబియన్స్‌లో ప్రచురిచతం కావడం, అంతేకాకుండా iNaturalist, ఇండియా బయోడైవర్సిటీ పోర్టల్​లు కూడా ధ్రువీకరించడం వల్ల జంతు శాస్త్రవేత్తలు ఈ అద్భుతం నిజమేనని తేల్చారు.

వై.టీ లోహిత్- ఎంటమాలజిస్ట్​, కప్పపై పుట్టుగొడుగును గుర్తించిన వ్యక్తి ​