Karnataka CM Post Issue : కర్ణాటక ముఖ్యమంత్రి పదవి వివాదం మరోసారి తెరపైకి వచ్చింది. ముగ్గురు ఉప ముఖ్యమంత్రుల నియామకానికి సంబంధించి ఆ రాష్ట్ర కాంగ్రెస్ పార్టీలోని నేతల మధ్య మాటల యుద్ధం తీవ్రమైంది. ఈ క్రమంలోనే కర్ణాటక సీఎం స్థానాన్ని తమ వర్గం వారికే ఇవ్వాలని డిమాండ్లు వ్యక్తమవుతున్నాయి. ముఖ్యమంత్రి స్థానాన్ని లింగాయతలకు ఇవ్వాలని కొందరు మఠాధిపతులు డిమాండ్ చేస్తున్నారు. అలాగే సీఎం పదవిని డీకే శివకుమార్కు కేటాయించాలని విశ్వ ఒక్కలిగర పీఠాధిపతి చంద్రశేఖరనాథ స్వామి నేరుగా సిద్ధరామయ్యకే సూచించారు. ఇప్పటి వరకు దళితులకు ముఖ్యమంత్రిగా అవకాశం దక్కలేదని, ఈసారి వారికే పదవి ఇవ్వాలని మాజీ మంత్రి నరేంద్రస్వామి కొత్త వాదనను తెరపైకి తీసుకువచ్చారు.
మరోవైపు గ్యారంటీలతో అభివృద్ధి పనులు నిలిచిపోయాయని, మహర్షి వాల్మీకి షెడ్యూలు కులాలు, తెగల అభివృద్ధి కార్పొరేషన్‌ అక్రమాలు, పాలు, ఇంధన ధరల పెంపును ప్రధాన అస్త్రాలుగా చేసుకుని బీజేపీ, దళ్‌ ప్రభుత్వంపై పోరును కొనసాగిస్తున్నాయి. దీంతో ముఖ్యమంత్రి మార్పు, ఉప ముఖ్యమంత్రుల సంఖ్య పెంపు విమర్శలు పార్టీ అధిష్ఠానానికి తలనొప్పిగా మారింది. ముఖ్యమంత్రి సిద్ధరామయ్య వర్గపు నేతలుగా గుర్తింపు పొందిన వారే ఈ వివాదాన్ని రాజేస్తున్నారని ఉప ముఖ్యమంత్రి డీకే శివకుమార్ తన సన్నిహితుల వద్ద ఆక్రోశాన్ని వ్యక్తం చేశారు. ఈ విషయం గురించే మల్లికార్జున ఖర్గేతో భేటీ అయి వివరించారు. సిద్ధరామయ్యకు సన్నిహితంగా ఉండే ఎంబీ పాటిల్, నరేంద్ర స్వామి, జమీర్‌ అహ్మద్‌ ఖాన్, రాజణ్ణ తదితరులే ముగ్గురు ఉపముఖ్యమంత్రుల అంశాన్ని తెరపైకి తీసుకు వచ్చారని ఆరోపించారు. పార్టీ సీనియర్ నాయకులు సోనియా, రాహుల్‌లతో చర్చించి, వివాదాన్ని పరిష్కరిస్తానని శివకుమార్కు ఖర్గే భరోసా ఇచ్చి పంపించారు.
ఒక పదవిని వదులుకోవాలి
కర్ణాటక ప్రదేశ్‌ కాంగ్రెస్ సమితికి డీకే శివకుమార్ అధ్యక్షుడిగా, ఉప ముఖ్యమంత్రిగానూ కొనసాగుతున్నారు. రెండు పదవుల్లో ఒకదాన్ని వదులుకోవాలని శివకుమార్కు హోం శాఖ మంత్రి డాక్టర్‌ జి పరమేశ్వర్‌ పరోక్షంగా చెప్పారు. మంత్రి పదవిని నిర్వహిస్తున్న సమయంలో పార్టీని సమన్వయం చేసుకోవడం సాధ్యం కాదన్నారు. కర్ణాటకలో అత్యధిక సమయం కేపీసీసీ అధ్యక్షుడిగా బాధ్యతలు వహించిన తనకు సమన్వయానికి సంబంధించిన సమస్యలపై పూర్తి అవగాహన ఉందన్నారు. అదనపు ఉప ముఖ్యమంత్రుల నియామకానికి సంబంధించి తాను ఒకసారి కూడా పార్టీ పెద్దల వద్ద మాట్లాడలేదన్నారు. ఏ సమయంలో ఏ నిర్ణయం తీసుకోవాలో ఇక్కడి నేతల కన్నా, అధిష్ఠానానికే బాగా తెలుసని అన్నారు. ముఖ్యమంత్రిగా అవకాశం వస్తే మినహా తానే కేపీసీసీకి అధ్యక్షుడిగా కొనసాగాలని శివకుమార్ కోరుకుంటున్నారు. శివకుమార్‌ను ఉప ముఖ్యమంత్రిగా కొనసాగించి, ఎంబీ పాటిల్ లేదా సతీశ్‌ జార్ఖిహొళి ఆ స్థానాన్ని దక్కించుకునేందుకు తమ వంతు ప్రయత్నాలు చేస్తున్నారు. ఒక వేళ ఆ స్థానం ఖాళీ అయితే దాన్ని తన ఆప్తుడు డాక్టర్‌ హెచ్‌సీ మహదేవప్పకే దక్కేలా ముఖ్యమంత్రి సిద్ధరామయ్య పావులు కదుపుతున్నారు.
హై మాత్రమే ఉంది, కమాండ్‌ లేదు
కాంగ్రెస్‌లో కేవలం 'హై' మాత్రమే ఉందని, పార్టీ నేతలపై ఎవరికీ 'కమాండ్‌' లేదని కేంద్ర మంత్రి ప్రహ్లాద్‌ జోషి హుబ్బళ్లిలో అన్నారు. అధికార పార్టీ వైఫల్యాలు, అవినీతి ఆరోపణలు, ధరల పెంపును కూడా ఆ పార్టీ అధిష్ఠానం ప్రశ్నించలేకపోతోందని వ్యాఖ్యానించారు. ముగ్గురు డీసీఎంలు అవసరమని వస్తున్న డిమాండ్ల వెనుక ముఖ్యమంత్రి సిద్ధరామయ్య ఉన్నారని తెలిసినా, స్పందించేందుకు ప్రతి ఒక్కరూ భయపడుతున్నారని తెలిపారు. ఈ వివాదాలతోనే పాలన పూర్తిగా దారి తప్పిందని ఆరోపించారు. ఎమ్మెల్యేలు, మంత్రులపై సిద్ధరామయ్య, డీకే శివకుమార్ పట్టుకోల్పోయారని ఎంపీ, మాజీ ముఖ్యమంత్రి జగదీశ్‌ శెట్టర్‌ హుబ్బళ్లిలో వ్యాఖ్యానించారు. ఈ వివాదమే తీవ్రమై ప్రభుత్వం పతనం అవుతుందని జోస్యం చెప్పారు.
