హోటల్ స్టైల్ క్రిస్పీ రవ్వ దోశ - ప్రిపరేషన్​ వెరీ ఈజీ- పల్లీ చట్నీతో తింటే టేస్ట్ వేరే లెవల్! - Hotel Style Crispy Rava Dosa Recipe

Hotel Style Crispy Rava Dosa Recipe :దోశ.. బ్రేక్​ఫాస్ట్​లో ఎక్కువ మంది ఇష్టపడే టిఫెన్స్​లో ఇదీ ఒకటి. అయితే, చాలా మంది డైలీ ఇంట్లో ప్లెయిన్ దోశ, ఆనియన్ దోశ వంటివి తింటుంటారు. మరికొందరు హోటల్​కి వెళ్లినప్పుడు రవ్వ దోశ, ఎగ్ దోశ వంటివి టేస్ట్ చేస్తుంటారు. అయితే ఇకపై రవ్వ దోశ కోసం హోటల్​కు వెళ్లే అవసరం లేకుండా.. ఇంట్లోనే ప్రిపేర్ చేసుకోవచ్చు! టేస్ట్ అద్దిరిపోతుంది!

How To Make Hotel Style Crispy Rava Dosa : మనలో ఎక్కువ మందికి టిఫెన్లలో మొదటగా గుర్తొచ్చేది.. దోశ. చాలా మందికి ఇది ఫేవరెట్​ బ్రేక్​ఫాస్ట్​ కూడా. పేరు వింటేనే నోట్లో నీళ్లూరిపోయే ఈ సౌత్‌ ఇండియన్‌ స్పెషల్‌ టిఫెన్‌కి.. బయట టిఫిన్​ సెంటర్లు, హోటల్స్​లోనూ మంచి గిరాకీ ఉంటుంది. అంతేకాదు.. హోటల్స్​లో రకరకాల వెరైటీ దోశలు అందుబాటులో ఉంటాయి. అందులో.. రవ్వ దోశ ఒకటి. హోటల్స్​లో రవ్వ దోశ టేస్ట్ సూపర్​గా ఉంటుంది. అలాగని ప్రతిరోజూ బయటకు వెళ్లి తినలేం కదా! అందుకే.. మీకోసం ఇంట్లోనే ఈజీగా ప్రిపేర్ చేసుకునేలా హోటల్ స్టైల్ రవ్వ దోశ రెసిపీని తీసుకొచ్చాం. క్రిస్పీ క్రిస్పీగా ఉండే ఈ దోశ(Dosa) రుచి సూపర్​గా ఉంటుంది! మరి, ఇంకెందుకు ఆలస్యం మీరూ ఓసారి ట్రై చేయండి.

కావాల్సిన పదార్థాలు :

• బొంబాయి రవ్వ - కప్పు
• బియ్యప్పిండి - కప్పు
• మైదా - అర కప్పు
• పెరుగు - అర కప్పు
• జీలకర్ర - టీస్పూను
• మిరియాల పొడి - ఒక చెంచా
• ఉప్పు - తగినంత
• సన్నగా తరిగిన ఉల్లిపాయలు - 2 టేబుల్‌స్పూన్లు
• పచ్చిమిర్చి తురుము - 2 టీస్పూన్లు
• అల్లంతురుము - టీస్పూను
• కొత్తిమీర తరుగు - 2 టేబుల్‌స్పూన్లు
• నూనె - కొద్దిగా
• నీళ్లు - సరిపడా

రవ్వ దోశ తయారీ విధానం :

• ముందుగా ఒక బౌల్​లో పైన చెప్పిన విధంగా బొంబాయి రవ్వ, బియ్యప్పిండి, మైదా, పెరుగు, జీలకర్ర, మిరియాల పొడి, రుచికి సరిపడా ఉప్పు వేసి కలుపుకోవాలి.
• ఆ తర్వాత కొద్దికొద్దిగా వాటర్​ పోసుకుంటూ పిండిని ఉండలు లేకుండా బాగా కలుపుకోవాలి.
• అనంతరం సన్నగా తరిగిన ఉల్లిముక్కలు, కొత్తిమీర తురుము, పచ్చిమిర్చి తురుము, అల్లంతురుము కూడా అదే మిశ్రమంలో వేసి మిక్స్ చేసుకోవాలి.
• ఇలా అన్నీ వేసి మిక్స్ చేసుకున్న తర్వాత అవసరమైతే మరికాసిని నీళ్లు పోసి మిశ్రమాన్ని పలుచగా ఉండేలా చూసుకోవాలి. ఆపై దాన్ని ఓ అరగంట పక్కన పెట్టుసుకోవాలి.
• ఆ తర్వాత.. స్టౌ మీద దోశ పెనం పెట్టుకొని పెనం బాగా హీట్ అయ్యాక.. కాస్త ఆయిల్ వేసి పెనమంతా స్ప్రెడ్ చేసుకోవాలి.
• అప్పుడు ముందుగా ప్రిపేర్ చేసుకుని పెట్టుకున్న దోశ పిండి మిశ్రమాన్ని పెనంపై దోశలా పోసుకోవాలి. ఆపై కాస్త నూనె చల్లుకొని గోధుమరంగు వచ్చేంత వరకు ఒకవైపు కాల్చుకోవాలి. అలాగే రెండోవైపు మామూలుగా కాల్చుకోవాలి.
• అలా కాల్చుకున్నాక పల్చటి అట్లకాడతో దోశ ఏమాత్రం ముక్కలు కాకుండా జాగ్రత్తగా ప్లేట్​లోకి తీసుకోవాలి. అంతే.. క్రిస్పీ, క్రిస్పీగా ఉండే నోరూరించే హోటల్ స్టైల్ దోశ రెడీ! ఆపై దాన్ని పల్లీ చట్నీతో హ్యాపీగా తినొచ్చు.