How to Prepare Drumstick Biryani : మనలో చాలా మంది బిర్యానీ అంటే ఎంతో ఇష్టంగా తింటారు. ఇక బిర్యానీ ప్రియుల గురించి ప్రత్యేకంగా చెప్పాల్సిన పని లేదు. రకరకాల రుచుల్లో దొరికే బిర్యానీలను బయటి నుంచి కొని తెచ్చుకొని మరీ టేస్ట్ చేస్తుంటారు. అయితే, ప్రస్తుతం సమ్మర్ సీజన్ కావడంతో కొంతమంది నాన్వెజ్కు దూరంగా ఉండాలనుకుంటారు. కానీ, బిర్యానీ(Biryani) తినాలనే కోరిక మాత్రం ఊరిస్తోంది. అలాంటి వారికోసం అదిరిపోయే వెజ్ బిర్యానీ తీసుకొచ్చాం. అదే.. మునక్కాయ బిర్యానీ. దీనిని ప్రిపేర్ చేసుకోవడం కూడా చాలా సులభం. పైగా సమ్మర్లో మునక్కాయలలో నీటి శాతం ఎక్కువగా ఉండటం వల్ల శరీరాన్ని డీహైడ్రేషన్‌ నుంచి కాపాడడంతో పాటు.. అలసట, వడదెబ్బ వంటి సమస్యల నుంచి రక్షిస్తుంది. అంతేకాదు.. మరికొన్ని ఆరోగ్య ప్రయోజనాలు లభిస్తాయని చెబుతున్నారు నిపుణులు. మరి, ఇంకెందుకు ఆలస్యం సమ్మర్లో మీరు కూడా ఓసారి మునక్కాయ బిర్యానీ ట్రై చేయండి!
కావాల్సిన పదార్థాలు :
- బాస్మతి రైస్ - 400 గ్రాములు
- మునక్కాయలు - 5
- పచ్చి బఠానీలు - అరకప్పు
- బిర్యానీ ఆకులు - 4
- పచ్చిమిర్చి - 6
- ఉల్లిపాయలు - 4
- టమాటాలు - 3(నార్మల్ సైజ్వి)
- లవంగాలు - 8
- యాలకులు - 4
- దాల్చిన చెక్క ముక్కలు - 2
- కారం పొడి - 1 టేబుల్ స్పూన్
- కసూరి మేతి - 1 టేబుల్ స్పూన్
- అల్లం వెల్లుల్లి పేస్ట్ - 1 1/2 టేబుల్ స్పూన్
- బిర్యానీ మసాలా - అర టీస్పూన్
- నూనె - తగినంత
- ఉప్పు - రుచికి సరిపడా
- పెరుగు, పుదీనా, కొత్తిమీర తరుగు - కొద్దిగా.
మార్కెట్లోకి మ్యాంగో వచ్చింది - వంటింట్లో జిలేబీ, పులావ్ ప్రిపేర్ చేయండి - కుమ్మేస్తారంతే!
మునక్కాయ బిర్యానీ తయారీ విధానం :
- ముందుగా మునక్కాయలను చిన్న ముక్కలుగా కట్ చేసుకొని కడిగి పక్కన పెట్టుకోవాలి.
- అలాగే ఉల్లిపాయ, పచ్చిమిర్చిని తరుక్కోవాలి. అలాగే బాస్మతి రైస్ను కాసేపు నానబెట్టుకోవాలి.
- ఇప్పుడు స్టౌ మీద ఒక బౌల్ పెట్టి అందులో ఆయిల్ పోసుకోవాలి. అది కాస్త వేడి అయ్యాక తరిగిన లవంగాలు, యాలకులు, దాల్చినచెక్క, బిర్యానీ ఆకులు వేసి వేయించుకోవాలి.
- ఆ తర్వాత దానికి పుదీనా, కొద్దిగా కొత్తిమీర తరుగు, కసూరి మేతి యాడ్ చేసుకోవాలి. ఆపై ఆ మిశ్రమంలో కట్చేసుకున్న ఉల్లిపాయ ముక్కలు, పచ్చిమిర్చి వేసుకొని బాగా మిక్స్ చేసుకోవాలి.
- ఉల్లిపాయలు మగ్గిన తర్వాత ఆ మిశ్రమంలో అల్లం వెల్లుల్లి పేస్ట్ యాడ్ చేసుకొని పచ్చి వాసన పోయేంతవరకు వేయించుకోవాలి.
- తర్వాత టమాట ముక్కలు, పచ్చి బఠానీలు, పెరుగు వేసి రెండు నిమిషాలు మగ్గనివ్వాలి.
- ఆ తర్వాత కారం, బిర్యానీ మసాలా, రుచికి సరిపడా ఉప్పు వేసుకొని బాగా కలుపుకోవాలి.
- ఇప్పుడు ముందుగా కట్ చేసి పెట్టుకున్న మునక్కాయ ముక్కలు ఆ మిశ్రమంలో వేసుకోవాలి. అవి మగ్గిన తర్వాత కొలత ప్రకారం బియ్యానికి సరిపడా వాటర్ యాడ్ చేసుకొని మూతపెట్టుకోవాలి.
- నీరు మరుగుతున్నప్పుడు నానబెట్టిన బియ్యాన్ని వడకట్టి ఆ మిశ్రమంలో వేసి కలుపుకోవాలి. ఆపై మూతపెట్టుకోవాలి. ఓ 5 నిమిషాల తర్వాత మూత తీసి మరోసారి మిక్స్ చేసుకోవాలి.
- ఆ తర్వాత మూత పెట్టుకొని మీడియం ఫ్లేమ్ మీద ఉడికించుకోవాలి. బిర్యానీ రెడీ అయ్యింది అనుకున్నప్పుడు దానిపై కొద్దిగా కొత్తిమీర చల్లుకుని స్టవ్ ఆఫ్ చేయాలి. అంతే.. నోరూరించే టెస్టీ మునక్కాయ బిర్యానీ సిద్ధం!
