Carrot Cake Pancakes Recipe : పాన్‌ కేక్స్‌ అంటే చాలా మందికి ఇష్టం ఉంటుంది. వీటిని చిన్నపిల్లల దగ్గర నుంచి పెద్దల వరకు అందరూ మహా ఇష్టంగా తింటారు. ఇక ఈ పాన్‌ కేక్‌లను ప్రతిసారి బయట దుకాణాల నుంచి తెచ్చుకుంటున్నారా? అయితే ఈసారి అలాకాకుండా మీరే ఇంట్లోనే ఒకసారి క్యారెట్‌లతో వీటిని ట్రై చేయండి. క్యారెట్‌లను నేరుగా తినడం ఇష్టంలేని పిల్లలకు ఈ విధంగా చేసి పెట్టారంటే మళ్లీ మళ్లీ చేయమని తప్పకుండా అడుగుతారు. అలాగే క్యారెట్‌లతో పాటు ఇందులో ఓట్స్‌ పిండి కూడా కలపడం వల్ల ఆరోగ్యానికి ఎంతో మేలు జరుగుతుంది. ఇంతకీ ఈ క్యారెట్ పాన్‌కేక్స్‌ను ఎలా తయారు చేసుకోవాలో ఇప్పుడు తెలుసుకుందాం..
క్యారెట్ పాన్‌ కేక్ తయారుచేసుకోవడానికి కావాల్సిన పదార్థాలు..
- 250 గ్రాముల ఓట్స్‌ పిండి
- 1/4 టీస్పూన్ బేకింగ్ సోడా
- టీస్పూన్ దాల్చినచెక్క పొడి
- 1/4 టీస్పూన్ జాజికాయ పొడి
- 2 టేబుల్ స్పూన్ల కొబ్బరి నూనె
- 1 గుడ్డు
- 1/2 టీస్పూన్ ఉప్పు
- 1 టీస్పూన్ బేకింగ్ పౌడర్
- 1/4 టీస్పూన్ ఎండిన అల్లం పొడి
- 180 ml బాదం పాలు
- 1 టేబుల్ స్పూన్ మపుల్ సిరప్
- 120 గ్రా క్యారెట్ తురుము
( పైన తెలిపిన పదార్థాలు నలుగురికి పాన్కేక్లు తయారు చేయడానికి సరిపోతాయి.)
పాన్‌కేక్‌ తయారు చేసుకునే విధానం..
- ముందుగా ఒక గిన్నెలో కోడి గుడ్డు పగలగొట్టి బాగా కలుపుకోవాలి. అనంతరం ఆ మిశ్రమంలో ఓట్స్‌ పిండి, బేకింగ్ సోడా, బేకింగ్ పౌడర్, దాల్చినచెక్క పొడి, అల్లం పొడి, జాజికాయ పొడిని కలుపుకుని బాగా మిక్స్‌ చేసుకోవాలి.
- ఆ తర్వాత అందులోకి తరిగిన క్యారెట్ తురుమును యాడ్ చేసి బాగా కలుపుకోవాలి.
- ఇప్పుడు దాంట్లో బాదం పాలను పోసుకొని మళ్లీ మిశ్రమాన్ని బాగా మిక్స్‌ చేసుకోవాలి. ఇప్పుడు దానికి సరిపడినంత ఉప్పును యాడ్ చేసుకోవాలి.
- అనంతరం స్టౌవ్‌పై ఒక పాన్‌ను పెట్టండి. అది వేడయ్యాక కొబ్బరి నూనెను కొద్దిగా పాన్‌కు అప్లై చేయాలి.
- ఇప్పుడు రెడీ చేసుకున్న మిశ్రమాన్ని కొద్దిగా గరిటెతో తీసుకుని చిన్న పాన్కేక్లు వచ్చే విధంగా పాన్‌పై వేసుకోవాలి. అలా కొద్దిసేపు ఒక సైడ్‌ కాలిన తర్వాత మరోవైపునకు కొద్దిగా బ్రౌన్‌ కలర్‌ వచ్చే విధంగా కాల్చుకోవాలి.
- ఇలా మిశ్రమాన్నంతా చిన్న చిన్న కేక్‌లుగా చేసుకున్న తర్వాత.. వాటిపై మపుల్ సిరప్‌ను చల్లుకోవాలి. అంతే ఎంతో టేస్టీగా ఉండే క్యారెట్ పాన్కేక్స్ రెడీ!
- ఇక వీటిని బ్రేక్‌ఫాస్ట్‌లో తినడం వల్ల తొందరగా ఆకలి కాకుండా ఉంటుంది.
- అలాగే ఓట్స్‌లో ఉండే ఫైబర్‌ రోజంతా ఉత్సాహంగా ఉండటానికి ఎంతో సహాయపడుతంది. మరి ఇంకెందుకు ఆలస్యం మీరు కూడా ఓసారి ఈ హెల్దీ రెసిపీని ట్రై చేయండి.
కోడి గుడ్డుతో 10 వెరైటీ రెసిపీస్ - మీరు ఎప్పుడూ టేస్ట్ చేయని రకాలు!
How to Prepare Gongura Mutton Curry : గోంగూర మటన్ కర్రీ ఇలా ట్రై చేయండి.. ఎవరైనా ఫిదా అయిపోతారు!
