Leopard video: 6அடி உயர கேட்டை அசால்ட்டாக தாவி ஓடிய சிறுத்தை! வெளியான வீடியோ - அச்சத்தில் கிராம மக்கள்!

ஈரோடு: தாளவாடி அருகே தோட்டத்து கேட்டை தாவி குதித்து ஓடிய சிறுத்தையால் விவசாயிகள் அச்சமடைந்துள்ளனர். ஈரோடு மாவட்டம் சத்தியமங்கலம் புலிகள் காப்பகம், தாளவாடி வனச்சரகத்தில் சிறுத்தைகள் எண்ணிக்கை அதிகரித்துள்ளது. வனத்தில் இருந்து வெளியேறும் சிறுத்தைகள் அவ்வபோது விவசாய தோட்டத்துக்குள் புகுந்து ஆடு, மாடு மற்றும் காவல் நாய்களை வேட்டையாடுவது தொடர் கதையாகி வருகிறது.

இந்த நிலையில் தாளவாடி வனத்தை ஒட்டியுள்ள ராமாபுரம் கிராமத்திற்குள் இரவில் புகுந்த சிறுத்தை அங்கும் இங்குமாக நடமாடியது. கால்நடைகளை தேடி அலைந்த நிலையில் சாலையை கடக்க முயன்றுள்ளது. அப்போது அவ்வழியாக வந்த வாகன ஓட்டிகள் சிறுத்தை நிற்பதை பார்த்து காரை நிறுத்தி சிறுத்தையை வீடியோ எடுத்துள்ளனர்.

கார் ஹெட் லைட் வெளிச்சத்தில் சிறுத்தையை படம் பிடித்த போது 6 அடி உயர இரும்பு கேட்டை தாவி குதித்து தோட்டத்துக்குள் புகுந்தது. இந்த வீடியோ சமூக வலைதளத்தில் வெளியாகி வைரலாகி வருகிறது. இதையடுத்து அப்பகுதி மக்கள் இரவு நேரத்தில் வெளியே வரவேண்டாம் என வனத்துறையினர் எச்சரித்துள்ளனர்.