கோத்தகிரியில் குடியிருப்புக்குள் நுழைந்த சிறுத்தை.. பொதுமக்கள் அச்சம்!

நீலகிரி: கோத்தகிரி அருகே அதிகாலை நேரத்தில் குடியிருப்பு பகுதியில் நுழைந்த சிறுத்தையால் அப்பகுதி 
மக்கள் அச்சமடைந்துள்ளனர்.

நீலகிரி மாவட்டம், கோத்தகிரி மற்றும் அதன் சுற்று வட்டாரப் பகுதிகளில் கடந்த சில மாதங்களாக வனவிலங்குகள் நடமாட்டம் அதிரித்து வருகிறது. இதனால் இங்கு வசிக்கும் குடியிருப்புவாசிகள் ஒருவித அச்சத்துடனேயே வசித்து வருகின்றனர். இந்நிலையில், குடியிருப்பு பகுதியில் சிறுத்தை நுழைந்துள்ள சம்பவம் மேலும் அச்சத்தை ஏற்படுத்தியுள்ளது.

கோத்தகிரி அருகே, அரவேனு பெரியார் நகர் குடியிருப்புக்குள் நுழைந்த சிறுத்தை, தொடர்ந்து அப்பகுதியில் உலா வந்த வண்ணம் உள்ளது. அந்த காட்சி அங்குள்ள வீட்டில் பொருத்தப்பட்டுள்ள சிசிடிவி கேமராவில் பதிவாகியுள்ளது. இதனால் கிராம மக்கள் அச்சம் அடைந்துள்ளனர். மேலும், இரவு நேரத்தில் வெளியே நடந்து செல்லும்போது சிறுத்தை தாக்கி விடும் என்ற அச்சம் காரணமாக வீட்டில் முடங்கிக் கிடக்கும் நிலை ஏற்பட்டு உள்ளதாக அப்பகுதி மக்கள் குற்றம் சாட்டுகின்றனர்.

எனவே, சிறுத்தை தாக்கி பொதுமக்களுக்கு ஏதேனும் அசம்பாவிதங்கள் ஏற்படும் முன், சிறுத்தையை கூண்டு வைத்து பிடித்து அடர்ந்த வனப்பகுதியில் விட வனத்துறையினர் நடவடிக்கை எடுக்க வேண்டும் என பொதுமக்கள் கோரிக்கை விடுத்துள்ளனர்.