வாஷிங்டன்: அமெரிக்க அதிபர் தேர்தலில் வாக்காளர்களின் மனநிலையை சீர்குலைக்கும் விதத்தில் ரஷ்யா மற்றும் ஈரான் திட்டமிட்டு பிரசாரங்களை மேற்கொண்டு வருகின்றன என்று அமெரிக்கா பகிரங்கமாக குற்றம்சாட்டியுள்ளது.
ஒட்டுமொத்த உலகமே ஆவலுடன் எதிர்பார்த்திருக்கும் அமெரிக்க அதிபர் பொதுத் தேர்தல் வாக்குப்பதிவு இன்று நடைபெறுகிறது. இந்தத் தேர்தலில் முன்னாள் அதிபரும், குடியரசுக் கட்சியின் அதிபர் வேட்பாளருமான டொனால்ட் ட்ரம்புக்கும், அமெரிக்க துணை அதிபரும், ஜனநாயகக் கட்சியின் அதிபர் வேட்பாளருமான கமலா ஹாரீஸுக்கும் இடையே கடும் போட்டி நிலவுகிறது. இப்போட்டியில் வெல்லப் போவது யார்? உலகின் மிகப்பெரிய வல்லரசு நாட்டின் அடுத்த அதிபர் யார்? என்ற கேள்விகளுக்கான விடை விரைவில் தெரிந்துவிடும்.
இந்த நிலையில், இன்று நடைபெறும் தேர்தலில் வாக்காளர்களின் மனநிலையை சீர்குலைக்கும் நோக்கில் ரஷ்யா, ஈரான் ஆகிய நாடுகள் திட்டமிட்டு பொய் பிரசாரங்களை செய்து வருவதாக அமெரிக்க அரசு முகமைகள் மற்றும் தேர்தல் பாதுகாப்பு பணிகளை மேற்கொண்டு வரும் முகமைகள் கூட்டாக குற்றம்சாட்டி உள்ளன.
இதையும் படிங்க: H1-B: ஐடி வேலைக்காக அமெரிக்க செல்வது கடினம் - டிரம்ப் வென்றால் இது நடக்கும்?
இதுகுறித்து இம்முகமைகள் வெளியிட்டுள்ள அறிக்கையில், 'வெற்றி, தோல்வியை தீர்மானிப்பதில் இழுபறி நிலவும் மாகாணங்களில் அமெரிக்க தேர்தல் அதிகாரிகள் தில்லுமுல்லு செய்ய திட்டமிட்டுள்ளதாக ரஷ்யாவைச் சேர்ந்த நடிகர்கள் சிலர், தங்களது சமூக வலைதள பக்கங்களில் சமீபத்தில் பதிவிட்டிருந்தனர். அமெரிக்க தேர்தல் வாக்குப்பதிவு முறையில் சந்தேகத்தை கிளப்பும் நோக்கில் வெளிநாட்டு நடிகர்கள் இதுபோன்ற விஷம பிரச்சாரங்களை மேற்கொண்டுள்ளனர்' என்று அந்த அறிக்கையில் குறிப்பிடப்பட்டுள்ளது.
இதனிடையே, ரஷ்யாவுடன் தொடர்பில் உள்ள செல்வாக்குமிக்க நடிகர்கள், அமெரிக்க அதிபர் தேர்தலின் சட்டப்பூர்வதன்மையை குறைத்து மதிப்பிடும் நோக்கில் இதுபோன்ற பிரச்சார முயற்சிகளை முன்னெடுக்கின்றனர் என்று அமெரிக்க உளவுத் துறை அதிகாரிகள் குற்றம்சாட்டியுள்ளனர்.
