சென்னை: மனிதனின் அடிப்படை தேவைகளாக உணவு, உடை, இருப்பிடம் இருந்த நிலையில், தற்போது செல்போன், ஃபிரிட்ஜ், டிவி போன்றவையும் அதில் அடங்கிவிட்டன. தற்போது ஃபிரிட்ஜ் இல்லாத வீடுகளே இல்லை. எந்ததெந்த பொருட்களை ஃபிரிட்ஜில் வைக்கலாம் எந்தெந்த பொருட்களை ஃபிரிட்ஜில் வைக்கக்கூடாது என்ற விழிப்புணர்வு இல்லாமல் எல்லா உணவுப்பொருட்களையும் ஃபிரிட்ஜில் வைக்க துவங்கி விட்டனர்.
தேநீர் முதல் 3 நாட்களுக்கு முன் சமைத்த உணவு வகைகள், பழங்கள், காய்கறிகள் என எல்லாவற்றையும் ஃபிரிட்ஜில் வைக்க துவங்கிவிட்டனர். ஆனால் எல்லா உணவுப்பொருட்களையும் ஃபிரிட்ஜில் வைப்பது ஆபத்தானது என்று உங்களுக்கு தெரியுமா?.. ஃபிரிட்ஜில் வைப்பதால் சில உணவுப்பொருட்களில் உள்ள ஊட்டச்சத்துக்கள் குறையும் என நிபுணர்கள் கூறுகின்றனர். அப்படி எந்தெந்த உணவுப்பொருட்களை ஃபிரிட்ஜில் வைக்கக் கூடாது, அவ்வாறு சேமித்து வைத்தால் அதனால் ஏற்படும் தீமைகள் என்ன என்பதைப் பார்க்கலாம்.
வாழைப்பழம் (Banana): வாழைப்பழங்களை ஃபிரிட்ஜில் வைத்தால் அவை கருப்பு நிறமாக மாறிவிடும். மேலும் அவற்றின் சுவையும் குறைந்துவிடும். ஆகையால் வாழைப்பழங்களை ஃபிரிட்ஜில் வைக்கக்கூடாது. வாழைப்பழங்களை அறை வெப்பநிலையில் வெளியில் வைப்பது சிறந்தது.
பூண்டு (Garlic): பூண்டை குளிர்ந்த வெப்பநிலையில் வைத்தால், அவற்றில் பூஞ்சைகள் ஏற்படும் அபாயம் உள்ளது. ஆகையால் பூண்டை ஃபிரிட்ஜில் வைக்கக்கூடாது.
வெங்காயம் (Onion): வெங்காயத்தை ஃபிரிட்ஜில் வைப்பதால் அதன் இயற்கையான சுவை இழக்கப்படுகிறது. மேலும் விரைவில் அழுகிவிடும். வெங்காயத்தை காற்றோட்டமான அறையில் வைப்பது சிறந்தது.
தேன் (Honey): தேனில் அதிகளவு அமிலத்தன்மையும், குறைந்த அளவு நீர்ச்சத்தும் இருக்கும். எனவே தேனில் பாக்டீரியாக்கள் வளராது. ஆனால் தேனை ஃபிரிட்ஜில் வைக்கும் போது, அது படிகமாக மாறும். இதன் காரணமாக தேன் அதன் இயற்கையான சுவையும் பண்புகளும் மாறும்.
உருளைக்கிழங்கு (Potato): உருளைக்கிழங்கில் அதிகளவு மாவுச்சத்து உள்ளது. இதை ஃபிரிட்ஜில் வைக்கும் போது, இதில் உள்ள ஸ்டார்ச் சர்க்கரையாக மாறும். இது உடல் நலத்திற்கு கேடு விளைவிக்கும்.
தக்காளி (Tomato): பலரும் தக்காளியை ஃபிரிட்ஜில் வைத்து தான் பயன்படுத்துவர். ஆனால் அது நல்லதல்ல. தக்காளியில் ஆன்டி ஆக்ஸிடன்ட்கள் நிறைந்திருக்கும். இதை ஃபிரிட்ஜில் வைப்பதால் அதன் சுவை இழக்கக்கூடும்.
காபி கொட்டை (Coffee Bean): காபி கொட்டைகளை ஃபிரிட்ஜில் வைத்து தேவைப்படும் போது காபி தயாரித்து குடிப்பர். காபி கொட்டைகளை ஃபிரிட்ஜில் வைத்து உபயோகப்படுத்துவது, அவற்றின் சுவையை கெடுக்கும்.
இதையும் படிங்க: How long does meat last in the fridge: இறைச்சியை வாரக்கணக்குல ஃபிரிட்ஜில எடுத்து வெச்சு சாப்பிடுறீங்களா? கண்டிப்பா இத தெரிஞ்சுக்கோங்க.!
