ஓட்டப்பிடாரம் சட்டமன்ற தொகுதி திமுக செயல்வீரர்கள் கூட்டம் மங்களகிரி விலக்கு பகுதியில் இன்று நடைபெற்றது. இந்த கூட்டத்துக்கு முன்னாள் அமைச்சர் நேரு தலைமை தாங்கினார். இந்த செயல்வீரர்கள் கூட்டத்தில், நடைபெற உள்ள ஓட்டப்பிடாரம் சட்டமன்ற தொகுதி இடைத்தேர்தலில் திமுக வேட்பாளர் சண்முகையாவை 50 ஆயிரம் வாக்குகள் வித்தியாசத்தில் வெற்றி பெற செய்வதென உறுதிமொழி எடுக்கப்பட்டது.
தொடர்ந்து மதியம் 1.45 மணி அளவில் திமுக வேட்பாளர் சண்முகையா மனு தாக்கல் செய்வதற்காக ஓட்டப்பிடாரம் தாலுகா அலுவலகத்திற்கு வந்தார். அவருடன் முன்னாள் அமைச்சர் கே.என்.நேரு, தூத்துக்குடி தெற்கு மாவட்ட திமுக செயலாளர் அனிதா ராதாகிருஷ்ணன், மதிமுக மாவட்டச் செயலாளர் புதுக்கோட்டை செல்வம், காங்கிரஸ் கட்சியின் நிர்வாகி ஏ.பி.வி.சி. சண்முகம் ஆகியோர் உடனிருந்தனர்.
தொடர்ந்து அவர் ஓட்டப்பிடாரம் தாசில்தாரும், தேர்தல் நடத்தும் அதிகாரியுமான சுகுமாரிடம் தனது வேட்பு மனுவை தாக்கல் செய்தார்.
இதையடுத்து பேசிய அவர், "மதச்சார்பற்ற முற்போக்கு கூட்டணியில் திமுக வேட்பாளராக அறிவிக்கப்பட்டுள்ள நான் ஓட்டப்பிடாரம் சட்டமன்ற தொகுதி இடைத்தேர்தலில் சுமார் 50 ஆயிரம் வாக்குகள் வித்தியாசத்தில் வெற்றி பெறுவேன். நாடாளுமன்றத் தேர்தல், இடைத்தேர்தல் முடிவினை அடுத்து, திமுக தலைவர் மு.க.ஸ்டாலின் தமிழகத்தின் முதலமைச்சராக பொறுப்பேற்பார். அவருடைய வழிகாட்டுதலின் பெயரில் ஓட்டப்பிடாரம் தொகுதியில் மக்கள் நலத் திட்டப் பணிகளை நான் செய்வேன். தூத்துக்குடி நாடாளுமன்றத் தேர்தலில் வேட்பாளர் கனிமொழி சுமார் 2.50 லட்சம் வாக்குகள் வித்தியாசத்தில் அமோக வெற்றி பெறுவார்" என்றார்.
