துாத்துக்குடி துப்பாக்கிச் சூடு: முதலாமாண்டு நினைவஞ்சலி

தூத்துக்குடி: துப்பாக்கிச் சூடு சம்பவம் நிகழ்ந்து இன்றுடன் ஓராண்டு நிறைவடைந்த நிலையில், அங்குள்ள தேவாலயங்கள், கிராமங்களில் கலவரத்தில் உயிரிழந்த 13 பேருக்கு நினைவஞ்சலி செலுத்தப்படுகிறது.

தூத்துக்குடியில் இயங்கிவந்த ஸ்டெர்லைட் ஆலைக்கு எதிராக குமரெட்டியாபுரம் கிராமத்தில் மக்கள் 100 நாட்கள் போராட்டத்தை முன்னெடுத்தனர். இந்தப் போராட்டத்தில் அந்தந்தப் பகுதிகளில் இருந்த கிராம மக்கள் அனைவரும் ஒன்றிணைந்து நூறாம் நாள் போராட்ட தினமான மே 22ஆம் தேதி அன்று பனிமய மாதா ஆலயத்தில் இருந்து பேரணியாக தூத்துக்குடி மாவட்ட ஆட்சியர் அலுவலகம் வரை சென்று மாவட்ட ஆட்சியரை சந்தித்து கோரிக்கை மனு அளிப்பது என முடிவு செய்தனர்.

காவல் துறை சார்பில் இந்தப் பேரணிக்கு அனுமதி மறுக்கப்பட்டிருந்தது. இருப்பினும் தடையை மீறி இந்தப் பேரணியானது நடைபெறும் என ஸ்டெர்லைட் எதிர்ப்புக் குழுவினர் சார்பில் அறிவிக்கப்பட்டது. 2018 மே 22ஆம் தேதி தூத்துக்குடியில் பலத்த காவல் பாதுகாப்பு போடப்பட்டிருந்தது. தொடர்ந்து பேரணிவரும் என அறிவிக்கப்பட்ட சாலைகளில் காவல் துறையினர் தடுப்புகளை அடுக்கி வைத்து பேரணி ஆட்சியர் அலுவலகம் சென்று அடையாதவாறு பாதுகாப்பு ஏற்பாடு செய்திருந்தனர்.

thoothukudi

லட்சக்கணக்கான மக்கள் திரண்டு பேரணியாக வந்தபொழுது பேரணியை தடுத்து நிறுத்த முயன்ற காவல் துறையினருக்கும், பொதுமக்களுக்கும் இடையே தள்ளுமுள்ளு ஏற்பட்டது. இது சிறிது நேரத்தில் கலவரமாக வெடித்தது.

இதைத் தொடர்ந்து காவல் துறையினர் கலவரத்தில் ஈடுபட்டவர்களை நோக்கி துப்பாக்கியால் சுட்டனர். இதில் 11-ம் வகுப்பு மாணவி ஸ்னோலின் உள்பட 13 பேர் கொல்லப்பட்டனர். இந்த சம்பவத்திற்கு நாடு முழுவதும் கடும் கண்டனம் தெரிவிக்கப்பட்டது.

இந்தத் துயர சம்பவம் நிகழ்ந்து இன்றுடன் ஓராண்டு நிறைவுபெறும் நிலையில் தூத்துக்குடியில் ஸ்டெர்லைட் போராட்டத்தில் உயிரிழந்தவர்களுக்கு அஞ்சலி செலுத்துவதற்கான நிகழ்ச்சிகள் நடைபெறுகின்றன. முன்னதாக இந்த நிகழ்ச்சிக்கு காவல்துறை சார்பில் அனுமதி மறுக்கப்பட்டிருந்தது. ஆனால் ஸ்டெர்லைட் எதிர்ப்பு மக்கள் இயக்க ஒருங்கிணைப்பாளரும் பேராசிரியையுமான பாத்திமா பாபு உயர் நீதிமன்ற மதுரைக் கிளையில் வழக்கு தொடர்ந்து அஞ்சலி கூட்ட நிகழ்ச்சி நடத்துவதற்கு அனுமதி பெற்றிருந்தார்.

அதன் அடிப்படையில் தனியார் ஓட்டலில் வைத்து தூத்துக்குடி துப்பாக்கிச் சூடு சம்பவத்தில் உயிரிழந்த 13 பேரின் நினைவாக இன்று அஞ்சலி கூட்டம் நடத்தப்படுகிறது. இதில் ஸ்டெர்லைட் எதிர்ப்பு போராளிகளான பாத்திமா பாபு, ஹென்றி டிபேன், வணிகர் சங்க நிர்வாகத்தினர், ஊர் பொதுமக்கள் அனைவரும் கலந்து கொள்வார்கள் என எதிர்பார்க்கப்படுகிறது.

இது தவிர போராட்டம் நடைபெற்ற கிராமங்களான குமரெட்டியாபுரம், தெற்கு வீரபாண்டியபுரம், சில்வர்புரம், மீளவிட்டான், பண்டாரம்பட்டி உள்ளிட்ட கிராமங்களிலும் பாதிக்கப்பட்ட, உயிரிழந்தவர்களின் குடும்பத்தினர்கள், ஸ்டெர்லைட் போராட்டத்தில் உயிரிழந்தவர்கள் உருவப் படங்களை வைத்து அஞ்சலி செலுத்திவருகின்றனர்.

இந்நிலையில் தூத்துக்குடியில் நடைபெறும் நினைவஞ்சலி கூட்டத்தில் அசம்பாவிதங்கள் எதுவும் நடைபெறாமல் இருப்பதற்காக பலத்த காவல் பாதுகாப்பு போடப்பட்டுள்ளது. தூத்துக்குடி மாநகராட்சி பகுதி முழுவதும் காவல்துறை கட்டுப்பாட்டிற்குள் கொண்டுவரப்பட்டுள்ளது.