பேச்சுவார்த்தை நடத்திய சந்தீப் நந்தூரி; செல்வனின் உடலை வாங்க சம்மதித்த உறவினர்கள்...!

மாவட்ட ஆட்சியர் சந்தீர் நந்தூரியின் பேச்சுவார்த்தைக்கு பின் செல்வன் கொலைக்கு நீதி கேட்டு நடத்தப்பட்டு வந்த போராட்டம் கைவிடப்பட்டு, உடலை வாங்க சம்மதம் தெரிவிக்கப்பட்டுள்ளது.

தூத்துக்குடி: மாவட்ட ஆட்சியர் சந்தீர் நந்தூரியின் பேச்சுவார்த்தைக்கு பின் செல்வன் கொலைக்கு நீதி கேட்டு நடத்தப்பட்டு வந்த போராட்டம் கைவிடப்பட்டு, உடலை வாங்க சம்மதம் தெரிவிக்கப்பட்டுள்ளது.

தூத்துக்குடி மாவட்டம், தட்டார்மடம் அருகே சொக்கன்குடியிருப்பைச் சேர்ந்தவர் செல்வன். இவர், தண்ணீர் கேன் வியாபாரம் செய்து வந்தார். இவருக்கும் பக்கத்து ஊரைச் சேர்ந்த அதிமுக பிரமுகரான திருமண வேல் என்பவருக்கும் நிலத்தகராறு தொடர்பாக முன் விரோதம் இருந்து வந்தது.

இதுதொடர்பாக திருமணவேலின் தூண்டுதலின் பேரில் தட்டார்மடம் காவல் ஆய்வாளர் ஹரிகிருஷ்ணன் என்பவர் செல்வன் மீது பொய் வழக்குப் பதிவு செய்து துன்புறுத்தியதாகத் தெரிகிறது. இந்த நிலையில் கடந்த சில தினங்களுக்கு முன்பு, இருசக்கர வாகனத்தில் சென்று கொண்டிருந்த செல்வனை திருமணவேலின் ஆட்கள் காரில் கடத்தி சென்று அடித்து சாலையில் வீசி சென்றனர்.

படுகாயங்களுடன் உயிருக்கு போராடிக் கொண்டிருந்த செல்வனை மீட்ட அக்கம்பக்கத்தினர், திசையன்விளை அரசு மருத்துவமனையில் சிகிச்சைக்காக அனுமதித்தனர். ஆனால் அவர் சிகிச்சை பலனின்றி செல்வன் உயிரிழந்தார். இதுதொடர்பாக செல்வனின் மனைவி ஜீவிதா திசையன்விளை காவல் நிலையத்தில் அளித்த புகாரின் அடிப்படையில் திசையன்விளை காவலர்கள் தட்டார்மடம் காவல் ஆய்வாளர் ஹரிகிருஷ்ணன், அதிமுக பிரமுகர் திருமணவேல், முத்துகிருஷ்ணன், சுடலை கண்ணு உள்பட 6 பேர் மீது கொலை மற்றும் கடத்தல் வழக்குப்பதிவு செய்து விசாரணை நடத்தினர்.

இந்த சம்பவத்தில் தொடர்புடைய காவல் ஆய்வாளர் ஹரிகிருஷ்ணன், அதிமுக பிரமுகர் திருமண வேல், முத்துக்கிருஷ்ணன் ஆகியோர் தொடர்ந்து தலைமறைவாக இருந்த நிலையில் மற்ற மூவரையும் காவல் துறையினர் கைது செய்தனர். திருமணவேல் மற்றும் முத்துகிருஷ்ணன் ஆகியோர் செல்வன் கடத்தி கொலை செய்யப்பட்ட வழக்கில், சென்னை சைதாப்பேட்டை நடுவர் நீதிமன்ற எண் 23 சரணடைந்தனர்.

இதனிடையே இந்த வழக்கில் முதல் குற்றவாளியாக சேர்க்கப்பட்டுள்ள காவல் ஆய்வாளர் ஹரிகிருஷ்ணனை இடைநீக்கம் செய்து நெல்லை டிஐஜி பிரவீன்குமார் அபிநபு உத்தரவிட்டுள்ளார். இதற்கிடையே செல்வன் உடலை வாங்க மறுத்து அவருடைய உறவினர்கள் வீட்டின் அருகே 3 நாள்களாக தொடர் போராட்டத்தை முன்னெடுத்து வந்தனர்.

நேற்றைய தினம்(செப்.20) இந்த போராட்டத்திற்கு ஆதரவு தெரிவித்து திமுக எம்எல்ஏ அனிதா ராதாகிருஷ்ணன் விடிய விடிய செல்வன் குடும்பத்தாருடன் போராட்டத்தில் ஈடுபட்டார். இதில் ஏற்பட்ட காழ்ப்புணர்ச்சி காரணமாக தண்டுபத்தில் உள்ள அனிதா ராதாகிருஷ்ணன் எம்எல்ஏ வீட்டின் முன்பு நிறுத்தப்பட்டிருந்த கார் அடையாளம் தெரியாத நபர்களால் உடைக்கப்பட்டது.

இது தொடர்பான சிசிடிவி காட்சிகள் பதிவாகி இருந்தன. இதனைக் கொண்டு காவலர்கள் விசாரணை நடத்தியதில் கார் உடைப்பு சம்பவத்தில் ஈடுபட்ட காயல்பட்டினத்தில் சேர்ந்த ஜின்னா, தண்டுபத்து பகுதியைச் சேர்ந்த செல்வநாயகம் ஆகிய இருவரையும் கைது செய்தனர்.

செல்வன் குடும்பத்தாருடனான அரசு அலுவலர்களின் தொடர் பேச்சுவார்த்தை தோல்வியில் முடிவடைந்ததைத் தொடர்ந்து, இன்று(செப்.21) மாவட்ட ஆட்சியர் சந்தீப் நந்தூரி, மாவட்ட காவல் கண்காணிப்பாளர் ஜெயக்குமார் ஆகியோர் போராட்டத்தில் ஈடுபட்டவர்களுடன் பேச்சுவார்த்தை நடத்தினர்.

இதில் பாதிக்கப்பட்ட செல்வனின் மனைவிக்கு அதே பகுதியில் இலவச வீட்டு மனை பட்டா வழங்க வேண்டும், பசுமை வீடு ஒதுக்கி தர வேண்டும், அரசு வேலை வழங்க வேண்டும், விதவை பென்ஷன் பெற்றுத்தர வேண்டும் என்பன உள்ளிட்ட கோரிக்கைகள் முன் வைக்கப்பட்டன. இதனைப் பரிசீலித்த மாவட்ட ஆட்சியர் கோரிக்கைகளை நிறைவேற்றி தருவதற்கு நடவடிக்கை எடுப்பதாக உறுதியளித்தார்.

செல்வனின் உடலை வாங்கிய உறவினர்கள்

மேலும், பிரேத பரிசோதனை முடிந்து செல்வனின் உடலை பெற்றுக் கொள்ள அவருடைய உறவினர்கள் சம்மதம் தெரிவித்தனர். இதைத்தொடர்ந்து பேச்சுவார்த்தையில் சுமூக முடிவு எட்டப்பட்டு போராட்டம் கைவிடப்பட்டது. இதை தொடர்ந்து மாவட்ட ஆட்சியர் சந்தீப் நந்தூரி செய்தியாளர்களிடம் கூறுகையில், ''இந்த வழக்கில் சம்பந்தப்பட்ட அனைவர் மீதும் உரிய நடவடிக்கை எடுக்கப்படும்.

காவல் ஆய்வாளர் ஹரிகிருஷ்ணனை சஸ்பெண்ட் செய்து உத்தரவிடப்பட்டுள்ளது. உடந்தையாக இருந்தவர்களை காவலர்கள் கைது செய்துள்ளனர். மேலும் தலைமறைவாக இருந்த திருமணவேல் மற்றும் முத்து கிருஷ்ணன் ஆகியோர் சென்னை நீதிமன்றத்தில் சரணடைந்தனர்.

இந்த வழக்கில் எந்தவித அரசியல் தலையீடு இருக்கக்கூடாது என்பதற்காக விசாரணையை சிபிசிஐடிக்கு மாற்றி உத்தரவு பிறப்பித்துள்ளது. பாதிக்கப்பட்ட குடும்பத்தைச் சேர்ந்தவர்களுக்கு நிவாரணம் அழிப்பதை பொறுத்தவரையில் அவருடைய மனைவிக்கு இலவச வீட்டுமனைப் பட்டா, பசுமை வீடு ஆகியவை வழங்க நடவடிக்கை எடுக்கப்பட்டுள்ளது.

உறவினர்களுடன் பேச்சுவார்த்தை நடத்திய சந்தீப் நந்தூரி

பாதிக்கப்பட்ட குடும்பத்தினரின் பொருளாதார சூழ்நிலை உள்ளிட்டவை கணக்கிடப்பட்டு அரசுக்கு அனுப்பப்பட்டுள்ளது. அதன்படி இதே பகுதியில் செல்வனின் மனைவிக்கு காலி இடம் அறிந்து அரசு வேலை வழங்கிடவும், விதவை பென்ஷன் பெற்று தரவும் நடவடிக்கை எடுக்கப்படும். இந்த சம்பவம் தொடர்பான அனைத்து விஷயங்களும் முதலமைச்சரின் பார்வைக்கு எடுத்துச் செல்லப்படும் என உறுதி அளிக்கப்பட்டுள்ளது'' என்றார்.

இந்த நிலையில், இவ்வழக்கை சிபிசிஐடிக்கு மாற்றி, தமிழ்நாடு டிஜிபி திரிபாதி உத்தரவிட்டுள்ளார் என்பது குறிப்பிடத்தக்கது.

இதையும் படிங்க: சாத்தான்குளம் தந்தை-மகன் உயிரிழப்பு வழக்கு: கோவில்பட்டியில் சிபிஐ விசாரணை