திருவாரூர் மாவட்டம் மன்னார்குடி அருகே மேலபூவனூர் கிராமத்தைச் சேர்ந்தவர்கள் மகேந்திரன் - லதா தம்பதி. விவசாய கூலியான இவர்களுக்கு இரண்டு மகன்கள், இரண்டு மகள்கள் உள்ளனர்.
இந்நிலையில் இளைய மகனான வசந்தகுமாருக்கு (3) கடந்த நான்கு நாட்களுக்கு முன்பு காய்ச்சல் ஏற்பட்டுள்ளது. இதைதொடர்ந்து சிறுவனின் பெற்றோர்கள் சிகிச்சைக்காக நீடாமங்கலம் அரசு மருத்துவமனைக்கு கொண்டு சென்றனர். அங்கு முதலுதவி அளித்த பின்னர் மேல்சிகிச்சைக்காக தஞ்சாவூர் அரசு மருத்துவமனைக்கு கொண்டு சென்றனர்.
அங்கு சிறுவனின் உடலை பரிசோதித்த மருத்துவர்கள் சிறுவன் வசந்தகுமாருக்கு டெங்கு காய்ச்சல் இருப்பதைக் கண்டுபிடித்தனர். அதனைத் தொடர்ந்து சிறுவனுக்கு தீவிர சிகிச்சை அளித்து வந்த நிலையில் இன்று சிகிச்சை பலனின்றி உயிரிழந்துள்ளார்.
குழந்தைகள் தினத்தன்று டெங்கு காய்ச்சலால் சிறுவன் உயிரிழந்துள்ள சம்பவம் மேலபூவனூர் கிராம மக்களிடையே சோகத்தை ஏற்படுத்தியுள்ளது.
