பரப்புரையின் போது பட்டாசுகளை வெடித்ததால் குடிசை வீட்டில் தீ பற்றியது!

திருவள்ளூர்: பொன்னேரி சட்டப்பேரவைத் தொகுதியில், அமமுக வேட்பாளரை பட்டாசுகள் வெடித்து வரவேற்றபோது, அருகிலிருந்த குடிசை வீட்டில் தீ விபத்து ஏற்பட்டது.

திருவள்ளூர் மாவட்டம், பொன்னேரி சட்டப்பேரவைத் தனி தொகுதி அமமுக வேட்பாளர் பொன். ராஜா நேற்று (மார்ச் 24) விச்சூர், திருமுல்லைவாயில், திருநிலை, அருமந்தை, பொதுமக்களிடையே தீவிர வாக்கு சேகரிப்பில் ஈடுபட்டார்.

அப்போது அமமுக தொண்டர்கள், வேட்பாளருக்கு உற்சாக வரவேற்பு அளிக்கும் விதமாக பட்டாசுகளை வெடித்தமர். அதில் அருகிலிருந்த குடிசை வீட்டின் மீது, தீப்பொரி பட்டதால், பற்றி எரியத் தொடங்கியது.

இதனைக் கண்ட தொண்டர்கள், உடனடியாக பற்றி எரியத் தொடங்கிய குடிசை மீது தண்ணீர் ஊற்றி அணைத்தனர். இதனால் பெரும் அசம்பாவிதம் தவிர்க்கப்பட்டது. பட்டாசுகளை வெடித்து குடிசை வீடு தீ பற்றியதால் அப்பகுதியில் சிறிது நேரம் பரபரப்பு நிலவியது.

இதையும் படிங்க: குன்னூரில் கிளிக்கிய அழகிய சிறுத்தைக் குட்டிகள்