62 ஆயிரம் புத்தகங்களுடன் 12,000 உறுப்பினர்களை உள்ளடக்கிய பொது நூலகம், திருவள்ளூர் மாவட்டம், கும்மிடிப்பூண்டி வசந்த பஜாரில் 1968ஆம் ஆண்டு, டிசம்பர் மாதம் 12ஆம் தேதி திறக்கப்பட்டது. பல ஆண்டுகளாக இயங்கி வந்த இந்தப் பொது நூலகத்தின் நிலப்பரப்பளவு ஆறு செண்ட் ஆகும்.
ஆனால், இந்த ஆறு செண்ட் இடத்தை முருகன், நாகராஜ், சம்பாலால் ஆகிய நபர்கள் ஆக்கிரமித்துள்ளனர். இந்நிலையில், இந்த ஆக்கிரமிப்புகளை அகற்ற அரசு தரப்பில் பலமுறை தெரிவிக்கப்பட்டும் எந்தப் பயனும் இல்லாமல் இருந்து வந்துள்ளது. இந்நிலையில், ஆக்கிரமிப்பாளர்கள் அரசுத் தரப்பின் மீது கடந்த மாதம் அவசர வழக்கு ஒன்றைத் தொடர்ந்துள்ளனர்.
ஆனால் இந்த வழக்கை தள்ளுபடி செய்த உயர் நீதிமன்றம், உடனடியாக ஆக்கிரமிப்புகளை அகற்றி மாற்றுத்திறனாளிகளும் படித்துப் பயன்பெறும் வகையில் அவ்விடத்தில் நவீன தலைமை தாலுகா நூலகம் கட்ட ஆணை பிறப்பித்தது.
இதனைத் தொடர்ந்து மாவட்ட ஆட்சியர், கோட்டாட்சியர் ஆகியோரின் உத்தரவின்பேரில் கும்மிடிப்பூண்டி வட்டாட்சியர் கதிர்வேல் தலைமையிலான வருவாய்த்துறையினர், காவல் துறையினரின் பலத்த பாதுகாப்புடன் நூலக ஆக்கிரமிப்புகளை அகற்றினார்கள்.
ஆக்கிரமிப்பு அகற்றப்பட்ட ஆறு செண்ட் இடத்தில் நவீன பொது நூலகம் விரைவில் கட்டப்படும் என மாவட்ட நூலக அலுவலர் திலகா தெரிவித்துள்ளார்.
