திருநெல்வேலி மாவட்டம் நாங்குநேரி தொகுதிக்கு உட்பட்ட மூலைக்கரைப்பட்டி அருகே உள்ள அம்பலம் பகுதியில் வாக்காளர்களுக்கு பணம் கொடுப்பதற்காக ஒரு வீட்டில் பணம் பதுக்கி வைக்கப்பட்டிருந்தது அப்பகுதி மக்களுக்கு தெரியவந்தது. இந்த தகவல் அறிந்த பொதுமக்கள் இதுகுறித்து மூலைக்கரைப்பட்டி காவல் துறையினருக்கும் தேர்தல் அலுவலர்களுக்கும் தகவல் தெரிவித்தனர்.
பின்பு சம்பவ இடத்திற்கு வந்த நாங்குநேரி தொகுதி தேர்தல் அலுவலர்களும் பறக்கும் படையினரும் பணத்தைக் கைப்பற்றி இடத்தின் உரிமையாளர் உட்பட பலரிடம் விசாரணை மேற்கொண்டு வருகின்றனர். இதில் திமுக தரப்பினர் சம்பந்தப்பட்டுள்ளதாகவும் லட்சக்கணக்கில் பணம் சிக்கியுள்ளதாகவும் தகவல்கள் தெரிவிக்கின்றன.
இதுகுறித்து பேசிய தேர்தல் அலுவலர்கள், முதற்கட்ட விசாரணை நிறைவடைந்த பிறகுதான் எவ்வளவு பணம் கைப்பற்றப்பட்டது, இதில் யார் யாரெல்லாம் சம்பந்தப்பட்டுள்ளனர் என்பது தெரியவரும் என்று தெரிவித்தனர். வருகின்ற 21ஆம் தேதி நாங்குநேரி தொகுதியில் இடைத்தேர்தல் நடைபெறவுள்ள நிலையில் பணம் பிடிபட்டுள்ள சம்பவம் நாங்குநேரி அரசியல் களத்தை மேலும் பரபரப்பாக மாற்றியுள்ளது.
இதையும் படியுங்க: சிதம்பரத்துக்கு காவல் நீட்டிப்பு!
