நீட், ஜேஇஇ போன்ற தேர்வுகளுக்குப் பல்வேறு தரப்பினர் எதிர்ப்பு தெரிவித்து வருகின்றனர். ஆனால், மத்திய அரசின் பிடிவாதம் மட்டும் குறைந்தபாடில்லை. பொருளாதாரத்தில் பின்தங்கிய மாணவர்களின் கனவுகளுக்கு இடையூறாக இருக்கும் இந்தத் தேர்வுகளை எதிர்கொள்ள ஏதுவாக அவர்களுக்குத் தன் மகன் படித்த புத்தகங்களை வாசிப்பதற்காகப் பரிசளிக்கிறார் தேனி மாவட்டம் அல்லிநகரம் பகுதியைச் சேர்ந்த ராஜேந்திரன்.
பொதுவாக ஒருவர் புதிதாக டீக்கடை துவக்கினால் வாடிக்கையாளர்களை கவர்வதற்காக டீயின் சுவை, தரத்தில் தான் கவனம் செலுத்துவர். ஆனால் ராஜேந்திரனின் 'கலாம் நூலக யுக்தி' அருவி டீக்கடைக்கு மேலும் வலுசேர்க்கிறது என்றே சொல்லலாம். அரசியல், அக்கம் பக்கத்து புறணி என நிறைந்திருக்கும் டீக்கடையின் தோற்றத்தையே அமைதியின் உறைவிடமாய் மாற்றிய இவரின் முயற்சி குறித்து கேட்டோம்.
அப்போது பேசிய அவர், "மகனின் படிப்பிற்காக வாங்கிய புத்தகங்களை வீட்டில் சேமித்து வைத்திருந்தேன். அவற்றையெல்லாம் அப்புறப்படுத்த மனமின்றி நூலகமாக மாற்றியுள்ளோம். அவ்வளவு தான். இதற்காக தனியாக இடம் பார்க்காமல் புதிதாக துவங்கும் டீக்கடையையே நூலகமாக அமைக்கலாம் என தீர்மானிக்கையில் உருவானது தான் "கலாம் மாணவர்கள் நூலகம்".
துவக்கத்தில் நீட், ஜேஇஇ தேர்வுகளுக்குத் தயாராகும் மாணவர்களுக்குத் தேவையான புத்தகங்கள், பொது அறிவுப் புத்தகங்கள் உள்ளிட்ட புத்தகங்களை வைத்திருந்தோம். இதனை அறிந்த திண்ணை பயிற்சி மையம் எனும் தன்னார்வ அமைப்பினர், டிஎன்பிஎஸ்சி., யுபிஎஸ்சி., போன்ற போட்டித் தேர்வுகளுக்குத் தயாராகும் மாணவர்கள் பயனடையும் வகையில் புத்தகங்களை வழங்கினர்.
இதனால் வாசகர்களின் வருகையும் அதிகரிக்கத் தொடங்கியுள்ளது. மாணவர்கள் தங்களது ஆதார், மொபைல் எண் விபரங்களை மட்டும் தெரிவித்து தேவையான புத்தகங்களை இலவசமாக வீட்டிற்கே எடுத்துச் சென்று படிக்கலாம். இதற்காக எந்தவொரு கட்டணமும் வசூல் செய்வதில்லை. வரும் காலங்களில் வாசிப்புத் திறனை அதிகரிப்பதற்காக சிறுகதை, நாவல், இலக்கியம், உள்ளிட்ட நூல்களையும் வரிசைப்படுத்த உள்ளோம்" என்று பெருமையுடன் கூறுகிறார்.
கைவிரித்த அரசாங்கம் - வாசகர்களால் புத்துயிர் பெற்ற கால் நூற்றாண்டு கடந்த நூலகம்!
இந்த முயற்சி குறித்து ராஜேந்திரனின் மகன் ஜெயசுதர்சனிடம் கேட்டபோது, "புதிதாக நீட் தேர்வை எழுதும் கிராமப்புற மாணவர்கள் சிலர் தேர்விற்கு எந்த புத்தகங்களை படிக்கலாம். அவை எங்கு கிடைக்கும் என்று கேட்டதன் வெளிப்பாடே இந்த "கலாம் மாணவர்கள் நூலகம்". நான் வாங்கி படித்து தேர்ச்சியடைந்த புத்தகங்களை வசதியின்றி தவிக்கும் கிராமப்புற மாணவர்களும் கற்று பயனுற வேண்டும் என்பதே எனது ஆசை.
எங்கள் நூலகத்தில் படித்து ஒரு மாணவர் தேர்ச்சி அடைந்தாலே எங்களது நோக்கம் நிறைவேறிவிடும். வாழ்வில் முன்னேற நூலகம் இன்றியமையாதது. அதனால் வாசிப்பை நேசிப்போம்" என்று நூலகத்திற்கு மாணவர்களை வரவேற்கிறார். இது குறித்து வாசகரும் பன்னிரண்டாம் வகுப்பு மாணவருமான பார்த்திபன் கூறுகையில், "உயர் கல்விக்கான நுழைவு தேர்வுக்குத் தயாராகிக் கொண்டிருக்கும் வேளையில் கரோனாவால் தற்போது பயிற்சி மையம், நூலகங்கள் எல்லாம் அடைக்கப்பட்டுள்ளன.
கடைகளிலும் அதிக விலை கொடுத்து புத்தகங்கள் வாங்க முடியாமல் தவித்திருந்த எங்களுக்கு இந்த கலாம் மாணவர்கள் நூலகம் பயனுள்ளதாக உள்ளது. மேலும் எங்களுக்கு எழுகின்ற சந்தேகங்களுக்கும் உரிய விளக்கம் அளித்து ஊக்குவிக்கின்றனர்" என்றார். நூலகங்களை அமைத்து அவற்றைப் பராமரிக்க முடியாமல் பலர் மூடுவிழா நடத்திக் கொண்டிருக்கையில், அருவி டீக்கடைக்குள் பெயருக்குத் தகுந்தாற் போல அறிவை வாரி வழங்கும் நூலகத்தை அமைத்த ராஜேந்திரனின் செயல் பாராட்டுக்குரியது.
'என் சார்பாக இந்தப் புத்தகங்கள் பேசும்' - அசத்தும் சலூன் கடைக்காரர்!
