தேனி மாவட்டம் கம்பம் உழவர் சந்தை அருகே உள்ள பார்க் திடலில் நேற்று (டிசம்பர் 24) திராவிடர் கழகம் சார்பில் தந்தை பெரியார் நினைவு நாள், சமூக நீதி மற்றும் மதச்சார்பின்மை ஜனநாயக முற்போக்கு கொள்கை விளக்க திறந்த வெளி மாநாடு நடைபெற்றது. அதில் காங்கிரஸ் சார்பில் ஈ.வி.கே.எஸ் இளங்கோவன், சி.பி.ஐ சார்பில் முத்தரசன், திமுக சார்பில் கம்பம் செல்வேந்திரன் உள்ளிட்ட பல்வேறு கட்சித் தலைவர்களும் நிர்வாகிகளும் பங்கேற்றனர்.
இதில் திராவிடர் கழகம் தலைவர் கி.வீரமணி சிறப்புரையாற்றினார். முன்னதாக சபரிமலை அய்யப்பன் கோயிலுக்கு சென்று விட்டு ஊர் திரும்பிய போது ஏற்பட்ட சாலை விபத்தில் உயிரிழந்த ஆண்டிபட்டி பகுதியை சேர்ந்த 8 பக்தர்களுக்கு ஒரு நிமிடம் மௌன அஞ்சலி செலுத்துமாறு கேட்டுக்கொண்டார்.
அதனைத் தொடர்ந்து பேசிய வீரமணி, ”கடவுள் மறுப்பாளர்களான நாங்கள் சபரிமலை அய்யப்ப பக்தர்கள் மரணத்திற்கு ஏன் மௌன அஞ்சலி செலுத்த வேண்டும் என்று சிலர் கேட்கலாம். அவர்களுக்கு நாங்கள் சொல்வது பெரியார் சொன்னது போல கடவுளை மறு! மனிதனை நினை! என்பது தான். என்னை பொறுத்தவரை சபரிமலை அய்யப்பன் கோயிலுக்கு செல்வது மூட நம்பிக்கை, ஆனால் அவர்களுக்கு அது பக்தி. இது போன்று கோயிலுக்கு சென்று வந்த இடத்தில் விபத்துக்குள்ளாகி யார் உயிரிழந்தாலும் பக்தரோ, ஆர்எஸ்எஸ் அல்லது பாஜகவினர் என யாராக இருந்தாலும் அவர்களுக்கும் அஞ்சலி செலுத்துவோம் மனிதன் என்கிற அடிப்படையில் எனத் தெரிவித்தார்.
நாங்கள் எல்லாம் கடிகாரத்தில் உள்ள நேரத்தை கண்டு அஞ்சி அதற்கு ஏற்றாற் ஓட வேண்டும் என உழைத்துக் கொண்டிருக்கிறோம். சிலரை போல் கட்டிய கடிகாரத்தின் வரலாற்று தாட்பரியத்திற்கு பயப்படுவார்கள் அல்ல . பெரியார் தனது சுற்றுப்பயணத்தை முடித்து கொண்டார் என அவரது மறைவுக்கு கலைஞர் கருணாநிதி இரங்கல் கடிதம் எழுதினார். ஆனால் பெரியாரின் உடல் தான் சுற்றுப்பயணத்தை முடித்துக் கொண்டது. அவரது தத்துவங்கள் ஏற்படுத்தியிருக்கிற சுற்றுப் பயணம் பெரியார் உலக மயம், உலகம் பெரியார் மயம் ஆனதாக ஈவிகேஎஸ் இளங்கோவன் என்னிடம் தெரிவித்தார்.
இன்றைக்கு இங்கு நடைபெறும் கூட்டத்திற்கு அனுமதி வழங்குவதற்கு காவல்துறையினர் தயங்கினர். ஏனெனில் ஏதாவது விபரீதமாக பேசுவார்கள் எனற அச்சத்தில். தமிழகத்தில் ஆட்சி மாற்றம் ஏற்பட்டிருப்பது இன்னும் ஒரு சில காவல் துறை அதிகாரிகளுக்கு தெரியவில்லை போலும். ஆனால் அவர்களுக்கும் சேர்த்து தான் நாங்கள் இங்கு பேசிக் கொண்டிருக்கிறோம் என்றார்.
எங்களிடம் இருக்கின்ற அறிவுக் கடப்பாரை சானாதனத்தை தான் உடைத்து எறியும். இதனால் அரிசனரும் அரசாங்கத்தின் அரசனாக ஆக முடியும். கடவுள் இல்லை என்று சொல்லி வரும் எங்களால் எந்த ஒரு கோயிலோ வழிபாட்டு தலங்களோ உடைக்கப்பட்டது உண்டா. ஆனால், உங்கள் வரலாறு தடை செய்யப்பட்ட வரலாறு. இந்தியாவில் 3 முறை தடை செய்யப்பட்ட இயக்கம் என்ற பெயர் பெற்றது தான் ஆர்.எஸ்.எஸ். வித்தைகளால் மீண்டும் வருகிறது. ஆனால் விரைவில் அது முற்று பெரும்.
இன்றைக்கு இந்தியாவிற்கே திராவிட மாடல் தேவைப்படுவதாக செய்திகள் வெளியாகின்றன. ஆனால் சிலருக்கு திராவிட மாடல் புரியவில்லை, பிடிக்க வில்லை என்கின்றனர். உள்ளத்தால் அனைவரும் ஒன்று சமூக நீதி, சனாதனத்திற்கு எதிரானது என்பது தான் திராவிட மாடல் ஆகும். அதைத் தான் தந்தை பெரியார் கூறி வந்தார். பெரியாரை நேரில் காணாத இன்றைய இளைஞர்கள் அவரது கொள்கைகளால் ஈர்க்கப்பட்டுள்ளனர்.
நாம் எந்த ஆயுதம் எடுக்க வேண்டும் என்பதை எதிரானவர்கள் தான் தீர்மானிக்க வேண்டும். அதாவது பெரியார் எனும் பேராயுதம் தான் எப்போதும் நாம் எடுக்கும் ஆயுதம். இந்த ஆயுதம் வன்முறையில் நம்பிக்கை இல்லாதது. தமிழ்நாட்டில் இருக்கும் சமூக நீதி வேறு எங்கும் உள்ளதா, 69சதவீத இட ஒதுக்கீடு கிடைத்தது பெரியாரின் கொள்கைகளால் தான். இது முப்பத்து முக்கோடி தேவர்களுக்கும், ரிஷிகளுக்கும் தெரியாது. இது தவிர கல்வி, வகுப்புரிமை, மண்டல் கமிஷன் உள்ளிட்டவற்றை பெற்றுத் தந்தது நீதிக்கட்சி, திராவிடர் கழகத்தால் தான்.
தமிழகத்தில் யார் ஆட்சிக்கு வந்தாலும் பெரியார் மற்றும் அவரது சிந்தனைகளை தாண்டி இங்கு ஆட்சி நடைபெற முடியாது என்பதற்கு உதாரணம் தான் பிராமணர்களாக இருந்த முதலமைச்சர் ஜெயலலிதா, பிரதமர் நரசிம்ம ராவ், ஜனாதிபதி சங்கர் தயாள் சர்மா ஆகியோரால் 69சதவீத இட ஒதுக்கீடு நடைமுறைப்படுத்தப்பட்டது ஆகும்.
நீங்கள் எந்த ரூபத்தில் வந்து கபளிகரம் செய்தாலும் அங்கு பெரியார் கொள்கை தான் வெல்லும். இவ்வாறு அனைத்தும் அனைவருக்கும் கிடைக்க வேண்டும் என்பதே சமூக நீதி, திராவிட மாடல் ஆகும். ராகுல் காந்தி சொன்னது போல் பெரியார் கொள்கை இருக்கும் வரை தமிழ்நாட்டில் பாஜகவால் வளர முடியாது.
இதையே தான் நேற்று நடைபெற்ற கிறிஸ்துமஸ் விழாவில் பங்கேற்ற ஸ்ரீ ஸ்ரீ ஸ்ரீ மகாலிங்க பரமாச்சாரியா சுவாமிகள் கூறியிருந்தார் கேரளாவில் கம்யூனிஸ்டும், தமிழ்நாட்டில் பெரியாரும் இருக்கும் வரை பாஜகவால் வளர முடியாது என்றார். பொதுவாக ஆதீனங்களை எல்லாம் பாஜக ஆர்எஸ்எஸ் காரர்கள் குத்தகைக்கு எடுத்துப் பார்கள். ஆனால் இவரை எடுக்க முடியவில்லை” என்றார். இறுதியாக பேசிய அவர், ”ஒரே நாடு, ஒரே தேர்தல், ஒரே மொழி என சொல்பவர்கள் ஒரே ஜாதி எனக்கூற தயாரா. அவ்வாறு அறிவித்தால் அதற்கு நாங்கள் ஆதரவளிக்கிறோம்” என்றார்.
இதையும் படிங்க: பள்ளி மாணவர்களை கடத்தினாரா வடமாநில இளைஞர்? - மாணவரின் தந்தை கைது
