தேனி: கேரளா மாநிலம் மூணாறு அருகே உள்ள சின்ன கானல் பகுதியில் 10 பேருக்கும் மேற்பட்டோரை கொன்று அட்டகாசம் செய்து வந்த அரிசிகொம்பன் ஒற்றைக் காட்டு யானையை பல முயற்சிகளுக்குப் பின்பு கேரளா வனத்துறையினர் மயக்க ஊசி செலுத்தி பிடித்தனர்.
பிடிக்கப்பட்ட யானை, தமிழ்நாடு-கேரள எல்லையான பெரியாறு புலிகள் வனக்காப்பக பகுதியில் விடப்பட்டது. மேலும் யானை நடமாட்டத்தை தொடர்ந்து கண்காணிக்கும் விதமாக யானையின் கழுத்தில் ஜிபிஎஸ் கருவி பொருத்தப்பட்டு உள்ளது குறிப்பிடத்தக்கது.
பின்னர், பெரியார் புலிகள் வனகாப்பகப் பகுதியிலிருந்து யானை தினமும் பல கிலோ மீட்டர் கடந்து இடம்பெயர்ந்து கொண்டே இருந்தது. தேனி மாவட்டம் மேகமலை பகுதியில் உள்ள இரவங்கலாறு, மணலாறு போன்ற பகுதிகளில் உலா வந்து பொதுமக்களை அச்சுறுத்தி வந்து அப்பகுதியில் உள்ள கடைகளில் சென்று அரிசிகளை உண்பதும் மலைப்பாதை சாலைகளில் செல்லும் அரசு பேருந்து வழிமறித்து அச்சுறுத்தும் நிகழ்வும் நடைபெற்றது.
இதனால் மேகமலைக்கு சுற்றுலாப் பயணிகள் செல்ல வனத்துறையினர் தடைவிதித்து, யானையை வனப்பகுதிக்குள் கொண்டு செல்ல பல்வேறு முயற்சிகளை மேற்கொண்டனர். இந்த நிலையில் நேற்று (மே 26) இரவு, ரோஜா பூ கண்டம் வழியாக லோயர் கேம்ப் பகுதிக்கு இடம்பெயர்ந்த அரிசிகொம்பன் யானை, கூடலூர் அருகே கழுதை மேட்டுப்பட்டி பகுதியில் உள்ள தென்னந்தோப்பில் புகுந்து விவசாய நிலங்களை சேதப்படுத்திய நிலையில், தமிழ்நாடு மற்றும் கேரளா வனத்துறையினர், அந்தப் பகுதியில் முகாமிட்டு அரிசிகொம்பனை விரட்டும் முயற்சியில் ஈடுபட்டு வந்தனர்
இந்த நிலையில் இன்று (மே 27) அதிகாலையில் கம்பம் நகர் பகுதிக்குள் புகுந்து பொதுமக்களை விரட்டிய சம்பவம் பெரும் அச்சத்தை ஏற்படுத்தி உள்ளது. அரிசிகொம்பன் யானை கம்பம் நகர் பகுதிக்குள் புகுந்து, பொதுமக்களை விரட்டி வருகின்ற நிலையில் காவல்துறையினர் வாகனங்களில் ஒலிபெருக்கி மூலம் பொதுமக்களை எச்சரித்து வருகின்றனர். மேலும், கம்பம் நகராட்சி சார்பில் பொதுமக்கள் யாரும் வீட்டை விட்டு வெளியே வர வேண்டாம் என எச்சரிக்கை விடுக்கப்பட்டு உள்ளது.
கம்பம் நகர் பகுதிக்குள் ஆக்ரோஷத்துடன் சுற்றி வரும் அரிசிகொம்பன் யானை, எதிரில் படும் ஆட்டோ உள்ளிட்ட வாகனங்களை சேதப்படுத்துவது போன்ற சம்பவங்கள் நடைபெற்று வருகின்றன. மேலும் அரிசிகொம்பன் யானை தாக்கியதில் ஒருவர் படுகாயம் அடைந்து அரசு மருத்துவமனையில் சிகிச்சை பெற்று வருகிறார்.
யானையை, நகர் பகுதியில் இருந்து விரட்டி, வனப்பகுதிக்குள் கொண்டு செல்ல வனத்துறையினர் தீவிர முயற்சியில் ஈடுபட்டு வருகின்றனர். தன் வாழ்விடத்தை தேடி தொடர்ந்து, பல நூறு கிலோமீட்டர் தினமும் இடம் பெயர்ந்து செல்லும் யானை, இதே போல் சென்றால் மீண்டும் தன் வாழ்விடமான சின்ன கானல் பகுதி நோக்கி சென்று விடும் என கூறப்படுகிறது. யானை ஆக்ரோஷத்துடன் சுற்றித் திரிவதால் பொதுமக்கள் யாரும் அதன் அருகில் செல்ல வேண்டாம் என வனத்துறையினர் எச்சரிக்கை விடுத்து உள்ளனர்.
