கும்பகோணம் அருகே திருமங்கலக்குடியைச் சேர்ந்தவர் முகமது காபூஸ். இவர் வெளிநாட்டில் வேலை பார்த்துவிட்டு, கடந்தாண்டு சொந்த ஊர் திரும்பினார். இவருக்கும் நாகை மாவட்டம் மயிலாடுதுறை அருகே வடகரையைச் சேர்ந்த காபத்து நிஷா என்பவருக்கும் மூன்றரை ஆண்டுகளுக்கு முன்பு திருமணம் நடைபெற்றது.
30 சவரன் நகை வரதட்சணையாகக் கொடுக்கப்பட்ட நிலையில், அதில் 13 சவரனை நிஷா தனது பெற்றோரிடம் திரும்பக் கொடுத்துவிட்டதாகவும், அந்த நகையைத் திரும்பக் கேட்டு முகமது காபூஸும், அவரது பெற்றோரும் சித்ரவதை செய்ததாகவும் கூறப்படுகிறது. இந்நிலையில் நிஷா சமையலறையில் தூக்கிட்டு தற்கொலை செய்து கொண்டதாகக் கணவர் தரப்பிலிருந்து நிஷாவின் பெற்றோருக்கு தகவல் கொடுக்கப்பட்டது.
இதையடுத்து நிஷாவின் பெற்றோர் அளித்த புகாரின் பேரில் திருவிடைமருதூர் காவல் துறையினர் சம்பவ இடத்திற்குச் சென்று நிஷாவின் உடலைக் கைப்பற்றி உடற்கூறாய்வுக்காக கும்பகோணம் அரசு மருத்துவமனைக்கு அனுப்பி வைத்தனர். அதனைத் தொடர்ந்து வரதட்சணை கேட்டு நிஷாவின் கணவர் முகமது காபூஸ், அவரது தந்தை அப்துல் ஹலீம், தாய் ரசியா பானு ஆகியோர் சித்ரவதை செய்ததாகவும், தனது மகளின் மரணத்தில் சந்தேகம் இருப்பதாகவும் நிஷாவின் தாய் ஆயிஷா மரியம் குற்றஞ்சாட்டியுள்ளார்.
இச்சம்பவம் குறித்து திருவிடைமருதூர் காவல்நிலையத்தில் முதல் தகவல் அறிக்கை பதிவு செய்யப்பட்டு விசாரணை நடைபெற்று வருகிறது.
