ராணிப்பேட்டை: ராணிப்பேட்டை மாவட்டத்தில் 13 வயது சிறுமியை மிரட்டி பலமுறை பாலியல் தொல்லை கொடுத்த இருவரை போக்சோ சட்டத்தின் கீழ் கைது செய்த காவல் துறையினர், அவர்களை சிறையில் அடைத்து உள்ளனர். ராணிப்பேட்டை மாவட்டத்தைச் சேர்ந்த 37 வயதான நபர், காய்கறி அங்காடியில் கொத்தமல்லி, கறிவேப்பிலை விற்பனை செய்யும் தொழில் செய்து வந்துள்ளார்.
அதேபோல், அதே பகுதியில் 55 வயதான நபர் ஒருவர் பங்க் கடை நடத்தி வந்து உள்ளார். இந்த நிலையில், இவர்கள் இருவரும் அதே பகுதியைச் சேர்ந்த 13 வயது சிறுமியை மிரட்டி பாலியல் தொந்தரவு கொடுத்து வந்துள்ளனர். அதேநேரம், பாதிக்கப்பட்ட சிறுமியின் பெற்றோர் இருவரும் வேலைக்குச் சென்ற நேரம் பார்த்து இருவரும் பல முறை சிறுமிக்கு பாலியல் தொந்தரவு கொடுத்து வந்துள்ளனர்.
இந்த நிலையில், சிறுமியின் நடவடிக்கைகளில் சில மாற்றம் தெரிவதை பெற்றோர் கவனித்து உள்ளனர். இதனையடுத்து, இது தொடர்பாக அவரது பெற்றொர் சிறுமியிடம் விசாரித்து உள்ளனர். அப்போது சம்பந்தப்பட்ட இருவரால், தான் பாலியல் தொந்தரவுக்கு உள்ளாக்கப்பட்டதை சிறுமி தெரிவித்து உள்ளார்.
இதையும் படிங்க: கோழிக் குழம்பில் மயக்க மருந்து கொடுத்து 100 சவரன் அபேஸ்.. பலே கும்பல் சிக்கியது எப்படி?
மேலும், சிறுமிக்கு பாலியல் தொல்லை கொடுத்ததை வெளியில் கூறினால் சிறுமியின் பெற்றொரை கொலை செய்து விடுவதாக இருவரும் சிறுமியை மிரட்டி உள்ளதாகவும், அவர் பெற்றோரிடம் கூறி உள்ளார். இதனால் பயந்து போன சிறுமி, இதனை யாரிடமும் கூறாமல் இருந்ததாக தெரிவித்து உள்ளார்.
இவ்வாறு மகள் கூறியதைக் கேட்டு அதிர்ச்சி அடைந்த பெற்றொர், இது குறித்து அருகில் உள்ள அனைத்து மகளிர் காவல் நிலையத்தில் புகார் அளித்து உள்ளனர். இதனைத் தொடர்ந்து, சம்பந்தபட்ட இருவரையும் அனைத்து மகளிர் காவல் நிலைய காவல் துறையினர் கைது செய்தனர்.
மேலும், கைது செய்யப்பட்ட இருவர் மீதும் போக்சோ சட்டத்தின் கீழ் வழக்குப் பதிவு செய்த காவல் துறையினர், அவர்களை நீதிமன்றத்தில் ஆஜர்படுத்தி சிறையில் அடைத்தனர். இந்த சம்பவம், அப்பகுதியில் பெரும் பரபரப்பை ஏற்படுத்தி உள்ளது. மேலும், இதுபோன்ற குற்றச் சம்பவங்களின்போது, பாதிக்கப்பட்டவர்கள் உடனடியாக காவல் துறையை அணுக வேண்டும் என காவல் துறை தரப்பில் தெரிவிக்கப்பட்டுள்ளது.
இதையும் படிங்க: "டாஸ்மாக் மதுவில் சயனைடு" - மயிலாடுதுறையில் இருவர் மரணத்தில் நடந்தது என்ன?
