தஞ்சாவூர் அடுத்த செங்கிப்பட்டியில், திருச்சி - தஞ்சாவூர் தேசிய நெடுஞ்சாலை அருகே பயணியர் விடுதியின் சுற்றுச்சுவர் அருகே தமிழ் எண்கள் பொறிக்கப்பட்ட இரண்டு மைல்கற்கள் கண்டுபிடிக்கப்பட்டுள்ளது. இது வித்தியாசமாக இருப்பதை உணர்ந்த, கந்தர்வகோட்டையைச் சேர்ந்த சமூக ஆர்வலர் மூ.சேகர் என்பவர், தொல்லியல் துறைக்கு தகவல் அளித்துள்ளார்.
அதனடிப்படையில், தஞ்சாவூர் தமிழ்ப் பல்கலைக்கழகத்தின் தொல்லறிவியல் துறை முனைவர் பட்ட ஆய்வாளர் மங்கனூர் ஆ.மணிகண்டன், தொல்லியல் ஆய்வுக்கழகத் தலைவர் கரு. ராஜேந்திரன், ஓய்வுபெற்ற வட்டார வளர்ச்சி அலுவலர் து. மணிசேகரன் ஆகியோர் அடங்கிய குழுவினர் அவ்விடத்தை ஆய்வு செய்தனர்.
அதில், திருச்சி- தஞ்சாவூர் இடையே 1849ஆம் ஆண்டு ஆங்கிலேயர்களால் உருவாக்கப்பட்ட சாலை மேம்பாட்டு பணியின் போது நடப்பட்ட தமிழ் எண்களுடன் கூடிய மைல் கல் என்பதைக் கண்டறிந்தனர்.
இதுகுறித்து தஞ்சாவூர் தமிழ்ப் பல்கலைக்கழக தொல்லறிவியல் துறை முனைவர் பட்ட ஆய்வாளர் ஆ.மணிகண்டன் கூறுகையில், "தமிழ்நாடு முழுவதும் பத்துக்கும் மேற்பட்ட இடங்களில் தமிழ் எண்கள் பொறிக்கப்பட்ட மைல் கற்கள் அடையாளம் காணப்பட்டுள்ளன. இதில் எமது குழுவினரால் புதுக்கோட்டை மாவட்டத்தில் கூழியான் விடுதி, ஆதனக்கோட்டை, அன்னவாசல், திருநெல்வேலி மாவட்டம் அம்பாசமுத்திரம் அருகே கௌதமபுரி, தஞ்சாவூர் மாவட்டம் மாப்பிள்ளைநாயக்கன் பட்டி, செங்கிப்பட்டி கீரனூர் விலக்குச்சாலை ஆகிய இடங்களில் கண்டுபிடித்துள்ளோம்.
செங்கிப்பட்டியில் மேலும் இரண்டு மைல்கல் கண்டுபிடிக்கப்பட்டிருப்பது கூடுதல் முக்கியத்துவம் பெறுகிறது. மைல் கல் நடப்பட்ட காலம் ஆங்கிலேயர் காலத்தில், திருச்சியிலிருந்து திருவெறும்பூர் வழியாக, தஞ்சாவூருக்குச் செல்லும் ஏழாம் எண் சாலை, 1849ஆம் ஆண்டு போடப்பட்டதாகும். இது கப்பிச்சாலையாகவும், பாலத்துடனும், நல்ல நிலையில் இருந்ததாக லீவிஸ் மூர் என்ற ஆங்கிலேயர் 1878ஆம் ஆண்டு ஜூன் 28ஆம் தேதியிட்ட "மேனுவல் ஆப் தி திருச்சினாப்போளி டிஸ்டிரிக்ட்” என்ற புத்தகத்தில் தெரிவித்துள்ளார்.
முதலாவது மைல்கல்லில், தஞ்சாவூர் 16 என அரபு எண்ணிலும், ய௪ என்று தமிழ் எண்ணிலும் , தொடர்ச்சியாக திருச்சினாப்பள்ளி (திருச்சிராப்பள்ளி) 18 மைல் என்பதை, ய௮ என தமிழ் எண்ணுடனும் குறிக்கப்பட்டுள்ளது. இரண்டாவது மைல் கல்லில் தஞ்சாவூர் 21 என அரபு எண்ணிலும் "௨ய௧" என தமிழ் எண்ணிலும் , திருச்சிநாபளி (திருச்சிராப்பள்ளி) 13 என அரபு எண்ணிலும், ய௩ தமிழ் எண்ணிலும் குறிக்கப்பட்டுள்ளது. இந்த இரண்டு கல்வெட்டிலும் முதலாவதாக ஆங்கிலத்தில் ஊர்ப்பெயரும் , அதன் கீழே அரபு எண்ணில் தூரமும், இரண்டாவதாக தமிழ் எழுத்தில் ஊர்ப்பெயரும் அதன் கீழே தமிழ் எண்ணில் தூரமும் பொறிக்கப்பட்டுள்ளது.
தமிழ் எண்கள் பொதுமக்கள் பயன்பாட்டில், எந்தக்காலம் வரை பயன்பாட்டில் இருந்தது, என்பதற்கான முக்கியத்துவமான சான்றாக உள்ளது. தற்போது அடையாளம் காணப்பட்ட மைல்கற்களின் எழுத்தமைதி எழுத்துருக்கள், ஒருபக்கம் மட்டுமே பொறிக்கப்பட்டுள்ள தன்மை , கல்லின் வடிவம் ஆகியவற்றை ஒப்புநோக்கும்போது இம் மைல்கற்கள் ஒரே காலத்திலானவை. தஞ்சையில் தமிழ் மற்றும் அரபு எண்களும், புதுக்கோட்டையில் தமிழ் மற்றும் ரோமன் எண்களும், இருப்பது நோக்கத்தக்கது.
இதன் மூலம் புதுக்கோட்டை சமஸ்தானத்திற்குட்பட்ட பகுதிகளில் தமிழ் ரோமன் எண்கள் அலுவலக பயன்பாடுகளில் முதன்மை பெற்றிருந்ததும், தஞ்சை, திருச்சி ஆளுகைக்குட்பட்ட பகுதிகளில் தமிழ் அரபு எண்கள் முன்னிலைப் பெற்றிந்திருப்பதையும், அறிந்துகொள்ள முடிகிறது.
தமிழ் எண்களின் பயன்பாடும் வீழ்ச்சியும் நூறு ஆண்டுகளுக்கு முன்பு வரை ரோமன் மற்றும் அரேபிய எண்கள் வெளி நாட்டவருக்கான எண்ணாகவும், மக்கள் பயன்பாட்டில் தமிழ் எண்கள் மட்டுமே இருந்துள்ளதை வெளிப்படுத்தும் மிக முக்கியமான தொல்லியல் சான்றாக, தமிழ் எண் மைல்கல் கல்வெட்டுக்கள் உள்ளன. தமிழ் எண்கள் சமீப காலமாகத்தான் மக்கள் பயன்பாட்டிலிருந்து வழக்கொழிந்து போயுள்ளது” என்று தெரிவித்தார்.
இதையும் படிங்க: மாணவிகளின் காவடி ஆட்டம் நடனம்: கண்டுகளித்த அமைச்சர் ஜெயக்குமார்
