புதுக்கோட்டை: சிறப்பு விளையாட்டு விடுதிகளில் சேர மாணவர்களிடமிருந்து ஆன்லைன் மூலம் விண்ணப்பங்கள் வரவேற்கப்படுவதாக புதுக்கோட்டை மாவட்ட ஆட்சியர் அறிவித்துள்ளார்.
அதில், ''2023-2024ஆம் ஆண்டிற்கான சிறப்பு விளையாட்டு விடுதி மாணவ - மாணவியர்கள் கல்லூரிகளில் பயிலும் மாணவ, மாணவியர்களுக்கு விளையாட்டுத் துறையில் சாதனைகள் படைப்பதற்கு ஏற்ப, அறிவியல் பூர்வமான பயிற்சி, தங்குமிட வசதி மற்றும் சத்தான உணவுடன் கூடிய சிறப்பு விளையாட்டு விடுதிகள் தமிழ்நாடு விளையாட்டு மேம்பாட்டு ஆணையத்தின் மூலமாக செயல்பட்டு வருகின்றன.
மாணவர்களுக்கான சிறப்பு விளையாட்டு விடுதி ஜவஹர்லால் நேரு விளையாட்டரங்கம், சென்னையில் தடகளம், கூடைப்பந்து, குத்துச்சண்டை, கையுந்துபந்து, பளுதூக்குதல், வாள்வீச்சு விளையாட்டுகளும், தூத்துக்குடி மாவட்டம் கோவில்பட்டியில் ஹாக்கி விளையாட்டும் மற்றும் மாணவியர்களுக்கான சிறப்பு விளையாட்டு விடுதி - ஜவஹர்லால் நேரு உள் விளையாட்டரங்கம், சென்னையில் தடகளம், குத்துச்சண்டை, கையுந்து பந்து, கால்பந்து பளு தூக்குதல், ஜீடோ விளையாட்டுகளும், வேலூர் காட்பாடியில் கூடைப்பந்து, கைப்பந்து, ஹாக்கி, கபாடி விளையாட்டுகளும் செயல்பட்டு வருகின்றன.
விளையாட்டுத் தகுதிகள், மேற்காணும் மாணவ மாணவியர்களுக்கான சிறப்பு விளையாட்டு விடுதிகளில் உள்ள விளையாட்டுகளில் பயிற்சி பெற்று, சிறந்த விளையாட்டு வீரர் மற்றும் வீராங்கனையாக விளங்குவதற்கு (01.01.2023) 17 வயது நிரம்பிய 12-ம் வகுப்பில் தேர்ச்சி பெற்ற கல்லூரியில் இளநிலை மற்றும் முதுநிலை பயிலும் மாணவ மாணவியர்கள் தகுதியுடையவர் ஆவர்.
தனி நபர் மற்றும் குழு விளையாட்டுப் போட்டிகளில் விண்ணப்பிப்பவர்கள் மாநில அளவில் குடியரசு மற்றும் பாரதியார் தின விளையாட்டுப் போட்டிகள் மற்றும் அங்கீகரிக்கப்பட்ட மாநில விளையாட்டுக் கழகங்கள் நடத்தும் போட்டிகளில் முதல் மூன்று இடங்களில் வெற்றி பெற்றிருத்தல் வேண்டும் அல்லது தமிழ்நாடு அணியில் தேர்வு செய்யப்பட்டு தேசிய அளவில் தேசிய விளையாட்டு சம்மேளனங்கள் மற்றும் இந்திய பள்ளி விளையாட்டுக் கூட்டமைப்பு (SGFI) இந்திய விளையாட்டு அமைச்சகம் நடத்தும் போட்டிகளில் கலந்து கொண்டவர்களும் விண்ணப்பிக்கலாம்.
கையுந்துபந்து விளையாட்டில் 185 செ.மீ-க்கு மேல் உயரமுள்ள மாணவர்கள் மற்றும் 175 செ.மீ-க்கு மேல் உயரமுள்ள மாணவியர்களுக்கு முன்னுரிமை வழங்கப்படும். விளையாட்டில் சிறந்து விளங்கும் மற்றும் ஆர்வமுள்ள மாணவ - மாணவியர்கள் சிறப்பு விளையாட்டு விடுதி சேர்க்கைக்கான ஆன்லைன் விண்ணப்பப் படிவத்தினை 19.04.2023 முதல் www.sdat.tn.gov.in என்ற இணையதள முகவரியில் ஆன்லைன் மூலம் விண்ணப்பிக்கலாம்.
ஆன்லைன் விண்ணப்பத்தினை பூர்த்தி செய்திடுவதற்கான கடைசி நாள் 01.05.2023 அன்று மாலை 5.00 மணி ஆகும். ஆன்லைன் விண்ணப்பங்கள் மட்டுமே ஏற்றுக்கொள்ளப்படும். மற்ற விண்ணப்பங்கள் அனைத்தும் நிராகரிக்கப்படும். மேலும் தகவல்களுக்கு ஆடுகள தகவல் தொடர்பு மைய அலைப்பேசி 9514000777 என்ற எண்ணில் தொடர்பு கொள்ளலாம்.
சிறப்பு விளையாட்டு விடுதியில் சேர விரும்பும் மாணவ மாணவியர்களுக்கான மாநில அளவிலான தேர்வுப் போட்டிகள் 03.05.2023 அன்று காலை 7.00 மணியளவில் கீழ்க்கண்ட இடங்களில் நடத்தப்பட இருப்பதால் சிறப்பு விளையாட்டு விடுதி சேர்க்கை 03.05.2023 அன்று காலை 7.00 மணிக்கு மாணவ, மாணவியருக்கு தடகளம், குத்துச்சண்டை பளுதூக்குதல், கபடி (பெண்கள் மட்டும்) ஜவஹர்லால் நேரு விளையாட்டரங்கிலும், கூடைப்பந்து, கையுந்துபந்து, வாள்வீச்சு (ஆண்கள்), கால்பந்து, கைப்பந்து (பெண்கள் மட்டும்) ஜவஹர்லால் நேரு உள் விளையாட்டரங்கிலும், ஹாக்கி (மாணவ, மாணவிகளுக்கு) எம்.ஆர்.கே ஹாக்கி விளையாட்டரங்கிலும் நடத்தப்பட உள்ளது.
சிறப்பு விளையாட்டு விடுதிகளில் 2023-2024 ஆம் ஆண்டிற்கு கல்லூரியில் பயிலும் மாணவ மாணவியர்கள் சேர்க்கைக்கான ஆன்லைன் விண்ணப்ப படிவம் www.sdat.tn.gov.in எனும் இணைய தளம் மூலம் 01.05.2023 அன்று மாலை 5.00 மணிக்குள் ஆன்லைன் விண்ணப்பத்தினைப் பூர்த்தி செய்ய வேண்டும்.
சென்னையில் மாநிலத் தேர்வுகள் நடைபெறும் இடங்களில் 03.05.2023 அன்று காலை 7.00 மணி அளவில் மாநில அளவிலான தேர்வு நடைபெறும்போது நேரில் ஆஜராகுதல் வேண்டும்'' என மாவட்ட ஆட்சியர் கவிதா ராமு தெரிவித்துள்ளார்.
இதையும் படிங்க: பட்டியலினத்தவருக்கான 60% வீடுகள் இலக்கை அடையமுடியவில்லை - தணிக்கைத் துறை
