தமிழர்களின் கலாசாரம், பாராம்பரியம், வீரத்தை பறைசாற்றும் வகையில் பாரம்பரிய நிகழ்வான ஜல்லிக்கட்டுப் போட்டி, புதுக்கோட்டை மாவட்டம் விராலிமலையில் வருகின்ற 13ஆம் தேதி ஞாயிற்றுக்கிழமை நடைபெற உள்ளது.
இந்நிலையில், விராலிமலையில் ஜல்லிக்கட்டுப் போட்டி நடைபெறவுள்ள அம்மன்குளம் ஜல்லிக்கட்டுத்திடலில் முகூர்த்தக்கால் நடும் விழா இன்று நடைபெற்றது. இதில், மக்கள் நல்வாழ்வுத் துறை அமைச்சர் விஜய பாஸ்கர் கலந்துகொண்டு முகூர்த்தக்கால் நட்டு வைத்தார்.
பின்னர் செய்தியாளர்களிடம் பேசிய அமைச்சர், ' தமிழ்நாட்டில் மிகச்சிறந்த 600 காளைகள் மட்டும் இந்த ஜல்லிக்கட்டுப் போட்டிக்காக தேர்வு செய்யப்பட்டுள்ளது. இதில் பங்கேற்றும் வீரர்கள், காளைகள், பார்வையாளர்களுக்குப் பாதுகாப்பான போட்டியாக இந்த ஜல்லிக்கட்டுப் போட்டி நடைபெற உள்ளது. இப்போட்டியைக் காண ஒரு லட்சத்திற்கும் மேற்பட்ட பார்வையாளர்கள் வருகை தருவார்கள் என எதிர்பார்க்கப்படுகிறது.
ஜல்லிக்கட்டுப் போட்டிகளில் உச்ச நீதிமன்ற விதிமுறைகள், அரசு சார்பில் முறையாக பின்பற்றப்படும். ஜல்லிக்கட்டுப் போட்டியை நடத்தும் வகையில் கால்நடைத்துறை, மாவட்ட நிர்வாகம், காவல் துறை, தீயணைப்புத் துறை, மக்கள் நல்வாழ்வுத்துறை, கால்நடைத்துறை, வருவாய்த்துறை போன்ற பல்வேறு துறைகளின் சார்பில் தேவையான பணிகள் மேற்கொள்ளப்பட்டுள்ளன. தேவையான மருத்துவ வசதிகளும் தயார் நிலையில் வைக்கப்பட்டிருக்கும்' என்றார்.
இதையும் படிங்க: அவனியாபுரம் ஜல்லிக்கட்டு - பச்சை கொடி காட்டிய நீதிமன்றம்!
