மதுரை: பறவைகளையும் அதன் அழகையும் ரசிக்காத மனிதர்கள் இருக்கவே முடியாது. அப்படி அந்த பறவைகளை ரசிக்கும் மக்கள் அன்றாடம் அதைப் பார்த்து மகிழ வேண்டும் என்ற எண்ணத்தில் பச்சைக் கிளி உள்ளிட்ட வனப்பறவைகளை பிடித்து வந்து கூண்டில் போட்டு வளர்க்கிறார்கள். அந்த கூண்டில் கிளிக்குத் தேவையான உணவு, தண்ணீர், ஏறி விளையாடக் குட்டி மரக்கொம்பு, ஊஞ்சல் என அனைத்தும் கொடுத்து மிகச் சொகுசாகவே வளர்க்கிறார்கள்.
ஆனால் தங்கத்தில் பூட்டினாலும் விலங்கு விலங்குதானே என்பதை மனிதக் குலம் இன்றுவரை உணரவில்லை என்பதே உண்மை. அந்த கிளிகளோடு பேசி. பழகி வீட்டில் ஒரு உறுப்பினர் போலவே வளர்க்கும் நபர்களுக்குத் தெரியாது அந்த கிளி பறந்து சென்று தன் இனத்தோடு இணக்கமாக சேர்ந்து வாழ ஆசைப்படுகிறது என்று. தற்சார்ப்பு வாழ்வு என்பது மனிதர்களுக்கு மட்டும் அல்ல விலங்கு, பறவை என அனைத்திற்கும் உரியதுதானே.
அந்த வகையில் இந்த பறவைகளின் தற்சார்பு வாழ்வை உறுதி செய்ய மதுரை மாவட்டத்தில் வீட்டில் கிளி உள்ளிட்ட வனப்பறவைகள் வளர்க்கத் தடை விதிக்கப்பட்டுள்ளது. இதனைத் தொடர்ந்து கிராமப்புறங்களுக்கு நேரில் வந்த வன ஊழியர்கள், ஒலி பெருக்கி மூலம் கிளியை விட்டில் வளர்க்கத் தடை விதிக்கப்பட்டுள்ளது என்ற வாசகங்களை முழங்கச் செய்தனர். அதனுடன் வீட்டில் கிளி வளர்த்து வந்தவர்களை நேரில் சென்று பார்த்து அந்த கிளிகளைப் பறிமுதல் செய்தனர். ஜூலை 17-ஆம் தேதிக்குள் வீட்டில் வளர்க்கும் கிளிகளை வனத்துறையிடம் ஒப்படைக்க வேண்டும் மீறினால் வன பாதுகாப்பு சட்டத்தின் கீழ் நடவடிக்கை எடுக்கப்படும் என அறிவிப்பு வெளியிடப்பட்டுள்ளது. இந்த சம்பவம் மதுரை மக்களிடையே பேசுபொருளாகி இருக்கிறது.
இதையும் படிங்க: கோவையில் செந்தில் பாலாஜிக்கு நெருங்கியவர்களிடம் தொடங்கும் சோதனை: CISF-உடன் களமிறங்கிய வருமான வரித்துறை
அப்படி ஒரு வீட்டில் கிளியை பறிமுதல் செய்தபோது அந்த கிளியின் உரிமையாளர், பிள்ளைபோல் வளர்த்த என் கிளியை எடுத்துச்செல்கிறீர்களே எனக்கூறிக் குமுறி அழும் காட்சி பார்ப்போரைக் கண்கலங்கச் செய்கிறது. இருக்கட்டும் உங்கள் பிள்ளை காட்டில் சுதந்திரமாகச் சுற்றித் திரிந்து இன்னும் மகிழ்ச்சியோடு வாழப்போகிறது எனச் சந்தோஷம் கொள்ளுங்கள் என்றே நம்மால் ஆறுதல் கூற முடிகிறது.
இவர் மட்டும் அல்ல பண்டைய காலம் தொடங்கி இன்று வரை புறாக்கள், கிளிகள் உள்ளிட்ட பறவைகள் மனிதர்களோடு மனிதர்களாக ஒன்றெனக் கலந்து உறவாடி வாழ்ந்து வருகின்றன. புறாக்களின் காலில் தூது கட்டி அனுப்புவதும், கிளிகளை வீட்டுக் காவலுக்காக வைப்பதும் நம் தமிழ் மக்களின் வரலாற்றில் பதியப்பட்ட உண்மைகள். இருப்பினும் காலங்கள் கடக்கக் கடக்க மனிதர்களின் புரிதலை ஏற்று மனித பண்போடு அவைகளின் சுதந்திர வாழ்வில் நமக்கும் பங்குண்டு என்பதை உணர்ந்து ஏற்றுக்கொள்வோம்.
இதையும் படிங்க: போக்குவரத்து காவலருடன் மல்லுகட்டிய வாகன ஓட்டி.... நடந்தது என்ன?
