கரூர் மக்களவைத் தொகுதி திமுக கூட்டணி காங்கிரஸ் வேட்பாளர் ஜோதிமணி கரூர் மாவட்டம் கிருஷ்ணராயபுரம் சட்டப்பேரவை தொகுதிக்குட்பட்ட பல்வேறு கிராமங்களில் தீவிர தேர்தல் பரப்புரையில் ஈடுபட்டார்.
இதனைத் தொடர்ந்து நமது ஈடிவி பாரத் செய்தியாளரிடம் பேசுகையில், "தம்பிதுரை வாக்கு சேகரிக்க வந்தால் பொதுமக்கள் காலி குடங்களுடன் முற்றுகையிடுகின்றனர். தம்பிதுரையிடம் பணம் அதிகாரம் அனைத்தும் இருக்கலாம். ஆனால் எங்களுக்கு எந்த அச்சமும் இல்லை. நாங்கள் கண்ணியத்தால் தேர்தலை சந்திப்போம். இப்பொழுதுகூட எங்கள் சுற்றுப்பயணத்திற்கு மக்கள் குவிந்துவருகின்றனர்.
பொள்ளாச்சி பாலியல் சம்பவங்கள் போன்று நடைபெறாமல் இருக்க, கரூர் மக்களவைத் தொகுதியில் பெண்கள் மேம்பாடு மற்றும் பாதுகாப்பு மையங்கள் அமைக்கப்பட்டு இலவச உதவி எண் வழங்கப்படும். கரூரில் நலிவடைந்த சிறு, குறு நடுத்தர வணிகத்திற்கு ஜி.எஸ்.டி. போன்ற பிரச்னைகள் சரி செய்யப்படும்.
கேரள மாநிலம் மட்டுமல்ல இந்தியாவின் எந்தத் தொகுதியில் ராகுல் காந்தி போட்டியிட்டாலும் அவர் கண்டிப்பாக வெற்றி பெறுவார். அவரது வெற்றிக்காக இந்தியா காத்துக் கொண்டிருக்கிறது” என்றார்.
