கன்னியாகுமரி மாவட்டம் களியக்காவிளையில் சிறப்பு உதவி ஆய்வாளர் வில்சன் கொலைசெய்யப்பட்ட வழக்கு தொடர்பாக கைது செய்யப்பட்ட அப்துல் சமீம், தவுபிக் ஆகிய இருவரையும் பத்து நாள்கள் காவல் துறை காவலில் எடுத்து விசாரணை நடத்திவந்தனர். மேலும், கடந்த இரண்டு நாள்களாக நாகர்கோவில் நேசமணி நகர் காவல் நிலையத்தில் தனி படையினர் விசாரணை நடத்திவந்தனர்.
அதில், வில்சனை கொலை செய்துவிட்டு கேரளாவிற்கு தப்பி ஓடியதாகவும், எர்ணாகுளம் பேருந்து நிலையம் அருகேயுள்ள சாக்கடை ஓடையில் துப்பாக்கியை வீசி எறிந்ததாகவும் அவர்கள் கூறியுள்ளனர்.
இதனைத் தொடர்ந்து, நாகர்கோவிலிலிருந்து தனி படையினர் அப்துல் சமீம், தவுபிக் ஆகிய இருவருடன் இன்று கேரளா மாநிலம் எர்ணாகுளம் பேருந்து நிலையதிற்குச் சென்று அங்குள்ள சாக்கடை ஓடையில் இறங்கி தேடினர்.
காவல் துறையினர் நடத்திய ஒரு மணி நேர தேடுதல் வேட்டைக்கு பிறகு சாக்கடையிலிருந்து குற்றவாளிகள் இருவரும் கொலை செய்ய பயன்படுத்திய 7.65 எம்.எம். பிஸ்டல், ஐந்து தோட்டாக்களை கண்டெடுத்தனர்.
நாளை முழுவதும் கேரளாவில் விசாரணை நடத்திவிட்டு நாளை மறுநாள் குற்றவாளிகள் இருவரையும் கர்நாடகா அழைத்து சென்று விசாரிக்கவும் தனிப்படையினர் திட்டமிட்டு ள்ளதாக கூறப்படுகிறது.
இதையும் படிங்க:
