கன்னியாகுமரி மாவட்டம் கோட்டாறு பகுதியில் குடிசை அமைத்து வாழ்ந்துவந்த கணேசன்(70) என்பவரது குடும்பம் சிறுவயதில் ரயில் தண்டவாளங்கள் போடுவதற்காக நிலம் கையகப்படுத்தப்பட்டபோது வீட்டை இழந்தது. பின்னர் ஊர் ஊராகச் சென்று சாலையோரங்களில் தங்கி, குடை தைக்கும் தொழில்செய்து கணேசன் தனது குடும்பத்தைக் காப்பாற்றிவந்தார். இவருக்கு சரசு என்ற மனைவியும் லஷ்மி என்ற மகளும் சத்தியராஜ் என்ற மகனும் உள்ளனர்.
ஏழு ஆண்டுகளுக்கு முன்பு இவரது மகளும், மகனும் அவரவருக்கு பிடித்தவர்களைக் காதல் திருமணம் செய்துகொண்டு பெற்றோரை தனியாகத் தவிக்கவிட்டுச் சென்றுவிட்டனர். சிறிது நாட்கள் கழித்து பிள்ளைகள் எங்கு இருக்கிறார்கள் என்ற தகவல்கூட கிடைக்காமல்போனது. பின்னர், இருவரும் வீடு வீடாக குடை, செருப்பு ஆகியவை தைப்பது, ஈயம் பூசுவது போன்ற பணிகளைச் செய்து பிழைப்பு நடத்திவந்தனர். இதற்கிடையே பிள்ளைகள் எங்கு இருக்கிறார்கள் எனவும் அவர்கள் ஊர் ஊராகத் தேடிவருகின்றனர்.
ஆதரவின்றி ஊர் ஊராகச் சென்று நாடோடி வாழக்கை நடத்திவரும் இந்த தம்பதிக்கு, இறப்பதற்கு முன்பு ஒரு முறையாவது தங்களது மகனையும் மகளையும் பார்த்துவிட வேண்டுமென்ற ஆசையோடு தமிழ்நாடு, கேரளா உட்பட பல இடங்களில் பல வருடங்கள் கடந்தும் தேடிவருகின்றனர்.
இதுவரை, அவர்களைக் கண்டுபிடிக்க முடியாத நிலையில் தற்போது தம்பதி இருவரும் கன்னியாகுமரியில் உள்ள மார்த்தாண்டம் மேம்பாலத்தின் அடியில் இரவிலும் பகலிலும் எந்தவித பாதுகாப்புமின்றி தங்கியுள்ளனர். வயது முதிர்ந்த காரணமாக வேலைக்கும் செல்ல முடியாமல், உணவுக்கு வழியுமின்றி பிறர் தரும் உணவை வாங்கி உண்ணும் அவல நிலைக்குத் தள்ளப்பட்டுள்ளனர்.
இதையும் படிங்க: ’செம க்யூட்’... 19 மாதக்குழந்தை குறித்து மோடி ட்வீட்
