திண்டுக்கல் மாவட்டம் வேடசந்தூர் அருகே கொங்கு நகரைச் சேர்ந்த பழனிசாமி தனது குடும்பத்துடன் வசித்துவந்தார். இவரை கடந்த சில தினங்களாக காணவில்லை என அவரது சகோதரர் ராஜ்குமார் வேடசந்தூர் காவல்நிலையத்தில் புகார் அளித்தார். ராஜ்குமாரின் புகாரை ஏற்றுக்கொண்ட காவல்துறையினர் பழனிசாமியை தீவிரமாக தேடி வந்தனர்.
இந்நிலையில், நேற்று வேடசந்தூர்-ஒட்டன்சத்திரம் அருகே நான்கு கிலோமீட்டர் தொலைவில் செங்குளம் என்ற இடத்தில் ஆடு மேய்த்து கொண்டிருந்தவர்கள் ஏதோ துர்நாற்றம் வீசுவதை உணர்ந்து நேரில் சென்று பார்த்துள்ளனர். அப்போது 65 வயது மதிக்கத்தக்க ஆண் சடலத்தைக் கண்டு அதிர்ச்சி அடைந்தனர்.
அதன்பின்னர் வேடசந்தூர் காவல்நிலையத்திற்கு தகவல் கொடுக்கப்பட்டது. அதனடிப்படையில், சம்பவ இடத்திற்கு வந்த வேடசந்தூர் காவல்துறையினர் அழுகிய நிலையில் இருந்த உடலை கைப்பற்றி சோதனை செய்து பார்த்ததில், அவர் கொங்குநகரை சேர்ந்த பழனிசாமி என தெரியவந்தது.
பின்பு, இது கொலையா? தற்கொலையா? அல்லது வேறு ஏதும் காரணமா என்ற கோணத்தில் காவல்துறையினர் விசாரணை மேற்கொண்டுவருகின்றனர்.
