கோவை மாவட்டம் துடியலூரை அடுத்த பன்னிமடையில் கடந்த மார்ச் மாதம் ஆறு வயது சிறுமி பாலியல் வன்புணர்வு செய்யப்பட்டு கொலை செய்யப்பட்டார். இது தொடர்பாக சந்தோஷ் குமார் என்பவர் கைது செய்யப்பட்டிருந்தார்.
இந்த வழக்கு கோவை மகளிர் நீதிமன்றத்தில் நடைபெற்று வந்த நிலையில் கடந்த இரு வாரங்களுக்கு முன்பு போக்சோ நீதிமன்றத்திற்கு மாற்றப்பட்டது.
வழக்கு விசாரணை முடிந்த நிலையில் நேற்று காலை தீர்ப்பு வழங்கப்பட்டது. இந்த வழக்கை விசாரித்த நீதிபதி ராதிகா, சந்தோஷ் குமாரை குற்றவாளி என அறிவித்தார். பின் தண்டணை விபரத்தை மாலை 3 மணிக்கு நீதிபதி ராதிகா தீர்ப்பை வாசித்தார். அதில் சிறுமியை பாலியல் வன்புணர்வு செய்ததற்காக போக்சோ பிரிவின் அடிப்படையில் வாழ்வின் இறுதிக் கட்டம் வரை ஆயுள் தண்டனை அனுபவிக்கவும், சிறுமியைக் கொலை செய்ததற்கு தூக்கு தண்டனையும், தடயங்களை மறைத்ததற்காக ஏழு ஆண்டு சிறை தண்டனையும் விதித்து உத்திரவிட்டார்.
நீதிமன்றம் தீர்ப்பு வழங்கியதை தொடர்ந்து நீதிமன்ற வளாகத்திலிருந்த ஜனநாயக மாதர் சங்கத்தினர் முழக்கங்கள் எழுப்பி தீர்ப்பினை வரவேற்றனர்.
இதுகுறித்து பேட்டியளித்த உயிரிழந்த சிறுமியின் தாயார்,
"குழந்தைகளை பாலியல் வன்கொடுமை செய்பவர்களுக்கு ஒரு பாடமாக இந்த தீர்ப்பு இருக்க வேண்டும். இந்த வழக்கில் தொடர்புடைய மற்றொரு குற்றவாளியும் கண்டு பிடித்து தூக்கிலிடப்பட வேண்டும். மிக விரைவில் அந்த இன்னொரு குற்றவாளியை காவல்துறை கைது செய்ய வேண்டும்" எனத் தெரிவித்தார்.
தொடர்ந்து பேசிய ஜனநாயக மாதர் சங்க நிர்வாகி வனஜா நடராஜன், "இந்த தீர்ப்பை வழங்கிய நீதிமன்றத்திற்கு நன்றியை தெரிவித்து கொள்கிறேன், எங்கள் போராட்டத்திற்கு கிடைத்த வெற்றியாக இதை பார்க்கின்றோம். இன்னொரு குற்றவாளிகளை பிடிக்க காவல்துறை நடவடிக்கை எடுக்க வேண்டும்" என வலியுறுத்தினார்.
அதற்கு அடுத்து பேசிய அரசுத் தரப்பு வழக்கறிஞர் சங்கர நாராயணன்,
"குழந்தையின் குடும்பத்திற்கு பத்து லட்சம் இழப்பீடு அரசு கொடுக்க வேண்டும். கருப்பையில் இருந்த மற்றொரு விந்தணு யாருடையது என்பதை விசாரிக்க தனியாக பெண் அலுவலரை நியமித்து விசாரிக்க வேண்டும் எனக் காவல்துறைக்கு உத்திரவிட்டு இருக்கிறது.
நீதிமன்றத்தில் ஆஜர்படுத்தபட்ட 26 சாட்சிகளும் முரண்பாடில்லாம் சாட்சியளித்தனர். அரசு தரப்பிற்கு டி.என்.ஏ. ரிப்போர்ட் இறுதியாகதான் தெரிந்தது, சந்தோஷ் குமார் வழக்கை முடித்துவிட்டு சட்டரீதியாக டி.என்.ஏ. ரிப்போட்டில் இருந்த மற்றொரு நபரை பிடிக்க காவல்துறை யோசித்து கொண்டு இருந்தது எனவும், அதற்குள் அவசரப்பட்டு சிறுமியின் தாயார் நீதிமன்றத்தில் மனு தாக்கல் செய்துள்ளார்.
மற்றொரு குற்றவாளி மீது சரியான நடவடிக்கையினை காவல்துறை எடுக்கும். பெண் குழந்தைகளுக்கு யாரும் வன்கொடுமை செய்ய கூடாது என்ற எண்ணம் ஏற்படும் வகையில் இந்த தீர்ப்பு அமைந்துள்ளது. மேலும் இந்த வழக்கின் வெற்றிக்கு காரணம் காவல்துறையின் உடனடி நடவடிக்கை" என்றார்.
கோவையில் போக்சோ நீதிமன்றம் தொடங்கப்பட்டு அதில் வழங்கப்படும் முதல் தூக்கு தண்டணை தீர்ப்பு இது என்பது குறிப்பிடத்தக்கது.
இதையும் படியுங்க:
'நான் கூப்பிடும் போதெல்லாம் வரணும்' - சிறுமியை தொடர்ந்து பாலியல் வல்லுறவு செய்த மாணவன்!
