மத்திய அரசின் பட்ஜெட்டை மத்திய நிதி அமைச்சர் நிர்மலா சீதாராமன் இன்று (பிப். 01) தாக்கல் செய்தார். இந்த பட்ஜெட்டுக்கு கோவை தொழில் துறையினர் வரவேற்பு அளித்துள்ளனர். இதுகுறித்து இந்திய தொழில் வர்த்தக மையத்தின் கோவை கிளை தலைவர் பாலசுப்பிரமணியம் கூறுகையில், "கரோனா நெருக்கடியிலிருந்து மீண்டு வரும் வகையிலும் பணப்புழக்கத்தை அதிகரிக்கும் வகையிலும் பட்ஜெட் உள்ளது.
அறிவிக்கப்பட்ட 7 ஜவுளி பூங்காக்களில் ஒரு ஜவுளி பூங்கா கோவையில் அமைக்க வேண்டும். சாலை வசதி, சென்னை மெட்ரோ ரயில் விரிவாக்கம் உள்ளிட்ட திட்டங்களுக்கு நிதி ஒதுக்கீடு செய்யப்பட்டுள்ளது. சிறு குறு தொழில்களுக்கு 50 ஆயிரம் கோடி ரூபாய் நிதி ஒதுக்கீடு செய்யப்பட்டுள்ளது. இது தொழில் துறையினருக்கு உதவியாக இருக்கும். ஒட்டுமொத்தமாக தொழில் துறையினருக்கு சாதகமாகவும் தொழில் வளர்ச்சியை அதிகரிக்கும் வகையிலும் இந்த பட்ஜெட் உள்ளது.
மத்திய பட்ஜெட் குறித்து தொழில் வர்த்தக சபை முன்னாள் தலைவர் பாலசுந்தரம் கூறுகையில், பட்டு நூல் இறக்குமதி வரி அதிகரிக்கப்பட்டுள்ளதால் உள்ளூரில் உற்பத்தி செய்யும் விவசாயிகளுக்கும் பட்டு வளர்ப்பவர்களுக்கும் பயனுள்ளதாக இருக்கும். வயதானவர்களுக்கு வருமான வரி சலுகை வழங்கப்பட்டுள்ளது.
இரண்டு தனியார் வங்கிகள் பொதுத்துறை வங்கிகள் தனியார் மயமாக்கப்படும் என அறிவிக்கப்பட்டுள்ளது. தமிழ்நாட்டிற்கு நிதி அதிகமாக ஒதுக்கப்பட்டுள்ளதால் சட்டப்பேரவைத் தேர்தலையொட்டி அறிவிக்கப்பட்டதாக தெரியவில்லை எனத் தெரிவித்தார்.
இதையும் படிங்க: பட்ஜெட் 2020-21: பாதுகாப்புத் துறைக்கு 15 ஆண்டுகளில் இல்லாத அளவுக்கு அதிக தொகை ஒதுக்கீடு
