கோவையில் 54ஆவது ஆண்களுக்கான நாச்சிமுத்துகவுண்டர் கோப்பை, 18ஆவது பெண்களுக்கான சி.ஆர்.ஐ. பம்ப்ஸ் கோப்பைக்கான அகில இந்திய கூடைப்பந்து போட்டிகள் மே 27ஆம் தேதி தொடங்கியது. கோவையில் உள்ள வ.உ.சி. பூங்கா மாநகராட்சி விளையாட்டு அரங்கத்தில் நடைபெற்ற இந்தப் போட்டிகளில் அகில இந்திய அளவில் முன்னணியில் உள்ள எட்டு ஆண்கள் அணி, எட்டு பெண்கள் அணி என மொத்தம் 16 அணிகள் கலந்துகொண்டன.
இதில் நாச்சிமுத்து கவுண்டர் கோப்பைக்கான ஆண்கள் இறுதிப் போட்டியில் வருமான வரி அணியை எதிர்த்து இந்தியன் வங்கி அணி விளையாடியது. இப்போட்டியில் இந்தியன் வங்கி அணி 74-64 என்ற புள்ளிகள் அடிப்படையில் வெற்றிக் கோப்பையைத் தட்டிச் சென்றது. வெற்றிபெற்ற இந்தியன் வங்கி அணிக்கு ஒரு லட்ச ரூபாய் ரொக்கப் பரிசும் சுழற்கோப்பையும் வழங்கப்பட்டன. இரண்டாம் இடம் பிடித்த வருமான வரித்துறை அணிக்கு 50 ஆயிரம் ரொக்கமும், கோப்பையும் வழங்கப்பட்டன.
இதே போன்று சி.ஆர்.ஐ. பம்ப்ஸ் கோப்பைக்கான பெண்கள் பிரிவில் தென்னக ரயில்வே சென்னை அணியை எதிர்த்து தென் மத்திய ரயில்வே செகந்திராபாத் அணி விளையாடியது. பரபரப்பான இந்த ஆட்டத்தில் இரு அணிகளும் மாறி மாறி புள்ளிகள் பெற்றதால் யார் வெற்றி பெறுவார்கள் என்ற எதிர்பார்ப்பு ஏற்பட்டது.
இறுதியில் தென்னக ரயில்வே அணி 57-55 என்ற புள்ளி கணக்கில் வெற்றிபெற்று சி.ஆர்.ஐ. சுழற்கோப்பை, 50 ஆயிரம் பரிசுத் தொகையையும் தட்டிச் சென்றது. இரண்டாம் இடம் பிடித்த தென் மத்திய ரயில்வே செகந்திராபாத் அணிக்கு 25,000 ரொக்கப் பரிசும் கோப்பையும் வழங்கப்பட்டன.
இறுதிப் போட்டியைத் தொடர்ந்து நடைபெற்ற பரிசளிப்பு விழாவிற்கு சிறப்பு விருந்தினராக கோயம்புத்தூர் மாநகர காவல் துறை சட்டம் ஒழுங்கு துணை ஆணையர் டாக்டர். பாலாஜி சரவணன் கலந்துகொண்டு போட்டிகளில் வெற்றிபெற்றவர்களுக்கு பரிசுகளை வழங்கினார்.
விழாவிற்கு கவுரவ விருந்தினராக கோயம்புத்தூர் சக்தி குழுமங்களின் தலைவர் டாக்டர். எம். மாணிக்கம் கலந்துகொண்டார். கோவை மாவட்ட கூடைப்பந்து கழகத் தலைவரும், சி.ஆர்.ஐ. குழுமங்களின் இணை நிர்வாக இயக்குநருமான ஜி. செல்வராஜ் உள்ளிட்டோர் உடன் இருந்தனர்.
