சென்னை கோடம்பாக்கம், ஆர்.கே புரத்தைச் சேர்ந்தவர் அஜித்(21) மற்றும் , அஜய் (18). இவர்கள் இருவரும் வள்ளுவர் கோட்டம் சுதந்திர பார்க் அருகே நேற்றிரவு இருசக்கர வாகனத்தில் வேகமாக சென்றனர். அப்போது கட்டுப்பாட்டை இழந்து சாலையின் ஓரத்தில் நடைமேடை தடுப்பில் இருசக்கர வாகனம் வேகமாக மோதியது.
இதில் அஜய் சம்பவ இடத்திலேயே பரிதாபமாக உயிரிழந்தார். பிறகு தகவலறிந்து சம்பவ இடத்திற்கு சென்ற காவல் துறையினர் உயிருக்கு போராடி கொண்டிருந்த மற்றொரு இளைஞரான அஜித்தை மீட்டு அரசு மருத்துவமனைக்கு அனுப்பி வைத்தனர். இருப்பினும் அஜித் மருத்துவமனை செல்லும் வழியிலேயே உயிரிழந்தார்.
பிறகு இருவரின் உடல்களையும் காவல் துறையினர் உடற்கூறாய்விற்காக அரசு பொது மருத்துவமனைக்கு அனுப்பி வைத்தனர். மேலும் விபத்து தொடர்பாக பாண்டிபஜார் போக்குவரத்து புலனாய்வு காவல்துறையினர் சிசிடிவி பதிவுகள ஆய்வு செய்து விசாரணை மேற்கொண்டு வருகின்றனர்.
இதேபோல நுங்கம்பாக்கம் நெடுஞ்சாலையிலும் வேகமாக இருசக்கர வாகனம் இயக்கி படுகாயம் அடைந்த 22 வயது மதிக்கத்தக்க இளைஞர் ஒருவர் பலத்த படுகாயமடைந்தார். அவரை காவல் துறையினர் மீட்டு சிகிச்சைக்காக ராயப்பேட்டை அரசு பொது மருத்துவமனைக்கு அனுப்பி வைத்தனர்.
