சட்டப்பேரவையில் காவல் துறை மானியக் கோரிக்கை மீதான விவாதத்தில், திமுக உறுப்பினர் ஐ. பெரியசாமி பேசுகையில், சிலை கடத்தல் தடுப்புப் பிரிவிற்கு போதிய வசதிகளை இந்த அரசு செய்து தரவில்லை என்று குற்றம்சாட்டினார்.
அரிய பொக்கிஷமான நடராஜர் சிலை ஆஸ்திரேலியாவுக்கு கடத்தப்பட்டு, தற்போது அங்குள்ள அருங்காட்சியகத்தில் வைக்கப்பட்டுள்ளதாக குறிப்பிட்ட ஐ. பெரியசாமி, அதனை தருவதற்கு தயார் என அந்நாடு அறிவித்தும், சிலையை மீட்க எந்த ஒரு நடவடிக்கையும் எடுக்கவில்லை என்று அவர் புகார் தெரிவித்தார்.
மேலும், சிலை கடத்தல் தடுப்புப் பிரிவின் சிறப்பு அலுவலர் பொன். மாணிக்கவேலுக்கு, தேவையான வசதிகளை செய்து தர வேண்டும் என சென்னை உயர் நீதிமன்றம் உத்தரவிட்டதை எதிர்த்து, அரசு உச்ச நீதிமன்றத்தில் மேல் முறையீடு செய்ததை சுட்டிக்காட்டிய அவர், அங்கும் அதே உத்தரவு வந்த பிறகும் எந்த ஒரு வசதிகளும் செய்யவில்லை என்று குற்றம்சாட்டினார்.
சிலைகள் என்பது விலை மதிப்பில்லாதது எனவும், தமிழர்களின் வரலாறு அடங்கியது எனவும் தெரிவித்த ஐ. பெரியசாமி, 'இப்படிப்பட்ட ஒரு முக்கியமான பிரிவிற்கு போதிய வசதி செய்து தராததற்கு காரணம், உங்களது, ‛ஈகோ’தான்' என்று ஆவேசமாகக் பேசினார்.
நம்மை எதிர்த்து வழக்கு தொடர்ந்தாரே என்ற காரணத்திற்காக, பொன். மாணிக்கவேலுக்கு எந்த வசதியையும் செய்துதரவில்லை என்றும் தெரிவித்தார்.
இதற்கு முதலமைச்சர் எடப்பாடி பழனிசாமி, "சிலை கடத்தல் தடுப்புப் பிரிவு சிறப்பு அலுவலரான பொன்.மாணிக்கவேல், சிறப்பு அலுவலராக நியமிக்கப்படுவதற்கு முன்பே, அதேப் பிரிவில் பணியாற்றிவந்தார்.
அவரது பணிக்காலத்தில் 31 வழக்குகள் மட்டுமே பதியப்பட்டன; அதில் ஏழு வழக்குகளில்தான் குற்றவாளிகளுக்கு தண்டனை பெற்றுத்தந்துள்ளார். உயர் நீதிமன்றத்தின் உத்தரவை ஏற்று, பல்வேறு நிலைகளில், 204 காவல் துறை அலுவலர்கள், காவலர்கள் அந்தப் பிரிவில் நியமிக்கப்பட்டுள்ளனர்.
600 விழுக்காடு அளவிற்கு காவல் துறை அலுவலர்கள், காவலர்கள் எண்ணிக்கை அதிகரிக்கப்பட்டுள்ளது. அந்தப் பிரிவுக்காக ரூ.22 கோடி செலவு செய்யப்பட்டுள்ளது" என்று விளக்கம் அளித்தார்.
