இதுகுறித்து மருத்துவர்கள் சங்கத்தின் பொதுச் செயலாளர் ரவீந்திரநாத் வெளியிட்டுள்ள செய்திக்குறிப்பில், "கரோனா பாதிப்பிற்கு உள்ளானோர் 80 விழுக்காட்டினர், அதற்கான முக்கிய அறிகுறிகளான காய்ச்சல், இருமல், சளி, தொண்டை வலி உள்ளிட்டவைகள் இல்லாமல் உள்ளனர் என அரசின் புள்ளி விவரங்கள் தெரிவிக்கின்றன.
அத்தகையோர் வேறு உடல் நலப்பிரச்சினைகளுக்காக மருத்துவமனைகளுக்கு வருகின்றனர். அதனால் அவர்களுக்குச் சிகிச்சை வழங்கக்கூடிய மருத்துவக் குழுவினருக்கும்,108 ஆம்புலன்ஸ் ஊழியர்கள், லேப் டெக்னீசியன்கள் உள்ளிடோருக்கும் கரோனா தொற்று ஏற்பட வாய்ப்புள்ளது. எனவே கரோனா சிகிச்சை பிரிவில் மட்டுமின்றி, இதர பிரிவுகளில் பணிபுரியும் மருத்துவப்பணியாளர்களுக்கும் பாதுகாப்பு கவசங்களை வழங்க வேண்டும் என உச்ச நீதிமன்றம் கூறியுள்ளது.
ஆனால், தமிழ்நாட்டில் கரோனா வார்டு தவிர இதர பிரிவுகளில் பணிபுரியும் மருத்துவக்குழுவினர்கள் எவருக்கும் பாதுகாப்பு கவச உடைகள் வழங்கப்படவில்லை. இதனால் ஏராளமான மருத்துவர்களுக்கும், மருத்துவப் பணியாளர்களுக்கும் கரோனா தொற்று ஏற்பட்டுள்ளது. அதனால் இதுகுறித்து பல முறை கோரிக்கை வைத்தும் தமிழ்நாடு அரசு கவச உடைகள் வழங்குவதை நடைமுறை படுத்தவில்லை.
எனவே உச்ச நீதிமன்ற தீர்ப்பின் அடிப்படையில், கரோனா சிகிச்சை பிரிவு மட்டுமின்றி, இதரப் பிரிவுகளில் பணிபுரிவோருக்கும், 108 ஆம்புலன்ஸ் ஊழியர்களுக்கும் உடனடியாக பாதுகாப்பு கவச உடைகளை வழங்க அரசு நடவடிக்கை எடுக்க வேண்டும்.
இதையும் படிங்க: கரோனாவை கண்டறியும் 1000 பிசிஆர் கருவிகள் - சென்னை மாநகராட்சிக்கு வழங்கியது டாடா குழுமம்
