சென்னை: பத்ம ஷேசாத்ரி பால பவன் பள்ளியில் மாணவிகளுக்குப் பாலியல் துன்புறுத்தல் கொடுத்த விவகாரத்தில் ராஜகோபால் என்ற ஆசிரியரை, அசோக் நகர் மகளிர் காவலர்கள் போக்சோ சட்டத்தின்கீழ் கைதுசெய்து சிறையில் அடைத்தனர். தற்போது, அவரை காவலில் எடுத்து விசாரிக்க முடிவு செய்து அசோக் நகர் மகளிர் காவலர்கள், மகிளா நீதிமன்றத்தில் மனுதாக்கல் செய்யவுள்ளனர். ஐந்து நாட்கள் காவலில் எடுத்து விசாரிக்கத் திட்டமிடப்பட்டுள்ளதாகக் கூறப்படுகிறது.
40 மாணவிகள் புகார்
ராஜகோபாலால் பாதிக்கப்பட்ட மாணவிகள், பெண்கள் மற்றும் குழந்தைகளுக்கு எதிரான குற்றத்தடுப்புப்பிரிவு காவல் துறை துணை ஆணையர் ஜெயலட்சுமியின் வாட்ஸ்அப் எண்ணிற்குத் தகவல்களை அனுப்பும்படி காவல் துறை கேட்டுக்கொண்டது. அதன்படி, சுமார் 40 மாணவிகள், பெற்றோர்களின் பல்வேறு தகவல்களை வாட்ஸ்அப்பில் அனுப்பியுள்ளனர். அதில், 15 மாணவிகள், பெற்றோர்கள் தமிழ்நாட்டின் பிற பள்ளிகளில் பாலியல் தொல்லைகள் நடந்துள்ளது எனக் குறிப்பிட்டுள்ளனர்.
இந்தத்தகவல்கள் தமிழ்நாடு பெண்கள் மற்றும் குழந்தைகளுக்கு எதிரான குற்றத்தடுப்புப் பிரிவுக்கு அனுப்பப்பட்டுள்ளன. அதுதொடர்பாக விசாரணை மேற்கொள்ளவுள்ளதாகவும் தகவல்கள் வெளியாகியுள்ளன. ராஜகோபால் மீது மாணவிகள் ஏற்கெனவே புகார் கொடுத்தும், பள்ளி நிர்வாகம் நடவடிக்கை எடுக்காமல் இருந்ததா? பள்ளி மாணவிகள், பெற்றோர்கள் புகார் அளித்தும் நடவடிக்கை எடுக்காதது ஏன்? என்பது தொடர்பாக அப்பள்ளியின் முதல்வர், தாளாளரிடம் நேற்று அசோக் நகர் அனைத்து மகளிர் காவலர்கள் விசாரணை நடத்தினர்.
2ஆவது முறையாக பள்ளி முதல்வரிடம் விசாரணை
இந்நிலையில், இன்று காலை பள்ளி முதல்வரை மீண்டும் விசாரணைக்கு ஆஜராகும்படி காவல் துறை உத்தரவிட்டிருந்தது. அதன்படி காலை 10.25 மணியளவில் காவல் நிலையம் வந்த அப்பள்ளியில் முதல்வரிடம் சுமார் மூன்று மணி நேரம் விசாரணை நடத்தப்பட்டது. இந்த பாலியல் துன்புறுத்தல் விவாகரத்தில், மேலும் மூவருக்குத் தொடர்பு இருப்பதாக காவல் துறையினர் சந்தேகித்துள்ளனர்.
அதுதொடர்பாக காவல் துறையினர் பள்ளி முதல்வரிடம் விசாரணை நடத்தப்பட்டுள்ளதாக காவல் துறையினர் தெரிவிக்கின்றனர். ஆனால், காவல் துறையினரின் பல கேள்விகளுக்குப் பள்ளி முதல்வர் தெரியாது என்றே பதிலைக் கூறியுள்ளார்.
நேற்று அவர் விசாரணைக்கு ஆஜரானபோது, சுமார் 100 கேள்விகள் கேட்கப்பட்டுள்ளன. அதற்கு அவர் அளித்த பதில்களை வாக்குமூலமாகவும், வீடியோ பதிவாகவும் காவல் துறையினர் பதிவு செய்துள்ளனர்.
இன்று விசாரணை முடிந்து காவல் நிலையத்தை விட்டு வெளியே வந்த அவரிடம், செய்தியாளர்கள் பல்வேறு கேள்விகளைக் கேட்டனர். ஆனால், அந்த கேள்விகள் எதற்கும் பதிலளிக்காமல் அவர் தனது காரில் ஏறி சென்றுவிட்டார்.
அப்பள்ளியில் ஆன்லைன் வகுப்பைக் கண்காணிப்பது யார்? ஒருங்கிணைப்பது யார்? என்பது தொடர்பாக விசாரணையை காவல் துறையினர் தீவிரப்படுத்தி உள்ளனர்.
மாணவிகளுக்குப் பாலியல் துன்புறுத்தல் கொடுத்த இந்த விவகாரத்தில் யாருக்கெல்லாம் தொடர்பு இருக்கிறது? என்ற ஆதாரங்களைத் திரட்டும் பணியில் காவல் துறையினர் தீவிரம் காட்டி வருகின்றனர்.
இதையும் படிங்க: ’பெற்றோர்களே புரிந்துக்கொள்ளுங்கள்... இவ்வளவு தான் போக்சோ!’
