சென்னை அமைந்தக்கரை செல்லம்மாள் தெரு பகுதியில் அருள்ராஜ் - நந்தினி என்ற தம்பதியினர் வசித்து வருகின்றனர். நந்தினி தனியார் மருத்துவமனையில், மருத்துவராக பணிபுரிந்து வருகிறார். இவர்களுக்கு மூன்றரை வயதில் பெண் குழந்தை உள்ளது. இக்குழந்தையை பள்ளியில் கொண்டு செல்வதற்கும், பள்ளி முடிந்து வீட்டிற்க்கு அழைத்து வருவதற்கும் அம்பிகா(29) என்ற பெண்ணை வேலையில் அமர்த்தியுள்ளனர். இந்நிலையில் நேற்று பள்ளி முடிந்த பின், வெகு நேரமாகியும் குழந்தை வரவில்லை என அமைந்தகரை காவல் நிலையத்தில் பெற்றோர் புகார் அளித்தனர்.
அப்போது, பணிப்பெண் மீது சந்தேகம் இருப்பதாகவும் புகாரில் கூறினர். இதனையடுத்து காவல் ஆணையர் ஏ.கே.விஸ்வநாதன் நேரடியாக ஆபரேஷனை கண்காணிக்க, அண்ணா நகர் துணை ஆணையர் முத்துசாமி, தலைமையில் தனிப்படை அமைத்து குழந்தையை தீவிரமாக தேடி வந்தனர். அப்போது நந்தினியின் செல்போன் எண்ணிற்கு பேசிய மர்ம நபர் ஒருவர், குழந்தை என்னிடம் தான் உள்ளது. குழந்தை உயிருடன் வேண்டுமென்றால் 60 லட்சம் ரூபாய் தர வேண்டும் எனவும் கூறி அழைப்பை துண்டித்து விட்டார்.
பின்னர் அதில் வந்த செல்போன் எண்ணை தீவிரமாக ட்ராக் செய்தபோது, அந்த எண் செங்குன்றம் பகுதியில் இயங்கியது தெரியவந்தது. உடனே அங்கு விரைந்த தனிப்படை போலீசார், அந்த மர்ம நபரை கைது செய்தனர். பின்னர் அவரிடம் நடத்திய விசாரணையில், அவரது பெயர் முகமது கலிமுல்லா ஷேக் என்பதும், புழல் பகுதியில் கறிக்கடையில் மேலாளராக பணியாற்றி வருவதும் தெரியவந்தது.
போலீசார் தொடர்ந்து மேற்கொண்ட விசாரணையில், இவர் பணிப்பெண் அம்பிகாவின் காதலர் என்றும் அம்பிகாவின் உதவியுடனே குழந்தை கடத்தப்பட்டுள்ளது என்பதும் கண்டுபிடிக்கப்பட்டது.
கடத்திய குழந்தை எங்கே என விசாரித்தபோது, குழந்தையுடன் அம்பிகா கோவளத்தில் பதுங்கி இருப்பதாக கூறினார். பின்னர் அங்கு விரைந்த தனிப்படையினர், பணிப்பெண் அம்பிகாவை கைது செய்து குழந்தையை மீட்டனர். குழந்தை கடத்தப்பட்டு ஆறு மணி நேரத்திற்குள் மீட்ட காவல்துறையினருக்கு. பெற்றோர்கள் நன்றி தெரிவித்தனர்.
