நிதிப் பரிவர்த்தனை அறிக்கை முறையாக சமர்ப்பிக்காததால் பத்தாயிரம் வழக்குகள் - வருமான வரித்துறை

தமிழகம் முழுவதும் நிதிப் பரிவர்த்தனை அறிக்கையில் முறையாக கணக்கு காட்டாத விவகாரத்தில் பத்தாயிரம் வழக்குகள் போடப்பட்டுள்ளதாக வருமான வரித்துறை தெரிவித்துள்ளது.

சென்னை: தமிழகம் முழுவதும் நிதிப் பரிவர்த்தனை அறிக்கை முறையாக கணக்கு காட்டாத விவகாரத்தில் பத்தாயிரம் வழக்குகள் போடப்பட்டுள்ளதாக வருமான வரித்துறை தெரிவித்து உள்ளது. மேலும், கடந்த ஆண்டை விட இரு மடங்கு அதிகமாக இருப்பதாகவும் தெரிவித்து உள்ளனர். முறையாக கணக்குக் காட்டாத வங்கிகள், சார் பதிவாளர் அலுவலகம் உள்ளிட்டவைகளில் வருமான வரித்துறை நோட்டீஸ் அனுப்பி உள்ளது.

மிகப்பெரிய அளவில் வருமான வரி ஏய்ப்பு செய்த தனி நபர் முதல் நிறுவனங்கள் வரை கண்காணித்து வருமான வரித்துறை புலனாய்வுப் பிரிவு அதிகாரிகள் சோதனையும், விசாரணையும் நடத்தி வருகின்றனர். தற்போது தமிழகத்தில் உள்ள பொதுமக்கள் தொடர்புடைய முதலீட்டில் ஈடுபட்டுள்ள கூட்டுறவு வங்கி, வணிக வங்கி, சார் பதிவாளர்கள் அலுவலகம் உள்ளிட்டவைகளும் வருமான வரித்துறைக்கு (SFD) நிதிப் பரிவர்த்தனை அறிக்கை ஆண்டுதோறும் சமர்ப்பிக்க வேண்டும்.

அவ்வாறு சமர்ப்பிக்காதவர்கள் மீது நோட்டீஸ் அனுப்பி, சோதனை நடத்துவதற்கான அதிகாரம் வருமான வரித்துறைக்கு கொடுக்கப்பட்டு உள்ளது. அவ்வாறாக நிதிப் பரிவர்த்தனை அறிக்கை ஆய்வு செய்வதில் தமிழகம் முழுவதும் 10 ஆயிரம் வழக்குகள் குவிந்து உள்ளதாக வருமான வரித்துறை தரப்பில் தெரிவிக்கப்பட்டு உள்ளது. குறிப்பாக, இந்த நிதிப் பரிவர்த்தனை அறிக்கையை 18 விதமான பிரிவுகளின்கீழ் சமர்ப்பிக்கப்பட வேண்டிய நிலையில் கூட்டுறவு வங்கி, சார் பதிவாளர் அலுவலகம் உள்ளிட்டவைகளில் பலர் உள்ளதாகத் தெரிவித்து உள்ளனர்.

வங்கிகளில் 10 லட்ச ரூபாய் முதலீடுகளுக்கு மேலாகச் செல்லும் போதும், சார் பதிவாளர் அலுவலகங்களில் 30 லட்சம் ரூபாய்க்கு மேலாகப் பரிவர்த்தனை நிகழும் போதும் உரிய கணக்கை நிதிப் பரிவர்த்தனை அறிக்கையில் காட்டப்பட வேண்டும். இவற்றில் முதலீடு செய்த பொது மக்களின் தனிநபர் வருமான வரித்துறை அறிக்கையை ஒப்பிட்டுப் பார்க்கும் பொழுது முரண்பாடு ஏற்பட்டால், அது குறித்து உரிய விளக்கம் அளிக்கக்கோரி நோட்டீஸ் அனுப்பப்படுவதாகவும் வருமான வரித்துறை தெரிவித்து உள்ளது.

வருமான வரித்துறை நுண்ணறிவுப் பிரிவு மற்றும் குற்றப் புலனாய்வு பிரிவிற்கு, டெல்லி தலைமையகத்தில் இருந்து இது போன்ற நிறுவனங்கள் முறையாக கணக்குக் காட்டாததை ஆய்வு செய்து விசாரணை நடத்தும் படி உத்தரவிட்டு உள்ளதாகவும், அதன் அடிப்படையில் நிதிப் பரிவர்த்தனை அறிக்கையை முறையாக காட்டாத ஒவ்வொரு நிறுவனங்கள் மீது வருமான வரித்துறை நடவடிக்கை மேற்கொள்ள துவங்கியுள்ளதாகத் தெரிவித்து உள்ளனர்.

இதில் முதற்கட்டமாக அறந்தாங்கியில் உள்ள கூட்டுறவு வங்கியில் நிதிப் பரிவர்த்தனை அறிக்கையை முறையாக தாக்கல் செய்யாத விவகாரத்தில் வருமான வரித்துறை அதிகாரிகள் 12 மணி நேரம் சோதனை நடத்தியது குறிப்பிடத்தக்கது.

இதையும் படிங்க: அதிமுக முன்னாள் அமைச்சர்கள் மீதான வழக்கை வேகப்படுத்தும் திமுக..!; பின்னணி என்ன..?