போக்குவரத்து கழகங்களில் செயல்படும் அனைத்து தொழிற்சங்க கூட்டமைப்பு சார்பாக வெளியிட்டுள்ள அறிக்கையில், 'தொழிற்சங்க கூட்டமைப்பின் இணையவழி கூட்டம் ஜூலை19 ஆம் தேதி நடைபெற்றது . அக்கூட்டத்தில் போக்குவரத்துக்கழக நிர்வாகங்கள் கடந்த மே மற்றும் ஜூன் மாதங்களில் சம்பளம் வழங்கும் போது தொழிலாளர்களது விடுப்பை கழித்து சம்பளம் வழங்குவது , விடுப்பில்லாவிட்டால் சம்பளத்தை பிடித்தம் செய்வது போன்ற தவறான நடவடிக்கைகளை மேற்கொண்டன.
ஜூலை 1 ஆம் தேதி முதல் பேருந்துகள் இயங்காத நிலையில் தொழில்நுட்ப மற்றும் அலுவலக பணியாளர்களை வேலைக்கு வரவைத்து பல்வேறு தேவையற்ற வேலைகளை வழங்குவது போன்ற நடவடிக்கைகளில் ஈடுபட்டனர். எனவே போக்குவரத்துக்கழக நிர்வாகங்களின் தவறான நடவடிக்கைகளை சரிசெய்ய கோரியும் தொழிலாளர்களுடைய பிரச்சினைகளை தீர்க்கக்கோரியும் போக்குவரத்து செயலாளர் மற்றும் நிர்வாக இயக்குநர்களுக்கு கூட்டமைப்பின் சார்பில் முறையீடு செய்ததாக குறிப்பிடப்பட்டுள்ளது.
கழக தலைமையகங்கள் மற்றும் மண்டல தலைமையகங்களில் நிர்வாக இயக்குனர்கள் மற்றும் பொது மேலாளர்களை சந்தித்து கோரிக்கைகளை வலியுறுத்தப்பட்டது. ஆனாலும் நாம் முன்வைத்த கோரிக்கைகளை விவாதித்து தீர்வுகாண எவ்வித நடவடிக்கையும் மேற்கொள்ளப்படவில்லை.
ஜூலை மாத ஊதியம் வழங்கும் போது இது போன்ற தவறான நடவடிக்கைகள் தொடரக்கூடாது என்றும், கழக மட்டங்களில் முன்வந்துள்ள பிரச்சினைகளையும் இணைத்து போக்குவரத்து செயலாளர் மற்றும் கழக அதிகாரிகளுக்கு கடிதம் அனுப்பப்பட்டுள்ளது.
மேலும் வருகிற ஜூலை 23ஆம் தேதிக்குள் நாம் முன்வைத்த கோரிக்கைகளை விவாதித்து தீர்வுகாண நிர்வாகங்கள் முன்வராவிட்டால், ஜூலை 24ஆம் தேதியன்று காலை 10 மணிக்கு , சென்னையில் கூட்டமைப்பு சங்க தலைவர்கள் சங்கத்திற்கு இரண்டு பேர் என்ற அடிப்படையில் உண்ணாவிரத போராட்டத்தை துவக்குவது என முடிவு மேற்கொள்ளப்பட்டுள்ளது.
மேலும் உண்ணாவிரதம் துவங்கிய பின்பு நிர்வாகத்தின் கவனத்தை ஈர்க்கும் வகையிலும், பிரச்சினைகளுக்கு தீர்வுகாண வலியுறுத்தியும் அனைத்து நிர்வாக இயக்குநர்களுக்கும் அந்தந்த கழகத்தை சேர்ந்த தொழிலாளர்கள் மிஸ்டு கால் ( Missed Call ) கொடுக்கவும் முடிவு செய்துள்ளோம் .
எனவே கீழ்க்காணும் கோரிக்கைகளை உடனடியாக நிறைவேற்றி தருமாறு அரசுக்கு வேண்டுகோள் விடுத்துள்ளோம்.
1. வருவாய் மற்றும் பேரிடர் மேலாண்மை துறை அரசாணையில் தொழிலாளர்களுக்கு எவ்வாறு வருகைப்பதிவேடு பராமரிக்கப்படவேண்டும் என்பது மிகவும் தெளிவாக வரையறை செய்யப்பட்டுள்ளது . ஆனால் மே மற்றும் ஜூன் மாதங்களில் அரசாணைக்கு புறம்பாக நிர்வாகங்கள் நடவடிக்கை மேற்கொண்டதால் பல தொழிலாளர்கள் சம்பள இழப்புக்கு உள்ளாக்கப்பட்டதுடன், தொழிலாளர்களின் விடுப்பை கழித்து சம்பளம் வழங்கப்பட்டுள்ளது. இதை சரிசெய்து அரசாணை அடிப்படையில் தொழிலாளர்களுக்கு ஊதியம் கிடைப்பதை உறுதிப்படுத்த வேண்டும்.
2. பேருந்துகள் நிறுத்தப்பட்டுள்ள நிலையில் தொழில்நுட்ப பணியாளர்களுக்கும் அலுவலக பணியாளர்களுக்கும் எவ்வித பணியும் இல்லை . இந்நிலையில் தொழில்நுட்ப பணியாளர்களை பணிக்கு வர நிர்பந்தித்து அத்தியாவசியமற்ற பணிகள் செய்ய நிர்பந்திக்கப்படுகின்றனர். எனவே அரசாணைகளில் குறிப்பிட்டுள்ளபடி விதிவிலக்களிக்கப்பட்ட தொழிலாளர்களை எக்காரணம் கொண்டும் பணிபுரிய அனுமதிக்க கூடாது.
3. ஜூலை மாத சம்பளம் வழங்கும் போது எவ்வித பிடித்தம் இன்றி அனைவருக்கும் முழு ஊதியம் வழங்கப்படவேண்டும். பேருந்துகளே இயக்கப்படாத நிலையில் தொழிலாளர்களுடைய விடுப்பை கழித்து சம்பளம் வழங்குவது, விடுப்பில்லாவிட்டால் சம்பளம் இல்லா விடுப்பாக பாவிப்பது போன்ற தவறான நடைமுறைகள் கடந்த மே மற்றும் ஜூன் மாதங்களில் அமுல்படுத்தப்பட்டது . இப்படிப்பட்ட தவறான நடவடிக்கையை அரசு கைவிட வேண்டும் .
4 , கோயம்புத்தூர் கழகத்தில் ஓட்டுநர் பயிற்சி ஆசிரியர் , பரிசோதனை ஆய்வாளர்களிடம் விடுப்பு எழுதிக்கொடுக்கும் படி நிர்பந்திக்கப்பட்டுள்ளது மிக மோசமான தவறான நடவடிக்கையாகும் . எனவே அனைவருக்கும் சிறப்பு விடுப்பு அனுமதித்து ஊதியம் வழங்கப்படவேண்டும் .
5. உடல் நிலை பாதிக்கப்பட்டு இலகு அனுமதிக்கப்பட்ட தொழிலாளர்களுக்கும் , மருத்துவ தகுதியின்மை காரணமாக மாற்றுப்பணி கோரியுள்ள தொழிலாளர்களுக்கும் ஊரடங்கு காலம் முடிந்து பேருந்து இயக்கம் இயல்புநிலைக்கு திரும்பும்வரை முழு ஊதியம் வழங்கப்பட வேண்டும்
6. தொழில்நுட்ப ஊழியர்களுக்கு பணிபுரிந்த நாட்களுக்குரிய இன்சென்டிவ் (INCENTIVE) மற்றும் இதர படிகள் வழங்கப்படவேண்டும்.
7. ஊரடங்கு காலத்தில் பல தொழிலாளர்களை ஊர் மாறுதல் செய்தும், ஒழுங்கு நடவடிக்கை மேற்கொண்டும் பழிவாங்கும் நடவடிக்கைகள் மேற்கொள்ளப்பட்டுள்ளது. எனவே இனி எவ்வித பழிவாங்கும் நடவடிக்கையும் இருக்கக்கூடாது .
8. ஒப்பந்த அடிப்படையில் தற்போது போக்குவரத்து கழகங்களில் பேருந்துகள் இயக்கப்பட்டு வருகின்றன . இப்பேருந்துகளில் பணிபுரியக்கூடிய ஊழியர்களுக்கு மாநகர போக்குவரத்துக்கழகத்தில் சிறப்பு படியாக ஒரு நாளைக்கு ரூ .500 வழங்கப்பட்டு வருகிறது . மற்ற கழகங்களிலும் இதே அடிப்படையில் வழங்கப்பட வேண்டும்.
9. பணியின் போது கரோனா நோய்த்தொற்றால் பாதிக்கப்படக்கூடிய தொழிலாளர்களுக்கு அரசு துறைகளில் ரூ .2 லட்சம் வழங்கப்படுகிறது. அதே போல் கரோனா நோய்த்தொற்றால் உயிரிழக்கும் ஊழியர்களுக்கு ரூ .50 லட்சம் தமிழ்நாடு அரசால் வழங்கப்பட்டுவருகிறது . அதே போன்று போக்குவரத்து ஊழியர்களுக்கும் வழங்கப்பட வேண்டும்.
10. போக்குவரத்துக்கழகங்களில் பணி ஓய்வு பெற்ற தொழிலாளர்களுக்கு கடந்த 2019 ஏப்ரல் மாதம் முதல் ஓய்வுகால பலன்கள் வழங்கப்படவில்லை. மேலும் 2016 ஒப்பந்த அடிப்படையிலான நிலுவை தொகைகளும் வழங்கப்படவில்லை , எனவே ஒய்வு பெற்றோர் பணப்பலன்களை வழங்குவதுடன் மருத்துவ காப்பீடு உள்ளிட்ட கோரிக்கைகளை உடனடியாக நிறைவேற்ற வேண்டும்.
மேற்கண்ட கோரிக்கைகளை அரசு உடனடியாக நிறைவேற்றி தருமாறு அனைத்து தொழிற்சங்க கூட்டமைப்பு சார்பாக கேட்டுக் கொள்ளப்படுகிறது' என்று குறிப்பிடப்பட்டுள்ளது.
