இடைத்தேர்தல் பணியால் காத்தாடும் தலைமைச் செயலகம் - ஏமாற்றத்தில் மக்கள்

சென்னை: விக்கிரவாண்டி, நாங்குநேரி இடைத்தேர்தல் பரப்புரையில் முதலமைச்சர், துணை முதலமைச்சர், அமைச்சர்கள் ஆகியோர் ஈடுபட்டுள்ளதால் தமிழ்நாடு தலைமைச் செயலகம் ஆட்கள் இன்றி வெறிச்சோடி காணப்படுகிறது.

தமிழ்நாட்டில் காலியாக உள்ள விக்கிரவாண்டி, நாங்குநேரி சட்டப்பேரவைத் தொகுதிகளுக்கான இடைத்தேர்தல் வரும் 21ஆம் தேதி நடைபெறுகிறது. இந்த இடைத்தேர்தல் 2021ஆம் ஆண்டு நடைபெறவுள்ள சட்டப்பேரவைத் தேர்தலுக்கு முன்னோட்டமாக பார்க்கப்படுகிறது.

இதனால் இரண்டு தொகுதிகளையும் வென்று மக்களிடம் தங்களுக்கு இன்னும் ஆதரவு உள்ளது என்று காட்ட அதிமுகவும், தேர்தலில் வெற்றி பெற்று தங்கள் பலத்தை நிரூபிக்க திமுகவும் வேட்டியை மடித்து கட்டி களத்தில் குதித்துள்ளன. அதிமுக சார்பில் வேட்பாளர்கள் இறுதி செய்யப்பட்டவுடன் தேர்தல் பணிக்குழு பொறுப்பாளர்கள் நியமிக்கப்பட்டனர்.

முதலமைச்சர் எடப்பாடி பழனிசாமி உடன் அமைச்சர்கள்

இதில் விக்கிரவாண்டி தொகுதியில் பணியாற்ற அதிமுகவில் 28 மாவட்டங்களில் உள்ள தலைமைக் கழக நிர்வாகிகள், அமைச்சர்கள், மாவட்டச் செயலாளர்கள், சட்டப்பேரவை, நாடாளுமன்ற உறுப்பினர்கள் ஆகியோர் விக்கிரவாண்டி தொகுதியில் தேர்தல் களப்பணியாற்ற வேண்டும் என அதிமுக தலைமை உத்தரவிட்டுள்ளது. இதேபோல், நாங்குநேரி தொகுதிக்கு அதிமுகவின் 27 மாவட்ட நிர்வாகிகள், தொண்டர்கள் தேர்தல் களப்பணியாற்றிவருகின்றனர்.

இந்த பரப்புரையில் முதலமைச்சர் பழனிசாமி, துணை முதலமைச்சர் பன்னீர் செல்வம் ஆகியோர் ஈடுபட்டனர். சீன அதிபர் ஜி ஜின்பிங் - பிரதமர் மோடி ஆகியோரின் சந்திப்பு கடந்த 11, 12ஆம் தேதிகளில் நடைபெற்றதால், முதலமைச்சரும், துணை முதலமைச்சரும் தேர்தல் பரப்புரைக்குச் செல்ல முடியவில்லை.

எனினும் அமைச்சர்களே மாவட்டச் செயலாளர்களாக இருப்பதால், அவர்கள் இரண்டு வாரத்துக்கு முன்பாகவே தங்களுக்கு ஒதுக்கப்பட்ட தொகுதிகளில் முகாமிட்டு வீதி வீதியாகச் சென்று தேர்தல் பணிகளில் ஈடுபட்டுள்ளனர். அதைத் தொடர்ந்து தற்போது முதலமைச்சர், துணை முதலமைச்சர் ஆகியோர் மீண்டும் பரப்புரையில் களமிறங்கியுள்ளனர்

இதனால் சென்னையில் உள்ள தலைமைச் செயலக கட்டடம் வெறிச்சோடி காணப்படுகிறது. அங்கு தினந்தோறும் முதலமைச்சர், துணை முதலமைச்சர், அமைச்சர்கள் ஆகியோர் வரும் வேளையில் பொதுமக்கள், அதிமுக தொண்டர்கள் கூட்டம் அலைமோதும்.

பொதுமக்கள் தங்கள் பிரச்னைகளை தீர்க்க வேண்டி அமைச்சர்களிடம் மனு அளிப்பதற்காக காலை முதல் மாலை வரை முகாமிட்டு இருப்பார்கள். ஆனால் கடந்த இரண்டு வாரங்களுக்கு மேலாகவே முதலமைச்சர், துணை முதலமைச்சர், அமைச்சர்கள் தேர்தல் பரப்புரையில் ஈடுபட்டுள்ளதால் தலைமைச் செயலகம் வெறிச்சோடி காணப்படுகிறது.

தங்களது பிரச்னையை தீர்ப்பதற்காக அமைச்சர்களிடம் மனு கொடுக்க தலைமைச் செயலகம் வரும் பொதுமக்கள், அங்கு யாரும் இல்லாததால், செய்வதறியாது திகைத்து ஏமாற்றத்துடன் திரும்பி செல்லும் காட்சிகளே தினமும் அரங்கேறி வருகின்றன.

இதையும் படிங்க: வெளிநாட்டு பயணத்தை விமர்சிப்பது சரியல்ல - எடப்பாடி பழனிசாமி