சென்னை: தேசிய திரைப்பட விருதுகள் ஒவ்வோரு ஆண்டும் இந்திய அரசால் வழங்கப்படுகிறது. இந்த விருதுகளின் முதன்மையான நோக்கம் திரையுலகைச் சார்ந்த பிரபலங்களை அங்கீகரிப்பதே ஆகும். அந்த வகையில் இந்த ஆண்டிற்கான 69வது தேசிய விருது பெறும் பட்டியலை நேற்று (ஆகஸ்ட் 24) மத்திய தகவல் மற்றும் ஒளிபரப்புத் துறை அறிவித்துள்ளது.
இதில் தமிழ் படங்கள் அதிகம் தேர்வு செய்யப்படாத நிலையில், சிறந்த பிராந்திய மொழி பிரிவில் இயக்குனர் மணிகண்டன் இயக்கிய “கடைசி விவசாயி” படம் சிறந்த படமாக தேர்வு செய்யப்பட்டது. மேலும் அப்படத்தில் நடித்த நல்லாண்டிக்கு சிறப்பு ஜூரி விருது அறிவிக்கப்பட்டு உள்ளது.
இந்த நிலையில் இதுகுறித்து இயக்குனர் மணிகண்டன் வெளியிட்டுள்ள அறிக்கையில், “அனைவருக்கும் அன்பான வணக்கம். மக்களாலும், விமர்சகர்களாலும் கொண்டாடப்பட்ட கடைசி விவசாயி திரைப்படத்திற்கு மிகப்பெரும் அங்கீகாரமாக தேசிய விருது அறிவிக்கப்பட்டுள்ளது. டிரைபல் ஆர்ட்ஸ் நிறுவனத்தின் முதல் தயாரிப்பான கடைசி விவசாயி படத்திற்கு, இரண்டு தேசிய விருதுகள் அறிவிக்கப்பட்டு உள்ளது.
இதற்கு காரணமாக இருந்த விருது தேர்வு குழுவினருக்கும், இந்த படத்தை மக்களிடம் கொண்டு சேர்த்த ஊடகங்களுக்கும், மூத்த பத்திரிக்கையாளர்களுக்கும், ஊடக நண்பர்களுக்கும், இணையதள ஊடகங்களுக்கும் இந்நேரத்தில் என் சிரம் தாழ்ந்த நன்றிகளை தெரிவித்துக் கொள்கிறேன்.
கடைசி விவசாயி படத்தில், முதிய வயதிலும் சோர்வின்றி நடித்து, அக்கதாப்பாத்திரத்தை உயிர்ப்பித்து, கொண்டாட வைத்த மறைந்த அய்யா நல்லாண்டி அவர்களுக்கும், இப்படத்தினை உருவாக்க மிகபெரும் ஒத்துழைப்பை தந்த ஊர்மக்களுக்கும், இப்படத்தினை உலகம் முழுதும் கொண்டு சேர்த்த விஜய் சேதுபதி ப்ரொடக்சன்ஸ் (Vijay sethupathi Productions) மற்றும் சிஎஸ் எண்டர்டெய்ண்மெண்ட் (cs Entertainments) நிறுவனங்களுக்கும் எனது நன்றியைத் தெரிவித்துக் கொள்கிறேன்.
மேலும், இந்தப் படத்தினை உருவாக்க உறுதுணையாக இருந்து, சிறப்பாக நடித்தும் கொடுத்த மக்கள் செல்வன் விஜய் சேதுபதிக்கும், சக தொழில் நுட்ப கலைஞர்களுக்கும், தேசிய விருதுக்காக மனதார பாராட்டிய மக்கள் அனைவருக்கும் கோடான கோடி நன்றிகளை தெரிவித்துக்கொள்கிறேன்.
69 வது தேசிய விருதுகளில், தமிழ் மொழிக்கு, கடைசி விவசாயி படம் இரண்டு விருதுகளைப் பெற்றுள்ளது. இது மிகப்பெரும் மகிழ்ச்சியை தருகிறது. இது போல பல படைப்புகளை உருவாக்க, இந்த விருது மிகப்பெரிய ஊக்கம் தந்துள்ளது. மீண்டும் உங்கள் அனைவருக்கும் என் மனமார்ந்த நன்றியைத் தெரிவித்துக் கொள்கிறேன்” என அவர் கூறியுள்ளார்.
இதையும் படிங்க: National Film Awards 2023: ஸ்ரேயா கோஷலுக்கு தேசிய விருது - இயக்குநர் பார்த்திபன் நெகிழ்ச்சி!
