பழைய ஓய்வூதிய திட்டம்: அரசுக்கு அழுத்தம் கொடுக்கும் ஊழியர்கள்!

திமுக தேர்தல் வாக்குறுதிப்படி, மீண்டும் பழைய ஓய்வூதிய திட்டத்தை அமல்படுத்தக்கோரி, தலைமை செயலக பணியாளர்கள் நூதன போராட்டத்தில் ஈடுபட்டனர்.

சென்னை தலைமை செயலகத்தில் பணியாற்றும் ஊழியர்கள், மூன்று அம்ச கோரிக்கை அடங்கிய அட்டையை அணிந்தவாறு இன்று முதல் மூன்று நாட்களுக்கு பணியாற்ற உள்ளனர். முதற்கட்டமாக முதலமைச்சர் கவனத்தை ஈர்க்கும் விதத்தில் 5000 பணியாளர்கள் பணியில் ஈடுபட்டனர்.

அந்த அட்டையில், “மத்திய அரசு 1.7.22 முதல் வழங்கிய 4 சதவிகித அகவிலைப்படியை வழங்க வேண்டும், காலவரையின்றி முடக்கி வைக்கப்பட்டுள்ள சரண் விடுப்பினை வழங்க வேண்டும், மீண்டும் பழைய ஓய்வூதிய திட்டத்தினை உடனடியாக அமல்படுத்த வேண்டும்” என குறிப்பிடப்பட்டுள்ளது.

இதுகுறித்து செய்தியாளர்களிடம் பேசிய தமிழ்நாடு தலைமைச்செயலக சங்கத்தின் தலைவர் வெங்கடேசன், “தமிழ்நாடு முதலமைச்சர் கவனத்தை ஈர்க்க இந்த முதல் கட்ட நடவடிக்கைகோரிக்கை அட்டையை அணிந்துள்ளோம். முதலமைச்சர் பரிசீலிப்பார் என நம்புகிறோம். ஒருவேளை இல்லாவிட்டால் செயற்குழு கூடி அடுத்தகட்ட நடவடிக்கைகளை அறிவிப்போம்” என தெரிவித்தார்.