சென்னை: போக்குவரத்து காவல்துறை போக்குவரத்து விதிமீறல்களைக் குறைக்கவும், சாலை விபத்து மரணங்களைக் குறைக்கவும் பல்வேறு புதிய தொழில் நுட்பங்களையும், புதிய திட்டங்களையும் அமல்படுத்தி வருகிறது. அந்த அடிப்படையில் தானியங்கி முறையில் அபராதம் விதிக்கும் ANPR கேமராக்கள் போடப்பட்டது. மேலும் அபராதம் வசூலிக்கும் முறையிலும் டிஜிட்டல் மயமாக்கப்பட்டு நவீன காலத்திற்கு ஏற்ப அபராதம் வசூலிக்கப்பட்டது. இந்த அபராதங்களை வசூல் செய்வதற்காக 12 கால் சென்டர்கள் உருவாக்கப்பட்டு நிலுவையில் உள்ள அபராதம் தொகை சுமார் 29 கோடி ரூபாய் வாகன ஓட்டிகளிடம் இருந்து வசூல் செய்யப்பட்டது.
அதிகரிக்கும் வாகனங்களின் எண்ணிக்கையினால் சென்னை மாநகரம் போக்குவரத்து நெரிசல் மிகுந்த நகரமாக மாறி வருகிறது. இதனை கட்டுப்படுத்தும் வகையிலும், சீர்படுத்தும் வகையில் பல்வேறு நடவடிக்கைகளைப் போக்குவரத்து போலீசார் மேற்கொண்டு வருகின்றனர். 186 இடங்களில் ரிமோட் சிக்னல்கள் அமைக்கப்பட்டும், 104 சந்திப்புகளில் போக்குவரத்து விதிமுறைகள் மற்றும் விழிப்புணர்வை ஏற்படுத்தும் வகையிலும் ஒலிப்பெருக்கிகள் மற்றும் பாடல்கள் அறிமுகப்படுத்தப்பட்டது.
மேலும் போக்குவரத்து காவலர்கள் சீரிய முறையில் பணியாற்றுவதைக் கண்காணிக்க E beat செயலிகள் கொண்டுவரப்பட்டன. பொதுமக்கள் சமூக வலைதளங்கள் மூலம் அளிக்கப்படும் புகார்கள், அறிவுறுத்தல்கள் மற்றும் போக்குவரத்து நெரிசல்கள் ஆகியவைகளை உடனுக்குடன் ஆய்வு செய்து தீர்வு காணும் வகையில் சென்னை போக்குவரத்து காவல்துறையின் சமூக வலைதள பக்கம் தீவிரமாகச் செயல்படுகிறது.
போக்குவரத்து விதிமீறல்களைக் கட்டுப்படுத்துவதோடு மட்டுமில்லாமல், விதிமுறைகளை மக்களிடம் கொண்டு செல்லும் வகையில் பல்வேறு விழிப்புணர்வு நிகழ்ச்சிகளைப் போக்குவரத்து போலீசார் மேற்கொண்டு வருகின்றனர். மெட்ரோ பணிகள் மற்றும் மாநகராட்சி பணிகள் காரணமாக பல்வேறு இடங்களில் திறம்பட போக்குவரத்து மாற்றங்கள் செய்து முன்னோட்டம் பார்க்கப்பட்டது. இந்த போக்குவரத்து மாற்றத்தின் மூலம் போக்குவரத்து நெரிசல்கள் குறைக்கப்பட்டது.
அதிகரிக்கும் சில குறிப்பிட்ட போக்குவரத்து விதிமீறல்களைக் கட்டுப்படுத்த சிறப்பு தணிக்கைகள் மேற்கொள்ளப்பட்டு அறிவுரைகளும், அபராதங்களும் விதிக்கப்பட்டன. உதாரணமாக சீட் பெல்ட் அணிவது, ஹெல்மெட் அணிவது, ஒரு வழிப்பாதை, ஹாங்கிங், ஸ்டாப் லைன் உள்ளிட்ட விதிமீறல்களைக் கட்டுப்படுத்த சென்னை முழுவதும் சிறப்பு வாகன தணிக்கை மேற்கொள்ளப்பட்டது. மோட்டார் வாகன திருத்தச் சட்டத்தின் அடிப்படையில் பல மடங்கு உயர்த்தப்பட்ட புதிய அபராத தொகை கண்டு பொதுமக்கள் அதிர்ச்சி அடைந்தாலும், எந்தவித பிரச்சனையும் ஏற்படாமல் அமல்படுத்தியதில் சென்னை காவல்துறை சிறப்பாகப் பங்காற்றியுள்ளது.
மேலும் கடந்த மூன்று ஆண்டுகளில் பதிவு செய்யப்பட்ட வழக்குகள், விதிக்கப்பட்ட அபராதங்கள், விபத்துகள் மற்றும் உயிரிழப்புகள் குறித்த புள்ளி விவரங்களைச் சென்னை போக்குவரத்து காவல்துறை வெளியிட்டுள்ளது. இந்த ஆண்டு மேற்கொள்ளப்பட்ட புதிய திட்டங்கள், தொழில் நுட்பங்கள் ஆகியவற்றின் காரணமாகச் சென்னையில் கடந்தாண்டை ஒப்பிடுகையில் இந்தாண்டு விபத்துகள் மற்றும் மரணங்கள் 12% அளவிற்குக் குறைந்துள்ளதாகச் சென்னை போக்குவரத்து காவல்துறை தெரிவித்துள்ளது.
கடந்த 2020ஆம் ஆண்டு 559 சாலை விபத்துகளும், அதில் 575 உயிரிழப்புகளும் நிகழ்ந்துள்ளது. 2021 ஆம் ஆண்டு பெரியளவில் மாற்றமில்லாமல் 566 சாலை விபத்துகளும், 573 உயிரிழப்புகளும் நிகழ்ந்துள்ளன. கடந்த இரண்டு ஆண்டுகளை ஒப்பிடுகையில் 2022 ஆம் ஆண்டில் 12% சாலை விபத்துகளும், உயிரிழப்புகளும் குறைந்துள்ளது. குறிப்பாக 2022ஆம் ஆண்டு 499 சாலை விபத்துகளில் 507 பேர் மரணமடைந்துள்ளனர்.
மேலும் போக்குவரத்து விதிமீறல்களைக் கட்டுப்படுத்துவதற்காக காவல்துறையின் தீவிர நடவடிக்கையினால் சுமார் 10% பதிவு செய்யப்பட்டுள்ள வழக்குகள் அதிகமாகி உள்ளது. 2020ஆம் ஆண்டு 18,69,316 வழக்குகள் பதிவு செய்யப்பட்டது. 2021ஆம் ஆண்டு 21,02,209 வழக்குகள் பதிவு செய்யப்பட்டன. 2022ஆம் ஆண்டு 22,94,823 வழக்குகள் பதிவு செய்யப்பட்டுள்ளது. 2022 ஆம் ஆண்டு வசூல் செய்யப்பட்ட அபராதங்கள் அதற்கு முந்தைய ஆண்டை விட 60% அதிகமாக விதிக்கப்பட்டுள்ளது. அதனடிப்படையில் விதிக்கப்பட்ட அபராத தொகையின் மதிப்பு 68,18,96,512 ரூபாய் அபராதங்கள் விதிக்கப்பட்டன.
இருப்பினும் கடந்த மூன்று ஆண்டுகளாகப் பதிவு செய்யப்பட்ட வழக்குகளின் எண்ணிக்கை அதிகரித்தாலும், அதில் 50 சதவீதத்திற்கும் குறைவான வழக்குகள் மட்டுமே போக்குவரத்து காவல்துறையால் தீர்க்கப்பட்டு வரும் சூழ்நிலை நிலவி வருகிறது. இதே போன்று அபராத தொகை பொருத்தமட்டில் அதிகமாக விதிக்கப்பட்டாலும் 50% குறைவான அபராத தொகையே வாகன ஓட்டிகள் இடமிருந்து வசூல் செய்யப்பட்டுள்ளதும் புள்ளி விவரங்கள் மூலம் தெரியவந்துள்ளது.
இதையும் படிங்க: பெருங்குடி குப்பைக்கிடங்கை மீட்கும் பணி; பயோ மைனிங் செய்ய மாநகராட்சி திட்டம்
