சென்னை:சென்னை அண்ணா நகர் ரவுண்டானாவில் இருந்து திருமங்கலம் நோக்கிச் செல்லும் சாலையில் நேற்று நள்ளிரவில் 2 சொகுசு கார்கள் அதிவேகமாக சென்று கொண்டிருந்தது. அதில் ஒரு கார் சூப்பர் மார்க்கெட்டிற்குள் கண்ணிமைக்கும் நேரத்தில் புகுந்தது. அப்போது மார்க்கெட் வெளியே இருந்த கடை ஊழியர் ஒசிம் என்பவர் படுகாயம் அடைந்தார்.
உடனே காரில் இருந்த இளைஞர்கள் சிலர் மற்றொரு காரில் சட்டென்று தப்பிச் சென்றனர். இதுதொடர்பாக திருமங்கலம் போக்குவரத்து புலனாய்வு பிரிவு காவல்துறைக்கு வந்து விசாரணை நடத்தி வருகின்றனர்.
விபத்தை ஏற்படுத்திய கார் சென்னை அண்ணா நகர் மேற்கு பகுதியைச் சேர்ந்த சாமிநாதன் என்பவருக்கு சொந்தமானகார் என்றும், அந்த காரினை அவரது மகன் ராஜேஷ் தன்னுடைய நண்பர்களோடு சேர்ந்து ஒட்டியதும் தெரியவந்துள்ளதாக காவல்துறையினர் தெரிவித்துள்ளனர்.
அதே பகுதியில் உள்ள சிசிடிவி காட்சிகளை காவல்துறையினர் ஆய்வு செய்து கைப்பற்றினர். அதில் கார் அதிவேகமாக சென்று நடைமேடை மீது ஏறி சூப்பர் மார்க்கெட்டிற்குள் புகும் காட்சி பதிவாகியுள்ளது. அவர்கள் கார் ரேசில் ஈடுபட்டிருக்கலாம் என கூறப்படும் நிலையில், தப்பியோடிய அனைவரையும் காவல்துறை தீவிரமாகத் தேடி வருகின்றனர்.
இதையும் படிங்க:பொருள்கள் வாங்குவதுபோல் நடித்து நகை பறிப்பு - விரட்டிப் பிடித்த பொதுமக்கள்
